Nein Pohl Kisinlikou Keieu ong Timoty
Oaralap en Kisinlikou wet
Timoty, souleng pwulopwul men sang Eisia Tikitik. Eh nohno mehn Suhs, oh eh pahpa mehn Krihs. Timoty wiahla werek en Pohl oh sawasepe nan eh doadoahk en Rongamwahu. Eri, nein Pohl Kisinlikou Keieu ong Timoty audaudkidahr ire siluh me Pohl kin pwunopwunodki. Mwohn mehkoaros kisinlikou kiset mihmi ni kehkehlik ehu me uhwong padahk likamw nan mwomwohdiso. Soangen padahk wet me pid duwen doalpenehn lamalam en mehn Suhs oh mehn liki, me kin kahski dene sampah wet me suwed, oh dene aramas kakete alehdi mour soutuk sangete ni marain rir ehu oh sang ni tiahk en mweisang soangen kisin tungoal kei oh sang pwopwoud. Pil mie nan kisinlikou kiset soangen padahk kei duwen epwelpen mwomwohdiso oh duwen kaudok, pil duwen soangen aramas me konehng kaweid oh sewese mwomwohdiso. Ni imwilah, Pohl kaweidki Timoty duwen eh pahn wiahla ladu mehlel en Krais oh duwen pwukoa kan me mie reh ong soangesoangen pwihnen souleng kan.
Audepe ni Oaralap
Tepin kisinlikou 1.1-2
Kaweid me pid mwomwohdiso oh duwen soundoadoahk kan 1.3—3.16
Kaweid ong Timoty duwen eh doadoahk 4.1—6.21
1
1 Sang Pohl, wahnpoaron en Sises Krais sang ni poaron en Koht atail Sounkomour oh Krais Sises atail koapworopwor—
2 Ong Timoty, nei pwutak mehlel nan pwoson:
Koht Samatail oh Krais Sises atail Kaun en ketin kupwureiuk oh ketikihong uhk kalahngan, mahk, oh popohl.
Kehkehlik me Uhwong Padahk Likamw akan
3 I men ke en mihmi Episos, nin duwen ei kehkehlingkihonguhkehr ni ei seiloakwohng Masedonia. Pwe mie aramas ekei me mi wasahn me kin wiewia padahk likamw ekei. Eri, padahkihong irail re en tokedihsang.
4 Padahkihong irail re en mweisang poadopoad akan oh ireirekdohn eden mehn mahs ako, pwehki soahng pwukat kin kahrehda akamai; oh re sohte kin wia mehn kamwahu ong sapwellimen Koht koasoandi kan me sansalda sang ni pwoson.
5 Kahrepen padahk wet pwe en arihada limpoak me kin pwilisang ni mohngiong mwakelekel, sang ni kadeikpen loale mwahu, oh pil sang ni pwoson mehlel.
6 Mie aramas ekei me sohpeisangehr mepwukat oh sapwungkilahr ar koasoakoasoipene mwahl akan.
7 Re kin men wiahla sounpadahk en sapwellimen Koht kosonned, ahpw re sohte wehwehki dahme re kin pein nda, de sohte wehwehki mehkan me re kin koasoia oh koapworopworki.
8 Eri, kitail eseier me Kosonned en Moses me inenen mwahu mehlel, ma aramas pahn doadoahngki nin duwen kahrepe me e wiawihkidahr.
9 Mehlel, kitail en tamanda me kosonned akan kin wiawihda, kaidehn ong aramas mwahu kan, ahpw ong irail kan me kin kalap kauwehla kosonned kan oh wia me suwed kan, ong irail kan me sohte masak Koht oh me dipan akan, ong aramas rotorot akan oh me sohte poadidi kan, ong irail kan me kin kemehla samarail de inarail kan, ong sounkam aramas akan,
10 ong me kin nenek, ong me kin wiewia pwopwoud en ohl, ong aramas en kul kan, ong irail kan me likamw oh me kin wia kadehde likamw, oh pil ong irail kan me kin wia mehkot me kin uhwong padahk mehlel.
11 Iei ih padahk me dierekdahr sang nan rongamwahu me likilikpe wiawihong ie pwe I en kasalehda, iei ih Rongamwahu lingan me pekederdo sang rehn Koht kalahngan.
Kaping Sapahl pwehki Kalahngan en Koht
12 Eri, I kin kapingkalahngan ong Krais Sises atail Kaun, me ketikihong ie kakehlepen ei doadoahk. I kapingkalahngankihong eh ketin kupwurehda me ngehi me warohng, oh ketin idihiehda pwe I en papah,
13 mehnda ma I lahlahwe mahso, oh pil kaloke oh kauwe. Ahpw Koht ketin mahkikihong ie pwehki ei saikinte pwoson me kahrehiong ie ei sehse dahme I wiewia.
14 Oh atail Kaun ketin kapwildohng pohi reken sapwellime kalahngan poatopoat, oh pil ketikihong ie pwoson oh limpoak me kitail ahnekipene ni atail miniminiong Krais Sises.
15 Eri, met koasoi mehlel pwoat, me kitail en ale unsek oh kamehlele: me Krais Sises ketido nin sampah pwe en komourala me dipan akan. I suwedsang irail koaros;
16 ahpw pwehki iei kahrepe wette me Koht ketin mahkikihong ie, pwe I en kak kasalehda uwen laud en Krais Sises eh ketin kanengamahiong ie. Mehnda ma I suwedsang me dipan akan koaros ahpw I en wiahla mehn kahlemengih ehu ong koaros me pahn pwoson Krais mwuhr oh ale mour soutuk.
17 Eri, ong Koht metehmen, Nanmwarki poatopoat, me sohte kak pwoula, oh me sohte sansal—lingan oh wahu en kowohng sang met oh pil kohkohlahte! Amen.
18 Timoty, nei seri, I likihong uhk kaweid wet nin duwen mahsen en kokohp me wiawihkin uhk mahso. Mahsen pwukat en wia omw tehtehn pei pwe ke en pei mwahu;
19 oh ke en kolokol omw pwoson oh kadeikpen loalomw en mwakelekel. Pwe mie aramas ekei me sohte kin dukiong kadeikpen loalarail, ahpw keselahr arail pwoson.
20 Iet riemen irail: Imenius oh Aleksander, me I mweidohng ira pahn manaman en Sehdan pwe ira en padahngki duwen ara solahr pahn lahlahwe Koht.