Pwuhken ESEKIEL
Oaralap en Pwuhk wet
Soukohp Esekiel iang kalipilipalahng nan Papilonia oh momourki erein ahnsou ehu mwohn oh mwurin ohlahn Serusalem limwahn pahr 586 mwohn Krais. Eh doadoahk oarepene soangen mehn Suhs riau: eri, mehn Suhs me kalipilipalahr ko me mihmi nan Papilonia, oh me kin mihmi Serusalem kan. Pwuhken Esekiel kak pwalpeseng wiahda pali weneu: 1) Malipilip ong Esekiel pwe en wiahla soukohp. 2) Audaudkihda kehkehlik kan ong aramas akan duwen ohlahn oh mwomwlahn Serusalem me pahn kohdo. 3) Kasalehda sapwellimen Kaun-o mahsen en kaweid ong wehi kei me wiakauwe oh kaweidsuwedihala sapwellime aramas akan. 4) Duwen kapohl oh kakehlepen mehn Israel kan mwurin ohlahn Serusalem, oh duwen inoun paiamwahu me pahn kohdo. 5) Kokohp me uhwong Kok. 6) Esekiel koasoiahda duwen onohnsapahl en Tehnpas Sarawio oh wehin Israel.
Esekiel, ohl emen me eh pwoson inenen kehlail oh nan kapehd wehwe. Kamarainpen nan kapehde tohtohie sansanlda ni mwomwen kaudiahl, oh peuspen sapwellimen Kaun-o mahsen tohto reh kin wiawi ni karasaras dehde oh lingan. Esekiel inenen kin kehlailki anahn en onohnsapahl en nan kapehd en aramas oh ngene, oh pwukoahn emenemen aramas ong ni dipe kan; e ahpw pil lohkihda eh koapworopworki onohnsapahl en mouren wehi. Nin duwen samworo men oh soukohp, e kin ngoangki mehlel kamwahupen Tehnpas Sarawio, oh anahnepen mour sarawi.
Audepe ni Oaralap
Malipilip ong Esekiel 1.1—3.27
Mahsen duwen mwomwlahn Serusalem 4.1—24.27
Sapwellimen Koht kadeik ong wehi kan 25.1—32.32
Sapwellimen Koht inou ong sapwellime aramas akan 33.1—37.28
Kokohp me uhwong Kok 38.1—39.29
Kaudiahl ehu en Tehnpas Sarawi oh wehi ong ni ahnsou kohkohdo 40.1—48.35
1
Mwoalen Koht
1 Ni kalimaun rahn ni kapahieun sounpwong en kesilihsek en pahr, ngehi, samworo Esekiel, nein Pusi, mihmi rehn riei mehn Suhs ako me kalipilipalahr nan Papilonia limwahn Pillap Separ. Pahnlahng ahpw ritpeseng, ngehi eri kilangada Koht nan kaudiahl ehu. (
2 Met iei ni kalimaun sounpar sang ni ahnsou me Nanmwarki Sehoiakin kalipilipalahng Papilonia.)
3 Wasao limwahn Pillap Separ, I ahpw rongada mahsen en KAUN-O eh peidohng ie, oh I ahpw pehmada sapwellime manaman.
4 Ngehi eri sarada oh kilangada lapalahn elipip ehu me kohkohdo sang paliepeng, oh lapalahn pelien depwek pali. Sang nan pelien depwek pali wet lioal ahpw kin piripirsang, oh marain lingaling ehu me kapilpene. Wasa me lioal kin pirasang ieo, mie mehkot me inenen lingaling duwehte prons.
5 Nan werengen elipipo mwohmw kei ahpw wie sansaldo, likamwete menmour pahmen. Re mwomwen aramas,
6 ahpw emenemen menmour ko mas pahieu oh pehnpihr pahieu.
7 Nehrail ko me inen, ahpw patehnehrail ko duwehte kumwut en kouwol. Menmour ko ahpw kin wie lingalingdo duwehte lingan en prons.
