Nein Pohl Kisinlikou ong Mehn
PILIPAI
Oaralap en Kisinlikou wet
Nein Pohl Kisinlikou ong Mehn Pilipai ntingdier ong mwomohdiso me Pohl tepin kauwada nan wehin Iurop, nan Masedonia, wehi ehu me kisehn wehin Rom. Pohl ntingihedi kisinlikou kiset nindokon eh mihmi nan imweteng, ni ahnsou me e diar apwal sang rehn ekei tohndoadoahk en mwomwohdiso oh nsensuwedkihla padahk likamw ekei me pwarada nan mwomwohdisohn Pilipai. Eri soh, nan kisinlikou kiset irair en peren oh koapworopwor me inenen sansal, eri, met sang ni en Pohl eh pwoson mehlel Sises Krais.
Kahrepe keieu en ntingdien kisinlikou kiset, pwe Pohl en kapingkalahngkihong souleng en Pilipai sawas me re kadarodohng reh ni ahnsou me e anahne sawas. E ahpw katamankin irail re en dehr mworusala oh nan kapehd tikitikla pwehki eh apwal akan oh pil pwehki arail apwal akan. E koangngoangehkin irail re en kin ahneki mour aktikitik duwehte me Krais sapwellimaniki, a ieremen mouren mehwo de aklapalap. E pil katamankin irail me arail mouren miniminiong Krais, iei kisakis sang ni kalahngan en Koht me re aleier pwehki ar pwoson, a kaidehk pwehki ar kin peikiong tiahk kan en Kosonned en Moses. E koasoia duwen peren oh popohl me Koht kin ketikihong irail kan me kin miniminiong Krais nan ar mour.
Me keieu sansal nan kisinlikou kiset, iei irair en peren, koapworopwor, minimin, oh dadaur nan pwoson oh mouren souleng. En Pohl eh limpoakohng oh kesempwalki mwomwohdisohn Pilipai me pil sansal mehlel nan kisinlikou kiset.
Audepe ni Oaralap
Tepin kisinlikou 1.1-11
Irair kei me pid mouren Pohl 1.12-26
Atail mour rehn Krais 1.27—2.18
En Pohl eh koasoandi kan ong Timoty oh Epaprodaitus 2.19-30
Kehkehlik duwen imwintihtien liki oh keper kei 3.1—4.9
Pohl oh kompoakepah kan nan Pilipai 4.10-20
Kaimwiseklahn kisinlikou 4.21-23
1
1 Sang Pohl oh Timoty, ladun Krais Sises—
Ong sapwellimen Koht aramas akan koaros me kin koukousoan Pilipai, me kin pwoson Krais Sises, iangahki sounkaweid akan oh sounsawas akan en mwomwohdiso:
2 Samatail Koht oh atail Kaun Sises Krais en ketikihong kumwail kalahngan oh popohl.
Kapakapki Irail kan me pahn Wadek Kisinlikou kiset
3 I kin kapingkalahngankihong ei Koht pwehki kumwail koaros ni ahnsou koaros me I kin tamankumwailda;
4 oh ni ahnsou me I kin kapakapkin kumwail, I kin kapakap ni peren,
5 pwehki soangen sawas me kumwail kin sewesehkin ie nan doadoahk en rongamwahu, sang nin tapio lel rahnwet.
6 Eri, I inenen koapworopworki me Koht, me ketin tapihadahr doadoahk mwahu wet loalamwail, pahn ketin kadakadaur lao e pahn unsekla ni Rahnen Krais Sises.
7 Kumwail kin mihmi nan mohngiongi ahnsou koaros! Eri, e konehng I en ahneki pehm wet ong kumwail, pwehki kumwail koaros pil iangieier pwaisanki ahnsou mwahu wet me Koht ketikihongieier, met ni ei miher nan imweteng, oh pil mahs ni ei sansaledekseli pwe I en uhki rongamwahu oh katengehdi pwehn kehlail.
8 Koht kakete kadehdehda me ei lokaia me mehlel ni ei koasoia me ei loaleidkin kumwail kin pwilsang ni pein kupwur en Krais Sises.
