52
Sapwellimen Koht Kadeik oh Kalahngan
1 Loallap emen kowe, dahme ke kin aksuweiki omw tiahk suwed kan?
Sapwellimen Koht loalopwoat kin poatopoatete.
2 Ke kin koasoanehdi ke en kauwehla meteikan;
lowomwen rasehng reise keng pwoat.
Ahnsou koaros ke kin kinehda likamw.
3 Ke kin kesempwalki tiahk suwed laud sang tiahk mwahu
oh likamw laud sang mehlel.
4 Aramas likamw emen kowe! Ke kin mwahuki kauwehki meteikan omw lokaia kan.
5 Eri Koht pahn ketin kauweiukala kohkohlahte;
e pahn ketin kasapwiluhkedi oh adihasang uhk wasa ke kin kousoan ie;
e pahn ketikihsang uhk nan sapwen me momour kan.
6 Aramas pwung kan pahn kilang met oh masakada;
irail eri pahn kouruhrkin uhk oh nda,
7 “Kumwail kilang, iet aramas emen me sohte kin koapworopworki sawas en Koht,
ahpw e kin koapworopworki kiden eh kepwe
oh kin repen mourki tiahk suwed oh likamw.”
8 A ngehi, I rasehng tuhke en olip pwoat me kin kekeirda nan tehnpas en Koht;
I kin likih sapwellime limpoak poatopoat kohkohlahte.
9 Maing Koht, I pahn kin patohwan kapingkalahnganki ong komwi
ahnsou koaros ni mehkoaros me komw ketin wiadahr;
I pahn patohwan lohki mwohn sapwellimomwi aramas akan duwen omwi kupwur mwahu.