25
Kapakap en Peki Kaweid oh Silasil d
Maing KAUN, I kin kapakapohng komwi;
Maing ei Koht, komwi me I kin likih.
Komw ketin doareiesang kanamenekpen ei lohdi;
komw dehr mweidohng ei imwintihti kan re en kepitkin ie!
Me kin likih komwi sohte kin lohdi,
ahpw me kin kahngohdiong komwi, iei irail me kin lohdi.
 
Maing KAUN, komw ketin padahkihong ie,
oh kasalehiong ie sapwellimomwi ahl akan.
Komw ketin padahkihong ie duwen ei pahn momourki sapwellimomwi mehlel,
pwe komwi me ei Koht, komwi me ketin doareiehla.
I kin likih komwi ahnsou koaros.
 
Maing KAUN, komw ketin tamanda sapwellimomwi kalahngan oh limpoak poatopoat,
me komw ketin kasaledahr sang nin tepin kawa.
Komw ketin mahkikihong ie dipei oh ei sapwung kan en ni ei pwulopwulo.
Maing KAUN, komw ketin tamankin ie
sapwellimomwi limpoak poatopoat oh kalahngan.
 
Pwehki KAUN-O eh pwung oh mwahu,
e kin ketin padahkihong me dipan akan ahl me re en weweid ie.
E kin ketin kahluwa me aktikitik kan nan ahl pwung
oh kin ketin padahkihong irail kupwure.
10 Ni sapwellime limpoak oh loalopwoat e kin ketin kahluwa
irail koaros me kin kapwaiada sapwellime inou oh peikiong sapwellime kosonned akan.
 
11 Maing KAUN, komw ketin kapwaiada omwi inowo, oh ketin mahkikihong ie dipei kan,
pwe dipei kan me ngeder.
12 Irail kan me kin wauneki KAUN-O
pahn ese sang reh ahl me re pahn weweid ie.
13 Re pahn kin paiamwahu ahnsou koaros,
oh nair seri kan pahn sapweniki sahpwo.
14 KAUN-O kin ketin kompoakepahniki irail kan me kin peikiong,
oh e kin ketin katengehdi ong irail sapwellime inou.
 
15 I kin rapahki sawasepei rehn KAUN-O ahnsou koaros,
e ahpw kin ketin kapitiesang wasa keper.
16 Maing KAUN, komw ketin sohpeidohng ie oh kupwurkalahngan ong ie,
pwe I kelehpwlahr oh I me luwet.
17 Komw ketin kamaiawihiehda sang nan ei pwunod akan
oh ketin doareiesang nan ei apwal akan koaros.
18 Komw ketin kupwurehla ei pahtou oh lokolok
oh ketin mahkikihong ie dipei kan koaros.
 
19 Komw mahsanih uwen ngeder en ei imwintihti kan;
oh uwen ar kin kailongkin ie!
20 Komw ketin sinsile ie oh doareiehla;
komw ketin sinsile ie pwe I en dehr lohdi.
I kin rapahki poadoarepei sang rehmwi.
21 Ei poadidi oh pwung en sinsile ie,
pwehki ei kin patohwan likih komwi.
 
22 Maing Koht, komw ketin doarehla sapwellimomwi aramas akan en Israel,
sang nan ar apwal akan koaros!
d 25: TITLE NI MAHSEN EN IPRU: En Depit.