144
En Nanmwarki men eh Kasapahlkalahngan ong Koht pwehki eh Powehdi
1 Kapinga KAUN-O, me iei silepei!
E ketin kasukuhlihkin ie doadoahk en mahwen
oh ketin kaunopiedahng mahwen.
2 Ih me silepei oh soundoarepei,
ei wasahn ruk oh sounkomourpei,
me I kin koapworopworki mehlel.
Ih me ketikidiong wehi kan pahn ei manaman.
3 Maing KAUN, dahkot aramas pwe komwi en kin ketin tehk;
dahkot aramas, pwe komwi en ketin kupwukupwure?
4 Aramas rasehng kisin tumwenieng;
rahn akan en eh mour rasehng mwete me kin mwadang sohrala.
5 Maing KAUN, komw ketin ritingada pahnlahng oh ketidihdo;
komw ketin sair nahna kan, re ahpw pahn kakusada ediniei.
6 Komw ketin kadarpeseng lioal oh katangapeseng sapwellimomwi imwintihti kan;
komw ketin kadar sapwellimomwi arep kan oh pwakihirailpeseng.
7 Komw ketin kapahdihdo nin limomwi kan;
komw ketin weikiehda sang nan kepin pihl loal wet, oh ketin kapitiehla;
komw ketin doareiesang pahn manaman en mehn liki kan,
8 me sohte mwahn kin lokaia mehlel
oh pil kin likamw ni arail kin kahula.
9 Maing Koht, I pahn koulkihong komwi koul kapw pwoat;
I pahn kesengki nei arp oh kouliong komwi.
10 Komw ketikihong nanmwarki kan manaman en powehdi
oh ketin kapitala sapwellimomwi ladu Depit.
11 Komw ketin doareiesang imwintihti lemei kan;
komw ketin kapitiesang pahn manaman en mehn liki kan,
me sohte mwahn kin lokaia mehlel
oh pil kin likamw ni arail kin kahula.
12 At tungoal pwutak kan ni ar pwulopwul
re en rasehng kisin tuhke kan me kin keirda kehlail.
At tungoal serepein kan en rasehng uhr inen kan
me kin kalingana keimw en tehnpas akan.
13 At tungoal imwen nahk kan en direkihla
soangen wahnsahpw koaros.
At tungoal pelin sihpw kan
en naitikihada kiden sihmpwul.
14 At tungoal pelin kou kan en neitik oh tohtohla
sohte emen rehrail me pahn iohla, de salongala.
Ngilen paisuwed en dehr pwarada nanial en at kanihmw kan.
15 Meid pai wehi me ahneki soahng pwukat koaros;
meid pai aramas akan me arail Koht iei KAUN-O!