2 MAKAPI KAN
Oaralap en Pwuhk wet
Keriaun Pwuken Makapi kan iei kamwot en pwuhk limau en poadopoad me Sason mehn Sairini ntingihedi. Pwuhk wet audaudkihda wiewia kan nan poadopoad en mehn Suhs ako sang ni ahnsou me Onias Kesilimen wia Samworo Lapalap (kereniong pahr 180 mwohn Krais.) lel ni ahnsou me Nikanor mehla (161 mwohn Krais) oh ahnsou ehu erein mwekid kan me koasoiepe wiawi nan ire laud kan en tepin Keieun Pwuken Makapi kan. Me sansal met iei duwen loalopwoat ong Kosonnedo, oh en Koht eh kin ketin katingih irail kan me kin mehkihla ar pwoson.
Audepe ni Oaralap
Kisinlikou kan ong mehn Suhs en Isip oh tepin pwuhk wet 1.1— 2.32
Mwekid kan ong lengileng en samworo lapalap 3.1—4.50
Antaiokus Epipanihs oh kalokolok en mehn Suhs akan 5.1—7.42
En Sudas eh powehdi kan 8.1—15.39
1
Kisinlikou ong mehn Suhs kan nan Isip
1 “Rahnmwahu ong riat mehn Suhs kan nan Isip sang mehn Suhs kan en Serusalem oh Sudia.
2 “Koht en ketin kupwurei kumwail oh kupwukupwure sapwellime inou me e ketin wiahiong sapwellime ladu loalopwoat Eipraam, Aisek, oh Seikop.
3 En ketin kadirehkinkumwailla ineng en pwongih ih oh ineng en kapwaiada kupwure ni mohngiongimwail oh ni kapehdamwail unsek.
4 En ketin kamarainih kumwail pwe kumwail en kak wehwehki sapwellime Kosonnedo oh sapwellime koasoandi kan. En ketikihong kumwail meleilei oh popohl,
5 oh en ketin karonge amwail pekipek kan, ketin mahkikihong kumwail dipamwail kan, oh dehr likidmelieikumwailla ni ahnsou apwal akan.
6 Se wie kapakapkin kumwail met nan Sudia.
7 “Ni pahr 169, ni mwehin Demihtrius Keriemen, nanmwarkien Siria, kiht mehn Suhs akan ntingkiwohngkumwailehr oh padahkihong kumwail duwen kalokolok oh kahpwal laud me lelohng kiht, mwurin Sason eh uhwong oh wiahda moromor nan sahpw sarawi wet.
8 Sason oh ienge ko isikada ewen kelen Tehnpas Sarawio oh kemehla aramas mwakelekel kei. Eri, se patohwan sohpeiongehr oh kapakapohng Kaun-o oh e ketin kupwureikitalahr. Se patohwan wiahiongehr at meirong en mahn akan, meirong en wahnsahpw, isikadahr lamp akan en nan Tehnpas Sarawio, oh kidahr pilawa sarawi kan.
9 Ihme se katamankin kumwail oh koangngoangehkin kumwail pwe kumwail en kin wia nan sounpwong en Kislep sarawi me duwehte Sarawien Impwal kan. Ntingdier ni pahr 188.”
KISINLIKOU EHU ONG ARISTOPULUS
Pwoulahn Nanmwarki Antaiokus
10 “Popohl oh rahnmwahu sang mehn Suhs en Serusalem oh Sudia, pwihnen wiekupwur en mehn Suhs, oh Sudas, ong Aristopulus, me kadaudok en samworo kan oh sounkaweid en Nanmwarki Tolemi, oh ong mehn Suhs kan nan Isip.
11 “Se patohwan kapingkalahngankihong Koht eh doareikitasang nan apwal laud. Se duwehte aramas me onopadahr en mahweniong nanmwarki men,
12 ahpw Koht ketin mahwenkin kiht oh ketin koakoahsang imwintihtio nan atail kahnimw sarawi wet.
13 Ahnsou me Nanmwarki Antaiokus lel Persia, likamwete me apwal sapwellime kariso en lohdi, ahpw re lohdi nan tehnpas en koht lih Namea pwehki widing en samworo kan en arail kohto.
14 Nanmwarki Antaiokus iangahki sapwellime sounkaweid likilik kei ketilahng nan tehnpaso pwe en likendkihda koht liho, ahpw ni mehlel e ketila pwe en ketikihsang dipwisou kesempwal kan en nan tehnpaso oh wiahkihla eh mehn kisakis en kapwopwoud.
15 Ahnsou me samworo ko kapwarehda dipwisou ko, ih oh ekei sapwellime ohl ako ahpw ketilong nan tehnpaso pwe re en ketikihda dipwisou ko, ahpw samworo ko ritingedi wehnimw ko ni eh ketier loale
16 re ahpw katehki takai ih oh ienge ko sang ni wenihmw rir kei me mi nan pwelengen tehnpaso. Irail eri pelepeseng kahleparail ko oh kesehieila moangarail ko rehn aramas akan me mihmi likin tehnpaso.
