Pwuhken MAIKA
Oaralap en Pwuhk wet
Soukohp Maika momour ni mwehin Aiseia, iei pwilidak en kahnimw ehu nan Suda, palieir en wehio. E ahneki soangen lamalamohte me soukohp Eimwos ahneki oh kohpada duwen paisuwed laud me pahn lelohng wehin Israel ni paliepeng en wehio, oh pwehki kahrepeohte—Koht pahn ketin kaloke sapwung en aramas akan. Ahpw nan mahsen en kokohp en Maika, kilel kan en koapworopwor ong ahnsou kohkohdo me inenen dehde mwahu mehlel oh sansal.
Wasa kan me konehng ale petehkpe mwahu, iei sansal en popohl oh meleilei pahn kupwur en Koht (4.1-4); kokohp en nanmwarki lapalap me pahn kisehn kadaudok en Depit oh e pahn ketikidohng popohl wehio (5.2-5a); oh ni pwuloiteieu (6.8), oaralap en dahme soukohp en Israel kan kin patohwan: “Iet me KAUN-O kin ketin kupwurki kitail en wia: kitail en wiahda me pwung; kitail en kin kasalehda atail limpoak poatopoat, oh peikiong atail Koht ni karakrahk.”
Audepe ni Oaralap
Kadeik ong Israel oh Suda 1.1—3.12
Onohnsapahl oh popohl 4.1—5.15
Mahsen en kehkehlik oh koapworopwor 6.1—7.20
1
1 Iet mahsen kan me KAUN-O ketikihong Maika, mehn kahnimw Moresed, ni mwehin Sodam, Ahas, oh Esekaia, nanmwarkien Suda kei. KAUN-O ketin kasalehiong Maika mepwukat koaros duwen Sameria oh Serusalem.
Mahsen Kansensuwed kei duwen Sameria oh Serusalem
2 Kumwail tohn wehi kan koaros, kumwail rong!
Tohn sampah kan koaros, kumwail pil rong kanahieng!
KAUN-O, Wasa Lapalahpie, ketin peliankin kumwail sapwellime kadehde.
Kumwail rong! Pwe e pahn mahsendo sang nan tehnpese nanleng.
3 KAUN-O ketiket kohdo sang nan mwoale sarawi;
e pahn ketidihdo oh ketin sok pohn kumwen nahna kan.
4 Eri, nahna kan ahpw pahn peipeseng pahn aluweluwe kan,
rasehng kirihs nan kisiniei;
re pahn wudekiong nan wahu kan,
duwehte pihl me kin pwilipwildihdo sang pohn dohl.
5 Pwe dipen mehn Israel kan oh arail uhwong Koht me kahrehda. Ihs me pahn pwukoahki en mehn Israel kan ar kahngohdiong KAUN-O? Kaidehkin Sameria, poahsoankauno? Ihs me kin pwongih dikedik en eni nan Suda? Kaidehkin Serusalem?
6 Ihme KAUN-O mahsaniheki, “I pahn wiahkihla Sameria mohn ihmw ehu nansapw, wasahn poad wain. I pahn sikendilahng takai kan en kahnimwo nan wahwo, oh kapwarehda poahsoane kan.
7 Nah dikedik en eni koaros pahn kamweremwerpeseng, mehkoaros me kohieng nah lihen netiki paliwararail kan nan tehnpas sarawio pahn kamwomwomwkihla kisiniei, oh nah sansal koaros pahn wiahla koasoakoasoak en kihd. Sameria ale soahng pwukat pwehki eh tiahk en wia kaudok en kaparahla aramas, oh met eh imwintihti kan pahn wairailsang pwe re en uhd kolahng wia arail tiahk en kaudok en netiki paliwar kan ekis wasa tohrohr.”
8 Eri, Maika ahpw nda, “Pwehki kahrepe wet I pahn nsensuwed oh mwahiei. Pwe I en kasalehda uwen ei nsesuwed, I pahn alialuseli kilisou oh sohte suht. I pahn weriwer duwehte kidien wel kan, oh sengiseng duwehte menin nanwel kan.
9 En Sameria eh ohla kan sohte pahn mohdi, suwed en ohla wet pil douwengehr Suda; e pil lellahngehr ewen kelen Serusalem, wasa nei aramas akan kin koukousoan ie.”
Imwintihti kan Kerendohng Serusalem
10 Kumwail dehpa koasoiaiong atail imwintihti kan nan Kad duwen atail lohdi; kumwail dehpa sengiseng mwohrail. Kumwail mehn Ped Leapra, kumwail kasalehda amwail nsensuwed ni amwail pahn tapwurseli nan pwelpar!
11 Kumwail mehn Sapir kan, kumwail kalipilipala ni amwail kilisou oh namenek. Irail kan me kin kousoan Sahnan sohte pahn kak eimah en pedoisang nan ar kahnimwo. Ni amwail pahn rong mehn Pedesel ar mwahiei, kumwail pahn esehda me sohte wasahn ruk wasao.
12 Tohn Marod kin kasikasik ar medek en imwisekla, pwehki KAUN-O karakarandohngehr Serusalem kahpwal laud.
13 Kumwail me kin kousoan Lakis, kumwail kaunopadahng oahs akan ni werennansapw en mahwen kan. Kumwail alasangehr dipen Israel, oh kahrehiong Serusalem nan dihp.
14 Eri met, kumwail mehn Suda kan, kumwail kamwurimwuriong kahnimw Moresed Kad. Sohte pahn mie sawasepen nanmwarkien Israel kan sang kahnimw Aksip.
15 Kumwail tohn Maresa, KAUN-O pahn ketin pangkumwaillahng rehn amwail imwintihti kan me pahn adihasang amwail kahnimw. Kaunen Israel kan pahn ketila rukula nan pwoaren Adullam.
16 Kumwail mehn Suda kan, sehkasang pitenmoangamwail pwehki amwail nsensuwedki noumwail seri kan me kumwail kin poakepoake. Kumwail kamadahda moangamwail kan, duwehte moangen kutoahr, pwehki noumwail seri kan ar pahn kalipilipala sang rehmwail.