4
Ndo Pedro ko ndo Juan ste sen ngajin ni tetuanꞌan
1 Ndo Pedro ko ndo Juan xranichjeꞌe sen ni ste ntiꞌa ko tuinxin kui̱i̱ xitaana ko xi tetuanꞌan niꞌngo ko xi saduceo.
2 Tsango koñao na̱ ixi ndo Pedro ko ndo Juan stenchekuenꞌen sen ni tsixraꞌo ntiꞌa xranchi xroxechón chujni tsikenꞌen xranchi jaña xechón ndo Jesús.
3 Tjumeꞌe jeꞌe na̱ itsé na̱ sen ko sabikao na̱ sen, xraxinꞌin na̱ sen ndoꞌachjiso. Ntiꞌa kuituꞌe sen tiie meꞌe ixi nchakon meꞌe ó kóndo.
4 Ko kueya na̱ kuinꞌen na̱ chijni juako sen, ko kuitikaon na̱. Ko kain xi kuitikaon, naꞌó mil xi.
5 Ko ndúyaxin xraꞌo kain ni tetuanꞌan ni judío ko ni tjako ley neꞌe ndo Moisés ntiꞌa tjajna Jerusalén.
6 Kaxon ntiꞌa jii xi Anás, meꞌe xitaana ícha tetuanꞌan, ko xi Caifás, ko kaxon xi Juan, ko xi Alejandro, ko kain ni kichuu xitaana tetuanꞌan.
7 Tjumeꞌe kuetuanꞌan xa kuixrakua ndo Pedro ko ndo Juan. Ko bakeꞌe xa sen ngusine ko tjumeꞌe juanchangiꞌe xa sen:
―¿Ngisen kuajon juachaxin o̱ ngisen nombrée ncheꞌexinnta kain jiꞌi?
8 Ko ndo Pedro tsango chónda ndo juachaxien Espíritue ndo Dio, juateꞌe ndo ndachro ndo:
―Jaꞌanta ni tetuanꞌan tjajna ko jaꞌanta xi tachríi tjajna Israel,
9 jaꞌanta tjanchangínta xranchi koxruenꞌen naa xi niꞌe ixi tjaunnta tsonoꞌanta xranchi konꞌen jiꞌin.
10 Méxin, tinꞌennta jian ngeꞌe xrondachrja̱n ixi kainnta ni tjajna Israel tsonoꞌanta ixi xi jii ntiꞌi koxruenꞌen xa ixi juachaxien ndo Jesucristo, ndo tjajna Nazaret, ndo kuenitonta nta̱cru, ko tjumeꞌe ndo Dio juinchexechón ndo ndo.
11 Jaꞌanta juincheꞌenta xranchi ni nchekonchjian nchia kuitikaonꞌa na̱ ixro ko tjumeꞌe ikjan xro ícha jian ko tjintee tonsojixin nchijíi nchia meꞌe ndo Jesús meꞌe ti ixro kuíntuenta ti juinchekonchjiannta tjatuꞌo ko jai ikjan ndo ixro tjintee.
12 Ixi jeꞌo ndo Jesús chónda juachaxin sincheméꞌe ndo ijie̱ ko jeꞌo jeꞌe ndo tsixruaꞌan ndo Dio ngataꞌa xasintajni ixi koꞌa inaa ngisen tsitikaon na̱ ixi tsoméꞌe jíee na̱.
13 Ko xi tetuanꞌan bikon xa ixi ndo Pedro ko ndo Juan nichja sen ixi nchijíi aséen sen ko konoꞌe xa ixi sen meꞌe xranchi ngixeꞌi inaa sen ko jeꞌa ni ícha noꞌe xroon. Tjumeꞌe xronka xi ixi kuichúxin xa ixi sen meꞌe tsikajikao ndo Jesús.
14 Ko xi tsikoxrueꞌen ntiꞌa stekao sen xa. Méxin, juaꞌi tsjankataꞌa xa ijie̱ ngajin sen.
15 Ko kuetuanꞌan xa ixi ndo Pedro ko ndo Juan tsachrje sen nduja ko tjumeꞌe jeꞌo xa kuituꞌe xa ngaxinꞌin nchia juintejao kichuu xa.
16 Ko tjumeꞌe ndachro xa:
―¿Ngeꞌe sinchekuuna xi ña̱? Ixi kain ni tjajna Jerusalén bikon na̱ ixi ndo Dio bingijna ndo xi jiꞌi, meꞌe koxruenꞌen xi niꞌe ko juaꞌi xrondachrona ixi nduaxinꞌa.
17 Ko ítjaunꞌana xronichja xi jiꞌi ngajin kain na̱. Méxin, xrondachena xa íxronichjaxinꞌa xa nombrée ndo Jesús.
18 Meꞌe kuiyeꞌe xa sen íjngo ko kuetuenꞌen xa sen ixi xronichjaꞌi sen ko ítsjakoꞌa sen ixi nombrée ndo Jesús.
19 Ko tjumeꞌe ndo Pedro ko ndo Juan juateꞌe sen ko ndachro sen:
―Xraxaon jaꞌanta, ¿á xrobakeꞌe ndo Dio juaxruxin siá xrokuitikaꞌonna ngeꞌe ndachro jaꞌanta o̱ xrokuitikaꞌonna ngeꞌe tituanꞌan jeꞌe ndo?
20 Ko janꞌanna juaꞌi tsintuꞌana xronichjana ngeