Nein Pohl Kisinlikou ong Mehn
ROM
Oaralap en kisinlikou wet
Nein Pohl Kisinlikou ong Mehn Rom ntingdier pwe en kaunopada tohn mwomwohdiso kan en Rom ong Pohl me koasoakoasoane en pas rehrail. E koasoanehdi en wia doadoahk nanpwungen souleng kan en Rom ekis ahnsou, oh mwuhr e ahpw pahn douluhllahng Spein ma re pahn sewese. E ntingihedi pwuhk wet pwe en kawehwehda duwen eh lamalam ong pwoson en souleng oh ong wiewia kan me pahn kin pwilisang ni pwoson wet ong ni mouren souleng. Kisinlikou wet me keieu audapan nan nein Pohl kisinlikou kan.
Pohl rahnmwahu ong tohn mwomwohdiso en Rom oh kasalehiong irail duwen eh kin kapakapkin irail; eri, e ahpw oaralapihada audepen kisinlikou kiset: “Rongamwahwo kin kasalehda duwen Koht eh kin ketin kupwurehda pwe aramas en pwungla reh; eri, met pwehki ar pwoson, sang nin tapi lel ni imwi.” (1.17)
Pohl eri kawehwehda oaralap wet. Aramas koaros, mehn Suhs oh mehn liki kan, uhdahn anahne pwungla mwohn silangin Koht, pwehki koaruhsie mihmi pahn manaman en dihp. Aramas akan kin pwungla rehn Koht pwehki ar pwoson Sises Krais. Mwuhr, Pohl ahpw kawehwehda mour kapw rehn Krais, me kin pwilisang ni aramas eh kin pwungla rehn Koht. Me kin pwoson Krais ahnekiher popohl rehn Koht, oh Ngenen Koht ketin kamaiaudahsangehr pahn manaman en dihp oh mehla. Pohl pil koasoia nan ire laud 5-8 kahrepen Kosonned en Koht, oh pil duwen manaman en Ngenen Koht nan mouren souleng. Mwuhr, Pohl pil kihda eh lamalam duwen mehn Suhs oh mehn liki kan ar kak soanamwahupene nan koasoandien Koht ong tohn sampah kan. E ahpw kaimwisekala eh koasoi duwen met ni eh koasoia me en mehn Suhs akan soikala Sises, iei kisehn koasoandien Koht pwe en kadokepene aramas koaros nan sapwellime kalahngan rehn Sises Krais; oh e lemeleme me mehn Suhs akan sohte pahn soikala Sises kohkohlahte. Eri, ni imwi, Pohl ahpw koasoia duwen mouren souleng, ahpw ni mehlel duwen arail limpoakpene, e pil koasoia duwen papah Koht, duwen pwukoahn souleng kan ong wehi, oh duwen ar pwukoa nanpwungarail, oh pil duwen ire kei me pidada kadeikpen loale. E ahpw kaimwisengkihla kisinlikou kiset eh rahnmwahu ong kompoakepah kan wasao oh mahsen en kapinga Koht.
Audepe ni Oaralap
Kapehse oh oaralap en kisinlikou wet 1.1-17
En aramas anahn en komourla 1.18—3.20
Sapwellimen Koht koasoandi ong komourlahn aramas 3.21—4.25
Mour kapw rehn Krais 5.1—8.39
Israel nan sapwellimen Koht koasoandi 9.1—11.36
Mwomwen mour en souleng 12.1—15.13 Kaimwiseklahn koasoi oh en Pohl rahnmwahu kan
15.14—16.27
1
1 Sang Pohl ladun Krais Sises oh wahnpoaron me Koht ketin piladahr oh malipeier pwe en kalohkiseli sapwellime Rongamwahu.
2 Rongamwahu me Koht ketin inoukihongehr sapwellime soukohp ako mahsie pwe re en padahkihong aramas, oh me ntingdier nan Pwuhk Sarawi.
3 Rongamwahu wet iei duwen Sapwellime Iehros, atail Kaun Sises Krais, me nin duwen eh wia aramas, e kisehn kadaudok en Depit,
4 oh nin duwen eh Koht, e sansal me iei ih Sapwellimen Koht Iehros pwehki Koht ketin kaiasahkihda sang mehla sapwellime roson lapalap.
5 Eri, Koht ketikihong ie kalahngan wet sang rehn Krais oh pil pwehki Krais, I en wiahla wahnpoaron men, pwe I en kahluwadohng wehi kan koaros nan mouren pwoson oh peik.
6 Met pil iangahki kumwail kan me mihmi Rom; Koht pil ketin malipeikumwailehr pwe kumwail en wiahla sapwellimen Sises Krais.
7 Eri, ihme I ntingkiwohng kumwail mehn Rom, me Koht kin ketin loalloale oh pil malipe pwe kumwail en wiahla sapwellime:
Samatail Koht oh atail Kaun Sises Krais en ketikihong kumwail kalahngan oh popohl.
Kapakap en Kapingkalahngan
8 Mwohn mehkoaros I kin kapingkihong ei Koht rehn Sises Krais pwehki kumwail koaros; pwehki amwail pwoson eh kalohkselier wasa koaros nin sampah.
