23
KAUN-O, Silepatail
1 KAUN-O, iei silepei;
solahr me I pahn anahne.
2 E ketin kommoaleiehdi nan mohsen dihpw kaselel kei,
oh kin ketin kahluwaielahng ni pihl mwakelekel.
3 E kin ketin kakehleiehda.
E kin ketin kahluwa ie nan ahl me pwung,
nin duwen eh ketin inoukidahr.
4 Maing KAUN, mehnda ma I weweidwei nan rotorot mosul,
a I sohte pahn masak mehkot,
pwe komw ketin ieiang ie!
Sapwellimomwi irar oh lepin seipali pahn kin sinsile ie.
5 Komw ketin kaunopadahng ie kamadipw ehu,
wasa me ei imwintihti kan koaros kak kilang ie;
komw ketin kasamwo ie oh kielediong leh pohn moangei
oh kadikadirehdohte ei tungoal kep.
6 I ese me sapwellimomwi kalahngan oh limpoak pahn ieiang iehte erein ei mour;
oh I pahn patopatohte nan tehnpasomwi kohkohlahte.