8
Pildad
1-2 Komwi kaimwiseklahr omwi lokaiahn kisinieng kan?
Koht sohte kin ketin wekidala sapwellime kadeik;
e sohte kin kapweiekidi eh kin ketin wia dahme pwung.
Mweinele noumw seri kan wiadahr dihp ong Koht,
ihme e ketin kalokehkin irail ni me konehng.
Eri, sohpeiong oh pekipek rehn Koht Wasa Lapalahpie;
ma komwi me mehlel oh mwakelekel,
Koht ahpw pahn ketido oh sewesei komwi
oh kapwuredohng komwi tohn imwomwio nin duwen keting ehu.
Omwi pai koaros me sohralahr pahn wiahla mehkot mwahl
me sohte pahrekiong dahme Koht pahn ketikihong komwi.
Komwi tehk mahs ahnsou kis mwomwen erpit en mahs ako;
medemedewe duwen me mehlel kan me atail pahpa ko wehwehkier. +
Atail mour me mwotomwot, sohte mehkot kitail ese;
kitail kin sohrala rasehng mwete pohn sampah.
10 Ahpw ohl loalokong en kawa ko en sukuhlih komwi;
rong dahme re koasoia:
11 “Ahlek sohte kak wosada wasa me sohte pihl;
re sohte kak dierek wasa me sohte pwelmatak.
12 Ma pihl pahn madada, irail me pahn tepin mengila,
ahpw re me nohn tikitik oh sohte kak palidi pwehn wia mehn doadoahk.
13 Aramas me sohte ar Koht kin duwehte ahlek pwuko;
ar koapworopwor kin sohrala, ni ahnsou ehu me re kin sohpeisang Koht.
14 Re kin koapworopworki selin dereht ehu—pesen likan ehu.
15 Ma re pahn idengekla pohn pesen likan ehu, pesen likano kak kolirailda?
Ma re pahn koledi selin dereht ehu, sahlo kak sewese irail en uhda?”
 
16 Aramas suwed kin rasehng kisin dihpw me kin wosada pahn ketipin,
rasehng kisin dihpw me kin parpeseng wasa koaros nan mwetuwel.
17 Kalowarail kin pwoalepene takai kan
oh kin pwoalepene teng takai koaros.
18 Ahpw song usirailda—
sohte mwahn emen pahn ese me mie tuhke wasao.
19 Ei, ih soangen peren pwukat me aramas suwed kan kin ahneki;
meteikan ahpw kin kohdo oh mihla nan dewerail.
20 Ahpw Koht sohte pahn ketin meliehla me loalopwoat akan
de e sohte pahn ketin sewese aramas suwed kan.
21 E pahn ketin kupwureikomwihla pwe komwi en kak pwurehng kouruhr oh pereperen,
22 ahpw e pahn ketin kanamenekihala irail kan me kailongkin komwi,
oh imwen me suwed kan pahn sohrala.
+ 8:8 Sir 8.9.