8 Eri, mas pahieu oh pehnpihr pahieu me emenemen ahneki, pil mie pehn aramas rehn emenemen menmour pwukat me uhsang pahn ehuehu ar pehnpihr kan.
9 Emenemen menmour ko ngapkipeseng pehnpihr riau, oh imwin pehrail kan doakpene, me kahrehda mwomwarail wia keimw pahieu. Eri, ni ar kin mwekid, re kin wiahkinteieu mwekidwei, sohte mwahn kin sohpeiseli.
10 Mesen emenemen menmour pwukat me pahieu ahpw wekpeseng: mesen aramas me mi mwowe, a mesen laion me mi ni palimaun, mesen kouwol palimeing, oh mesen ikel me mi likinpaiki.
11 Emenemen menmour pwukat ahpw kapapeseng eh pehnpihr riau pwe imwin ar pehnpihr kan en doakpene, oh riau ar pehnpihr ko pwoalepene paliwararail.
12 Menmour pwukat sohpeipeseng ni keimw pahieu en sampah, kahrehda re kin pwonte mwekidwei wasa me re men kohla ie, oh sohte kin pirekek ni arail kin mwekidwei.
13 Eri, likamwete mehnser ehu me wie lullul oh mwekimwekid poatopoat nanpwungen menmour ko. Mehnsero kin lullul oh lioal kin piripirsang loale.
14 Pein menmour ko ahpw kin mwekidwei oh kin pwurodo, rasehng mwekid en lioal.
15 Ni ei uduhdiahl menmour pahmeno, I kilangada mehn kadahr pahieu me leldiong pohn pwehl; ehuehu mehn kadahr mihte limwahn emenemen menmour ko.
16 Ehuehu mehn kadahr ko inenen melengileng duwehte kisin takai kesempwal, oh koaros duwepenehte. Ehuehu mehn kadahr ko pil mie ehu mehn kadahr tohrohr loale me pangapang,
17 me kahrehda mehn kadahr ko koaros kak tangewei ong ni keimw pahieu en sampah.
18 Oh kilin mehn kadahr ko pwoaren mas tohr me wia.
19 Ni ahnsou koaros me menmour ko kin mwekid, mehn kadahr ko pil kin iang mwekid, oh ma menmour ko kin pihrda, mehn kadahr ko pil kin iang.
20 Menmour ko kin kohla wasa koaros me re mwahuki, oh mehn kadahr ko pil kin iangete, pwehki re kin mihmi pahn manaman en menmour ko.
21 Ahnsou koaros me menmour ko pahn kin mwekid, de uhdi, de pihrda, mehn kadahr ko pil kin wia soahngohte.
22 Pohnangin moangen menmour ko mie mehkot me likamwete pwalang ehu me wiawihkihda kilahs kamahl.
23 Pahn pwalango emenemen menmour ko kapapeseng pehnpihr riau kadangalahng me mi limwah, oh riau pehnpihr pwoalepene paliwere.
24 I ahpw rongada ngilen arail pehnpihr ko ni ar kin pihr. Ngihlo rasehng ngirisek en madau, ngilen karis laud ni eh kin mwekid, oh rasehng kapitien Koht, Wasa Lapalahpie. Ni ar kin uhdi sohla pihr, re kin kihpene pehrail kan,
25 ahpw ngihlo kin peipeido sangete pohnangin pwalango pohnangin moangarail kan.
26 Pohnangin pwalango mie mehkot me likamwete mwoahl ehu me wiawihkihda takai kesempwal sapair, oh mehmen me mwomwen aramas ketiket powe.
27 Eri, mwohmw wet wie lingalingdo duwehte lingaling en prons nan werengen kisiniei. Marain lingaling ehu ahpw kapilpene wasa koaros.
28 Marain lingan me rasehng lingan en ahia me kin pwarada nin depwek en keteu kan. Ih duwen met mwomwen marain lingaling me kin kasalehda me KAUN-O kin ketiket wasao.