9
Kapakap en Kapingkalahngan pwehki Sapwellimen Koht Pwuhng i
Maing KAUN, I pahn patohwan kapinga komwi sang nan kapehdi unsek;
I pahn patohwan koasoia wiewia kapwuriamwei koaros me komw ketin wiadahr.
I pahn kokoulki koulen peren pwehki komwi.
I pahn koulki koulen kaping ong komwi, Koht Wasa Lapalap.
 
Ei imwintihti kan kin tangdoaui ni omwi kin ketido;
re kin pwupwudi oh mehla.
Komw me kin ketin mehlel oh pwung ni omwi kadeik kan,
komw ketin kadeikadahr ei pwung.
 
Komw ketin kalokeier me rotorot akan
oh ketin kamwomwalahr aramas suwed kan;
solahr me pahn taman irail.
At imwintihti kan sohralahr;
komwi me ketin kamwomwala ar kahnimw kan,
solahr me taman irail douluhl.
 
Ahpw KAUN-O iei nanmwarki poatopoat;
e ketin koasoanedier sapwellime mwoalen kopwung.
E ketin kakaun sampah ni pwung;
e kin ketin kapwung wehi kan ni kadeik pwung.
 
Rehn KAUN-O iei wasahn ruk ong me toutoulahr akan,
iei wasahn rukula ni ahnsou apwal.
10 Maing KAUN, irail kan me patohwan esei komwi pahn kin likih komwi;
komw sohte kin ketin likidmeliehla mehmen me kin patohdo rehmwi.
 
11 Kumwail koulki koulen kaping ong KAUN-O, me kin kakaun Saion!
Kumwail lohkihong wehi koaros dahme e ketin wiadahr!
12 Koht kin ketin tamataman irail kan me kin lokolok;
e sohte kin meliehla ngilen ar likwer,
oh kin ketin kaloke me kin wia sapwung ong irail.
 
13 Maing KAUN, komw ketin kupwurkalahngan ong ie!
Komw mahsanih kalokolok kan me ei imwintihti kan kin wiahiong ie!+
Maing KAUN, komw ketin kapitiesang mehla,
14 pwe I en kak uh mwohn mehn Serusalem kan
oh koasoia mehkoaros me I kin kapikapingahki komwi.
I pahn pereperen pwehki omwi ketin kapitiehla.
 
15 Aramas rotorot kan weiradahr pwoahr ehu oh re pwupwudiong loale;
re pein lohdiong nan ar lidip.
16 KAUN-O ketin kasalehda pein ih sang ni sapwellime kadeik pwung kan,
oh aramas suwed kan lohdier nan pein ar wiewia kan.
 
17 Mehla iei imwilahn aramas suwed kan koaros,
pil imwilahn irail koaros me kin soikala Koht.
18 Me semwehmwe kan sohte pahn kin lekdekla ahnsou koaros;
arail koapworopwor sohte pahn ohla kohkohlahte.
 
19 Maing KAUN, komw ketidohla; komw dehr ketin mweidohng aramas akan en uhwong komwi!
Komw ketikihda me rotorot kan mwohn silangmwi oh ketin kadeikirailda.
20 Maing KAUN, komw ketin kamasak irail;
komw ketin kamarainihkin irail me irail aramas ekei me pahn mehla.
i 9: TITLE NI MAHSEN EN IPRU: En Depit melkahka. + 9:13 Kupw. 16.13.