92
Koulen Kaping y
Maing KAUN, ia uwen mwahu en ei kin patohwan wia ei kapingkalahngan ong komwi,
ei kin koul oh patohwan kawauwih komwi, Koht Wasa Lapalahpie,
ei kin lohkiseli nimenseng koaros sapwellimomwi limpoak poatopoat,
oh nipwong sapwellimomwi loalopwoat,
iangahki ngilen selin nei keseng kan
oh ngilen arp.
Maing KAUN, wiepen nin limomwi manaman akan kin kansenamwahwihiehla;
pwehki sapwellimomwi wiewia kan, I patohwan koulki ei peren.
 
Maing KAUN, ia uwen lapalap en wiepen nin limomwi kan!
Ia uwen loal en audepen kupwuromwien!
Met iei mehkot me aramas pweipwei men sohte kak ese;
aramas loalopwon sohte kak wehwehki:+
aramas suwed kak keirda duwehte dihpw,
irail me kin wia me suwed kak paiamwahula;
ahpw re pahn kamwomwomwala douluhl,
pwehki komwi, Maing KAUN, me kaun lapalahpie kohkohlahte.
 
Se patohwan ese me sapwellimomwi imwintihti kan pahn mehla,
oh aramas suwed kan koaros pahn lohdi.
10 Komw ketin kakehleiehda duwehte koupwul lawalo men;
komw ketin kupwuramwahwihkinie peren mwuledek.
11 I patohwanehr en ei imwintihti kan ar lohdi
oh rongehr en me suwed akan ar weriwer.
 
12 Me pwung kan pahn pweida mwahu duwehte nih kan;
re pahn keirda duwehte sidar en Lepanon kan.
13 Re rasehng tuhke kan me poadidi nan tehnpas en KAUN-O,
me kin pweida mwahu nan Tehnpas en atail Koht,
14 me kin wah mwahu ni ar mahlahr
oh kin mwomwen pwulopwulte oh kehlail ahnsou koaros.
15 Met kin kasalehda me KAUN-O me pwung,
oh sohte kisin sapwung kis rehn silepeio.
y 92: TITLE NI MAHSEN EN IPRU: Melkahka pwoat; koulen rahnen Sapad. + 92:6 Kupw. 13.1.