Keriaun Pwuhken NANMWARKI KAN
Oaralap en Pwuhk wet
Keriaun Pwuhken Nanmwarki kan, iei peuspen poadopoad en wehi riau en Israel. Eri, e tepida wasa me Keieun Nanmwarki kan ididi ie. Pwuhk wet kak pwalpeseng wiahda pali riau: 1) koasoiepen wehi riau pwukat, Israel oh Suda, sang pahr 850 mwohn Krais lel ni ohlahn Sameria oh imwilahn wehin Israel ni paliepeng ni pahr 721 mwohn Krais. 2) koasoiepen wehin Suda ni palieir sang ni ohlahn wehin Israel lel ni lohdi oh ohlahn Serusalem pahn manaman en Nepukadnesar, nanmwarkien Papilonia, ni pahr 586 mwohn Krais. Pwuhk wet imwisengkihla koasoiepen Kedalaia, kepina en Suda ni mwehin mehn Papilonia kan, oh koasoiepen Sehoiakin, nanmwarkien Suda eh kasaledekla sang nan imweteng nan Papilon.
Duwen eh sansalehr sang nan Keieun Nanmwarki kan, paisuwedla pwukat wiawi pwehki en nanmwarki kan oh en mehn Israel kan ar soaloalopwoatohng Koht. Mwomwlahn Serusalem oh kalipilipalahn mehn Suda tohtohie, iei ehu irair kesempwal me sansal mehlel nan poadopoad en mehn Israel kan.
Soukohp me wadawad mehlel nan Keriaun Nanmwarki kan, iei Elisa, me wiliandi Elaisa.
Audepe ni Oaralap
Pwalpeseng en wehio 1.1—17.41
a. Soukohp Elisa 1.1—8.15
b. Nanmwarki kan en Suda oh Israel 8.16—17.4
c. Pwupwulahn Sameria 17.5-41
Wehin Suda 18.1—25.30
a. Sang Esekaia lel Sosaia 18.1—21.26
b. Mwehin Sosaia 22.1—23.30
c. Kaimwiseklahn nanmwarki kan 23.31—24.20
d. Pwupwulahn Serusalem 25.1-30
1
Elaisa oh Nanmwarki Ahasaia
1 Mwurin sipallahn Eihap, nanmwarkien Israel, wehin Mohap ahpw uhwongada Israel.
2 Ahasaia, nanmwarkien Israel, ahpw pwupwudihsang pohn palahngk en pwelengen tehnpeseo nan Sameria oh ohla mehlel. Ih eri kadarala meninkeder kei pwe re en ale kaweid rehn Paalsepup, koht en kahnimw en mehn Pilisdia Ekron, pwehn kadiarakada ma e pahn kak mwahula.
3 Ahpw tohnleng en Koht men mahsanihong Elaisa, soukohp sang Tispe, en kohla tuhwong sapwellimen Nanmwarki Ahasaia meninkeder ko oh idek rehrail, “Dahme kumwail pahn kolahng alehki kaweid rehn Paalsepup, koht en Ekron? Pwehki amwail medemedewe me sohte koht en Israel?
4 Kumwail patohwanohng nanmwarkio me KAUN-O mahsanih, ‘Ke sohte pahn mwahula; ke pahn mehla!’ ”
Elaisa eri kapwaiada me KAUN-O mahsanih,
5 meninkeder ko ahpw pwurala rehn nanmwarkio. Nanmwarkio eri keinemwe rehrail, “Dahme kumwail pwurekihdo?”
6 A re sapeng, patohwan, “Se tuhwong ohl emen me patohwan se en pwurodo oh patohwanohng komwi me KAUN-O mahsanih: ‘Dahme ke kadarkihla meninkeder kei pwe re en rapahki kaweid rehn Paalsepup, koht en Ekron? Ele pwehki omw lemeleme me sohte koht nan Israel? Omw ohla kan sohte pahn mwahula; ke pahn mehla!’ ”
7 Nanmwarkio ahpw keinemwe, “Ia mwomwen ohlen?”
8 A re sapeng, patohwan, “E likawih likou reirei ehu me wiawihkihda kilin mahn, oh kateng kilin kou.”
Nanmwarkio ahpw mahsanih, “Elaisa mwo!”
9 E ahpw ketin kadarala lapalap emen iangahki ohl limehk pwe re en wahdo Elaisa. Lapalapo diarada eh mwomwohd pohn dohl ehu oh patohwanohng, “Maing, ohlen Koht, nanmwarki ketin mahsanih komwi en ketidihla.”
10 Elaisa ahpw sapeng, patohwan, “Ma ngehi ohlen Koht emen, a kisiniei sang nanleng en kohdi oh kemeikumwailla.” Ahnsowohte kisiniei pa kohdi oh kemehla lapalapo oh ienge ko.
11 Nanmwarki pil ketin kadarala emen lapalap iangahki ohl limehk, irail kohdahla oh patohwanohng Elaisa, “Maing, ohlen Koht, nanmwarki ketin mahsanih komwi en mwadang ketidihla!”
12 A Elaisa ahpw sapeng, patohwan, “Ma ngehi ohlen Koht emen, a kisiniei sang nanleng en kohdi oh kemeikumwailla.” Ahnsowohte sapwellimen Koht kisiniei pa kohdi oh kemehla lapalapo oh ienge ko.
13 Nanmwarkio pil pwurehng kadarala lapalap emen iangahki ohl limehk. Lapalapo eri kohdahla pohn dohlo, kelehpwikihdi mwohn Elaisa, oh peki reh, “Maing, ohlen Koht, komw ketin kupwurkalahngan ong ie oh iengei kan. Komw dehr ketin kemeikitala!
14 Lapalap riemeno mehkihla kisiniei sang nanleng; ahpw komwi ketin kupwurkalahngan ong ie!”
15 Tohnleng en KAUN-O ahpw mahsanihong Elaisa, “Iang ih kohdihla, oh ke dehr masepwehk.” Elaisa eri iang lapalapo patohla rehn nanmwarkio
16 oh patohwanohng, “Iet me KAUN-O mahsanih: ‘Pwehki omw kadarala meninkeder kei pwe re en rapahki kaweid rehn Paalsepup, koht en Ekron—likamwete sohte koht nan Israel me ke en rapahki kaweid reh—omw ohla kan sohte pahn mwahula; ke pahn mehla!’ ”
17 Ahasaia eri sipalla, nin duwen me KAUN-O mahsanihong Elaisa pwehn padahkihong Ahasaia. Sohte sapwellimen Ahasaia pwutak, eri rie pwutak Soram uhd wiliandi wiahla nanmwarki ni sounpar keriaun mwehin Sehoram nein Seosopat, nanmwarkien Suda.
18 Mehkoaros me Nanmwarki Ahasaia wiadahr ntinting nan Pwuhken Poadopoad en Nanmwarki kan en Israel.