9 I kin kapakap pwe amwail limpoak en lalaudla pwe kumwail en marainkihla dahme mehlel oh wia kadeik pwung,
10 pwe kumwail en kak pilada dahme keieu mwahu. Eri, kumwail ahpw pahn saledeksang soangen samin oh sapwung koaros ni Rahnen Krais,
11 oh amwail mour pil pahn audaudkihla soangen kamwahu mehlel kan koaros me Sises Krais kelehpw kak ketikihda, ong ni lingan oh kapingpen Koht.
Krais iei Atail Mour
12 Riei ko, I men kumwail en ese mwahu soahng kan me wiawihongieier inenen sewese mehlel pweida mwahu en rongamwahu.
13 Eri, pwehki mepwukat, irail koaros me sinsile tehnpas wet, oh pil irail teikan wasaht, re ese kahrepen ei mihmi nan imweteng wet, pwehki ei wia ladun Krais.
14 Oh ei mi nan imweteng wet pil kahrehiong pali tohtohn riatail souleng kan eh laudla ar koapworopworki Kaun-o. Eri, re sohte masepwehk, re kin eimah ahnsou koaros ni ar kin padapadahngkiseli mahseno.
15 Mehlel me ekei kin padahngkihwei Krais sang ni arail peirin oh men akamai; ahpw ekei kin padahngkihwei sang ni ar mohngiong mwahu.
16 Irail pwukat kin padahngkihwei sang ni limpoak, pwehki ar ese me Koht ketikihongieier pwaisei doadoahk en uhki rongamwahwo.
17 A meteikan sohte kin uhdahn ngoangki kalohkiseli Krais, ahpw sang ni ineng en roporop ong pein irail; oh re kin kihkihong me re pahn kalaudehla ei apwal akan ni ei selidi.
18 Eri, mehnda! I perenki, ahpw padahk en Krais en wiewiawihte, mehnda ma sang ni ineng suwed de mwahu. Eri, I pahn pereperente,
19 pwe I ese me I pahn saledekla pwehki amwail kapakap akan oh pil pwehki sawas akan sang Ngenen Sises Krais.
20 Iet duwen ei ineng oh koapworopwor: I pahn nantihong ei kohwa doadoahk pwe e de sohte pweida, oh I en eimah nan ei mour unsek pwe I en kasalehda wahu ong Krais ahnsou koaros, ahpw mehlel ahnsou wet, mehnda ma ni ei mour de ni ei mehla.
21 Pwe dahkot mour? Ong ie, iei Krais! Eri, ei mehla pahn kahrehda mehkot me pahn mwahusang.
22 Ahpw ma ei momour pahn kahrehiong ie I en wia doadoahk kesempwalasang mahs, eri, I sehse mehnia me I pahn pilada.
23 I lohdier sang pali riau: I inenen men mweselsang nan mour wet oh iang Krais, pwe iei ih me mwahu ong ie mehlel.
24 Ahpw soh, ei momour me pahn kesempwal pwehki kumwail.
25 Eri, I kamehlele met, ihme I esehki me I pahn momourte. I pahn mihmihte rehmwail koaros, pwe I en kalaudehla amwail kekeirda oh peren nan atail pwoson.
26 Eri, ni ei pahn pwurowei rehmwail, kahrepe laud ehu pahn mie rehmwail pwe kumwail en kak suweikin ie nan amwail mour rehn Krais Sises.
27 Eri, iet me keieu kesempwal ong kumwail: kumwail en momourkihte soangen mour me konehng rongamwahu en Krais, pwe mehnda ma I pahn kak kohwei oh tuhwong kumwail de soh, I ahpw pahn rong me kumwail tengetengkipene kahrepeteieu, oh miniminkipene anahnteieu, ni amwail kin nantihong pwoson me konehng rongamwahwo.
28 Kumwail dehr kin masak amwail imwintihti kan, ahpw kumwail kommwad ahnsou koaros. Eri, met pahn kasalehiong irail me re pahn pehrdi, a kumwail pahn powehdi—pwe iei Koht me kin ketikihong kumwail roson en powehdi.
29 Pwe Koht ketikihongkumwailehr kalahngan ehu—iei en papah Krais, kaidehn sangete ni amwail pwoson ih, ahpw pil sang ni amwail lokolongki ih.
30 Eri, met kumwail kakehr iang ie pei. Iei soangen pei me kumwail kilang ei wia mahs, oh duwen me kumwail rongehr, me I pil wiewiahte ahnsou wet.