Nein Pohl Kisinlikou ong
TAITUS
Oaralap en Kisinlikou wet
Taitus, mehn liki pwulopwul men me soulenglahr, ahpw wiahla iengen Pohl oh sawasepe nan eh doadoahk en kapahrengkiseli Rongamwahu. Nein Pohl Kisinlikou ong Taitus pekederlahng Krihd, wasa me Pohl koasoanehdi Taitus en mihmi ie pwe en koasoanehdi ire kei me anahnepe mie. Iren pwunod siluh me audedahr kisinlikou kiset.
Keieu, Pohl katamanki Taitus soangen aramas me pahn ale pwukoahn kaweid de apwahpwalih mwomwohdiso, ahpw mehlel pwehki mour suwed en mehn Krihd tohto. Mwuri, Pohl pil kaweidki Taitus duwen eh pahn kin kihwei padahk nan mwomwohdiso ong soangen pwihn kei, duwehte ohl mah kan, lih mah kan (me pahn uhd padahkih peinakapw kan), mwahnakapw akan, oh lidu kan. Oh pil mwuri, Pohl kaweidki Taitus duwen mouren souleng, ahpw mehlel duwen kesempwalpen popohl oh meleilei, duwen mweisang kailok, akamai, oh saminimin nanpwungen tohn mwomwohdiso.
Audepe ni Oaralap
Tepin kisinlikou 1.1-4
Sounkaweid en mwomwohdiso 1.5-16
Pwukoa kan en soangen pwihn kan nan mwomwohdiso 2.1-15
Mahsen en koangngoang kei oh peneu kei 3.1-11
Kaimwiseklahn kisinlikou 3.12-15
1
1 Sang Pohl, ladun Koht oh wahnpoaron en Sises Krais. I pilipildahr oh pekederdohr pwe I en sewese pwoson en sapwellimen Koht me pilipil kan, oh kahluwa irail ong nan me mehlel me sansaldahr sang nan atail lamalam,
2 me poahsoankidahr koapworopwor en mour soutuk. Koht, me sohte kin ketin likamw, ketin inoukihongkitailehr mour wet mwohn tepin kawa;
3 oh ni ahnsou me konehng e pil ketin kasalehda nan sapwellime mahsen. E pil ketin likihongieier mahsen wet; eri, I kin kalohkiseli ni poaron en Koht, atail Sounkomour.
4 I ntingkiwohng uhk, Taitus, nei pwutak mehlel nan pwoson me kita ahnekipene:
Koht Samatail, oh Krais Sises atail Sounkomour en ketikihong uhk kalahngan oh popohl.
En Taitus eh Doadoahk nan Krihd
5 I pwilkinuhkedi nan Krihd pwe ke en kapwungala soahng koaros me anahnepe mie en wiawi, oh ke en idihada ekei me mah kan en mwomwohdiso nan kahnimw kan koaros. Tamataman ei koasoien peneu kan:
6 duwen me mah men eh uhdahn pahn pwung; duwen eh pahn pwoudiki lihtehmen, oh duwen nah seri kan ar uhdahn pahn souleng oh sohte kin tiahk suwed de sapeik.
7 Pwehki sounkaweid en mwomwohdiso menet eh pahn apwahpwalih sapwellimen Koht doadoahk, e uhdahn pahn kin mour mwakelekel. E sohte pahn aklapalap, de pwurienikem, de kamam sakau, de lemei, de noahrok mwohni.
8 E pahn kin kasamwo aramas koaros, oh pwungki soahng koaros me mwahu. E uhdahn pahn kak kakaun pein ih, pwung, sarawi, oh kanahieng pein ih.
9 E uhdahn pahn kin tengeteng ni mahseno, me likilikpe mie, oh me pil pahrekiong padahk mehlel. Iei duwen met eh pahn kak kakehlakahki meteikan padahk mehlel, oh pil kasalehda sapwung en irail kan me kin uhwong padahk wet.
10 Pwe mie aramas tohto me kin pelianda oh pitiheki meteikan ar lokaia soh-katepe, ahpw mehlel irail kan me soulenglahr sang ni palien lamalam en mehn Suhs akan.
11 Me inenen konehng ke en katokihedi arail lokaia, pwehki ar kin kapingkihda peneinei kan ar padahk sapwung kan. Kahrepen ar wia met me kanamenek, pwehki re kin alehki mwohni.
12 Pein mehn Krihd men, kisehn arail soukohp ako, me nda, “Mehn Krihd kan kin kalap likamw, re rasehng mahn suwed kan, re kin pohnkahke oh kapehd en mwenge.”
13 Eri, mehlel pwoat met. Ihme kahrehda ke uhdahn pahn lipwoare irail, pwe irail en kak ahneki pwoson kehlail,
14 oh tokedihsang arail koapworopworki poadopoad en mehn Suhs akan, oh en aramas akan ar kosonned akan me kin kohsang rehn irail kan me keselahr me mehlelo.
15 Soahng koaros me inenen mwakelekel ong irail kan me mwakelekel; ahpw sohte okotme me pahn mwakelekel ong irail kan me samin oh me sohte pwoson, pwehki arail madamadau kan oh kadeikpen loalarail kan saminlahr.
16 Irail kin kosekose me re kin ese Koht, ahpw arail wiewia kan sohte pahrekiong me re kin koasoia. Irail kin ahneki kailok oh sapeik, oh re sohte kak wia mehkot mwahu.