4
Kaudiahl en Dewen Lamp
1 Tohnleng me koasoakoasoiong ieo ahpw pwurodo rehi oh kapiriehda likamwete I wie memeir.
2 E ahpw kalelapak, “Dahme ke kilikilang?”
I ahpw sapengki, “Dewen lamp ehu me wiawihkihda kohl, pwohl ehu mie powe mehn leh kohieng loale. Nan dewen lampo mie lamp isuh, ehuehu lamp ko mie wasahn wihk isuh.
3 Mie tuhke olip riapwoat limwahn dewen lampo, apwoat mi apali, a apwoat apali.”
4 Ngehi eri kalelapak rehn tohnlengo, “Maing, ia wehwehn mepwukat?”
5 E ahpw idek, “Dah, ke sehse?”
I ahpw sapeng, “Ei, maing, I sohte patohwan.”
6-14 (10b) Tohnlengo eri mahsanihong ie, “Lamp isuhwo iei silang isuh en KAUN-O, me kin mahsanih wasa koaros nin sampah.”
(11) Ngehi eri kalelapak reh, “Ia wehwehn tuhkehn olip riapwoato me mi pali riau en dewen lampo? (12) Oh ia wehwehn rahn olip riauo limwahn paip kohl riauo me lehn olipo kin kodihsang ie?”
(13) E ahpw idek rehi, “Dah, ke sehse?”
I ahpw sapeng, “Ei, maing, I sohte patohwan.”
(14) Ih eri mahsanih, “Met wehwehki ohl riemen me Koht ketin piladahr oh keiedier pwehn papah ih, Kaunen sampah pwon.”
Sapwellimen Koht Inou ong Serupapel
(6) Tohnlengo ahpw mahsanihong ie I en patohwanohng Serupapel mahsen wet sang rehn KAUN-O: “Ke pahn pweida, ahpw kaidehn sang ni kehlail en sounpei de ni pein omw kehlail, ahpw sang ni manaman en ngeni. (7) Mehn kerompw kan me pahn laud rasehng nahna kan pahn sohrala mwohmw. Ke pahn onehda sapahl Tehnpas Sarawio, oh ni omw pahn koasoanehdi keimwseklahn takaio, aramas akan pahn weriwerki, ‘Inenen kaselel, inenen kaselel!’ ”
(8) Pil ehu mahsen ong ie sang rehn KAUN-O. (9) E mahsanih, “Serupapel koasoanedier poahsoan en Tehnpas Sarawio, oh e pahn kaimwisekala doadoahk wet. Ni met eh pahn pweida, nei aramas akan ahpw pahn esehla me iei ngehi me poaroneiukewei rehrail. (10a) Re nsensuwedla pwehki kisin doadoahk tikitik me wiawihong ni Tehnpas Sarawio. Ahpw re pahn kilang Serupapel eh pahn usehlahte koadoakoadoahkih Tehnpas Sarawio, oh re pahn nsenamwahula.”