17 Kapinga Koht pwehki eh ketin kaloke soangen aramas suwed pwuko! Kapinga ih kohkohlahte!
Kisiniei Kasohrehla en Nehmaia eh Meirong
18 “Ni kerieisek limau en sounpwong Kislep, se pahn wia Kasarawi Sapahl duwehte at wiahier Sarawien Impwal kan. Se pil lemehda se en katamankin kumwail met, pwe kumwail en pil wia sarawi wet. Iei duwen amwail pahn katamanda duwen kisiniei eh pwarada ahnsou me Nehmaia wia meirongo mwurin eh onehda sapahl Tehnpas Sarawio oh pei sarawio.
19 Ni ahnsou me atail pahpa kahlap ako kalipilipalahng Persia, samworo poadidi kei ahpw ale kisinieio sang pohn pei sarawio oh ekihla nan kepin dengk madekeng ehu. Re ekihla mwahu kisinieio kahrehda sohte emen me diarada.
20 Mwurin sounpar tohto, Koht ahpw kupwurehda pwe nanmwarki lapalap en Persia en kapwurehla Nehmaia Serusalem, Nehmaia ahpw ndaiong kadaudok en samworo ko me ekihla kisinieio re en rapahkihda kisinieio. Irail ahpw padahkihong kiht me re sohte diar kisinieio, pwe ihte soangen pihl toantoal ehu me re diar. Nehmaia eri ndaiong irail re en deukada oh wadohng.
21 Ni mehn meirong ko eh pwilidiong pohn pei sarawio, Nehmaia ahpw ndaiong irail re en wudekihdiong pihl toantoalo pohn tuhke ko oh meirong ko.
22 Ni mepwukat eh wiawiher, oh mwurin ahnsou kis ketipin ahpw pwerieisang nan depwek, oh mehkoaros me mi pohn pei sarawio pa mwadengete lulluda. Aramas koaros ahpw pwuriamweikihla.
23 Eri, nindokon meirongo eh wie lullul, Samworo Lapalap Sonadan ahpw kapakap, Nehmaia oh aramas koaros ahpw kin sapeng.
En Nehmaia eh Kapakap
24 “Iet duwen en Nehmaia eh kapakapo: ‘Maing Koht, Sounwiepen mehkoaros, komwi me uhdahn lemmwin oh roson, ahpw kupwurkalahngan oh pwung. Komwihte kelehpw me nanmwarki;
25 komwihte kelehpw me kupwur kadek oh pwung. Komwi me roson lapalahpie oh soutuk, soundoarepen Israel sang apwal koaros. Komwi ketin piladahr at pahpa kahlap ako en wiahla sapwellimomwi.
26 Komwi ketikihda meirong wet me se patohwandahng komwi ni mwaren mehn Israel koaros; komw ketin sinsile sapwellimomwi aramas pwukat oh ketin kasarawihirailla.
27 Komwi ketin kasaledekala irail kan me mihmi nan mour en lidu nan wehin liki kan oh ketikipene at tungoal aramas akan me mwarahkpesengier nan wehi teikan en sampah. Komwi ketin kupwure at tungoal aramas akan me mwamwahllahr oh wiakaulahr, pwe wehi teikan en ese me komwi me at Koht.
28 Komwi ketin kaloke aramas lemei oh aklapalap akan me kahpwalihkitalahr,
29 oh ketin koasoanehdi sapwellimomwi aramas akan nan sapwellimomwi sahpw sarawi wet, nin duwen me Moses patohwanehr me komwi pahn ketin wia.’
Nanmwarki Lapalap en Persia Karongehda duwen Kisinieio
30 “Samworo ko eri koul.
31 Ni meirong ko ar sohralahr, Nehmaia ahpw koasoanehdi pwe pihl toantoalo en wudekdiong pohn takai kalaimwun kei.
32 Takai ko pa pil mwadangete lulluda, ahpw mpwulen kisiniei ehu lulluda pohn pei sarawio oh kakunla me mi pohn takai ko.
33 “Rongen dahme wiawiher ahpw lelpeseng wasa koaros. Nanmwarki lapalapo karongehda me mie pihl toantoal ehu dierekda wasa me samworo ko ekihla ie kisiniei sang pohn pei sarawio, mwohn ar kalipilipala. E pil karonge me Nehmaia oh ienge kan kin doadoahngki pihl wet mehn isikada meirong kan.
34 Ni nanmwarki lapalap eh rapahki ire oh diarada me mehlel pwoat, e ahpw kelepene wasao oh wiahkihla wasa sarawi.
35 Wasao eri wiahla wasahn kapedolong reh mwohni, e ahpw kin wiahki mwohni ko mehn kisekise irail kan me keniken pah.
36 Nehmaia oh ienge ko ahpw kihong eden pihlo nepdahr, me wehwehki ‘kamwakel,’ ahpw aramas tohto kin kahdaneki ‘nahpda.’