Pwuhken SEKARAIA
Oaralap en Pwuhk wet
Pwuhken Sekaraia pwalpeseng wiahda pali riau: 1) Ire laud 1-8: En Sekaraia eh kokohp kan me e wie kokohpki nanpwungen pahr 520 lel 518 mwohn Krais. Pali laud en kokohp pwukat mihmi ni mwomwen kaudiahl, oh re pid onohnsapahl en Serusalem oh Tehnpas Sarawio, kamwakelpen sapwellimen Koht aramas akan, oh mwehin Mesaia me pahn kohdo. 2) Ire laud 9-14 wia mahsen en kokohp kei sang ahnsou kei mwuhr, iren mwehin Mesaia oh pil ahnsoun kadeik ni imwin kawa.
Audepe ni Oaralap
Mahsen en kehkehlik oh koapworopwor 1.1—8.23
Kadeik ong wehi kan me karanih Israel 9.1-8
Kapai oh popohl en ahnsou kohkohdo 9.9—14.21
1
KAUN-O ketin Malipe Sapwellime Aramas akan pwe re en Pwurodo Reh
1 Ni kawaluhn sounpwong en keriaun sounpar me Darius wiewiahki nanmwarkien Persia, KAUN-O ketikihong mahsen wet ong soukohp Sekaraia, nein Perekaia oh e pahpa kahlapki Iddo.
2 KAUN-O, Wasa Lapalap, mahsanihong Sekaraia en patohwanohng aramas akan, “Ngehi, KAUN-O, engiengdahr pahn amwail pahpa kahlap ako,
3 ahpw met I mahsanihong kumwail, ‘Kumwail pwurodo rehi, oh I pahn sapahlwohng rehmwail.
4 Kumwail dehr duwehte amwail pahpa kahlap ako. Soukohp ko kihongirailehr ei mahsen kawao; re ndaiong irail en dehr pwurehng nan ar mour suwed oh dipan. Ahpw re sohte men rong ie de peikiong ie.
5 Amwail pahpa kahlap ako oh soukohp pwuko melahr.
6 I ketikihong nei ladu soukohp ko ei kosonned oh kehkehlik kan pwe re en padahkihong amwail pahpa kahlap ako, ahpw re soikala oh lokolongki ar soikala. Mwuhr, re ahpw koluhla oh pohnesehla me ngehi, KAUN-O, Wasa Lapalap, ketin kaloke irail nin duwen me konehng irail oh nin duwen me I koasoanedier.’ ”
Kaudiahl en Oahs ekei ong Soukohpo
7 Ni sounpar keriau me Darius wiewiahki nanmwarki lapalap, ni rahn kerieisek pahieu en sounpwong kaeisek ehu (sounpwong en Sepat), KAUN-O ketikihong ie mahsen ehu ni kaudiahl ehu nipwong.
8 I kilangada tohnleng en KAUN-O men eh dake oahs weitahta men. E ahpw uhdi limwahn tuhke mirtel kei nan wahu ehu, oh pil mie oahs ekei mwuri, me poh weitahta, pohn pwehl, oh pwetepwet.
9 I ahpw kalelapak reh, “Maing, ia wehwehn oahs pwukat?”
E ahpw sapengkin ie, “I pahn kasalehiong uhk ia wehwe.
10 KAUN-O ketin kadariraillahr pwe re en kohla oh dawih sampah.”
11 Re ahpw pakairkihong tohnlengo, “Se pwarekehr wasa koaros nin sampah oh diaradahr me sampah pwon sohte sawasepe oh meleilei.”
12 Tohnlengo ahpw patohwan, “Maing, KAUN, Wasa Lapalap, komwi engiengdahr pahn Serusalem oh pahn kahnimw kan en Suda erein sounparehr isihsek met. Ia erein omwi pahn wie engieng pahrail sohte kasalehiong irail omwi kupwurkalahngan?”
13 KAUN-O eri ketin sapengki tohnlengo mahsen en koaloalamwahu kei,
14 oh tohnlengo ahpw patohwanohng ie I en kalohkihda dahme KAUN-O ketin mahsanih: “I loalloale mehlel Serusalem, ei kahnimw sarawio,
15 oh I inenen engieng pahn wehi kan me nsensenamwahuki meleilei oh onepek mwahu. Kisin ahnsou kis me I pahn kanengamahiong ei engieng pahn nei aramas akan, wehi pwuko kalaudehla lokolok en nei aramas akan.
16 Eri, I sapahldohr Serusalem pwe I en kasalehda ei kupwurkalahngan ong kahnimwo. Ei Tehnpas Sarawio oh kahnimwo pahn onohnda sapahl.”
17 Tohnlengo pil patohwanohng ie I en kalohkihda: “KAUN-O, Wasa Lapalap, ketin mahsanih me sapwellime kahnimw kan pahn pwurehng ar pai oh e pahn ketin pwurehng sewese Serusalem oh wiahkihla kahnimwo uhdahn sapwellime.”
Kaudiahl en Kod kei
18 Nan ehu kaudiahlo I kilang koden kou pahieu.
19 Ngehi eri kalelapak rehn tohnlengo me koasoakoasoiong ie, “Ia wehwehn kod pwukat?”
E ahpw sapengki, “Re wehwehki manaman en wehi kan me kamwarakpeseng tohn Suda, Israel, oh Serusalem.”
20 KAUN-O eri kasalehiong ie tohndoadoahk pahmen me wisik amma.
21 I ahpw kalelapak, “Dahme ohl pwukat kodohn wia?”
E ahpw sapengki, “Re kodohn kamasak oh kauwehla wehi kan me kauwehla douluhl wehin Suda oh kamwarakpeseng towe kan.”