9 Eri, Koht me I kin papah sang nan mohngiongi unsek ni ei kin lohkiseli Rongamwahu duwen Sapwellime Iehros, iei ih me sounkadehde mehlel en ei koasoiet. Koht ketin mwahngih me I kin tamataman kumwail
10 ahnsou koaros nan ei kapakap akan. I kin peki rehn Koht en ketin kupwurkalahngan, kamangaiong ie I en kak pas rehmwail ahnsou wet.
11 Pwe I kin anahne mehlel I en pwarowohng rehmwail, pwe I en kak kihong kumwail kapai ehu ong pali ngehn mehn kakehlakai kumwail.
12 Eri, met wehwehki me kitail pahn sawaspene, amwail pwoson en sewese ie, oh ei pwoson en sewesei kumwail.
13 Eri, riei ko, I men kumwail en ese me ahnsou tohto I kin kaukaunop I en pas rehmwail, ahpw mie mehkot me kin kalap kerempwa ie I en pwarowei rehmwail. I men ei doadoahk en wahnpoaron en pil wa mwahu rehmwail duwehte rehn mehn liki teikan.
14 Pwehki mie ei pwukoa ong aramas akan koaros, ong me marainlahr oh pil ong me rotorot akan, ong me loalokong oh me lampwon kan.
15 Ihme kahrehda I pil inengieng lohki Rongamwahu ong kumwail me kin koukousoan Rom.
Manaman en Rongamwahu
16 I uhdahn koapworopworki mehlel Rongamwahwo; pwe ih manaman en Koht me kin komourala koaros me kin pwoson, mehn Suhs mahs, oh pil mehn liki kan.
17 Pwehki Rongamwahwo kin kasalehda duwen Koht eh kin ketin kupwurehda pwe aramas en pwungla reh; eri, met pwehki ar pwoson sang nin tapi lel ni imwi. Nin duwen Pwuhk Sarawi eh mahsanih, “Me pwungla rehn Koht pwehki pwoson pahn mourla.”
Dipen Aramas akan
18 Eri, engieng en Koht kin sansalda sang nanleng pwehki soangen dihp oh pil soangen suwed koaros en aramas akan, me arail wiewia suwed kan kin keremwpwehsang aramas akan en esehla me mehlelo.
19 Koht kin ketin kaloke irail, pwehki soahng kan me re kak esehki duwen Koht eh sansal ong irail, pwe pein Koht ketin kasalehiong irail.
20 Sang ni ahnsou me Koht ketin kapikada sampah, aramas kak dehdehki me ih uhdahn Koht mehlel oh sapwellime manaman me poatopoat. Mepwukat me sansal mwahu sang ni wiepen nin lime kan. Kahrehda aramas pwukat sohte kak peikidki ar wiewia kan!
21 Eri, re ese duwen Koht, ahpw re sohte kin wauneki nin duwen me konehng, re pil sohte kin kapingkalahngohng. Ahpw re kin audaudkihla lamalam mwahl me sohte katepe; solahr kisin marain kis nan mohngiongirail, e diren rotorot.
22 Re kin kose me re me loalokong, ahpw pweipwei kei irail.
23 Re sohte kin kaudokiong Koht me uhdahn soutuk, ahpw re kin kaudokiong dikedik en eni kan me wiawihda ni mwomwen aramas me kak sohrala, de ni mwomwen menpihr, de mahn kerep, de mahn limwahdek.
24 Pwehki soangen aramas pweipwei pwukat, Koht ketin mweidohng irail en kin wia soangen wiewia kasaut kan me mohngiongirail kan kin inengieng; irail eri kin wiewia soahng kasaut kan nanpwungarail.
25 Re kin kawiliankihda likamw mehlel en Koht. Re sohte kin pwongih oh papah Koht, Sounkapikada mehkoaros, me aramas akan en kin kapinga kohkohlahte; ahpw re kin pwongih oh papah wiepen nin lime kan.
26 Pwehki ar kin wia soahng pwukat, Koht ketin mweidiraillahng nan ineng kanamenek kei. Lih akan solahr inengieng ohl, ahpw re kin pein kalel nanpwungarail.
27 Pil duwehte ohl akan, re kin pwilikihdi arail inengieng lih, re ahpw kin pein kalel nanpwungarail. Ohl akan kin wiapene soahng kanamenek kan nanpwungarail; oh ni imwilah re pahn ale kalokaparail me konehng arail wiewia suwed kan.
28 Pwehki aramas akan ar kahngalahr medemedewe duwen mehlel en Koht, e ahpw ketin mweidohng arail madamadau kan en sapwungala, ihme re kin wiahkihda soahng kan me sohte konehng.
29 Re kin direkihla soangen suwed oh mwersuwed koaros, oh pil noahrok oh sempoak. Re kin diren peirin, kamaramas, pei, widing, oh lamalam oh ineng en kuwehla meteikan. Re kin pilipilen pahn mweli,
30 oh kinehda likamw suwed ong meteikan; re kailongki Koht, re kin kahng kopwungloal, re kin aklapalap oh pohnmwahso. Re kin medemedewe re en kalaudehla ar wiewia suwed kan. Re sohte kin peikiong ar pahpa oh nohno.
31 Sohte ar mehn pepehm; inou soupwei, oh re sohte kin poakohng de kadekohng meteikan.
32 Re ese me sapwellimen Koht kosonned mahsanih me aramas akan me kin momour nan soangen mour wet uhdahn pahn mehla. Eri soh, pwe re wiewiahte soahng pwukat, oh pil kin pwungki irail kan me kin iang wia soahng pwukat.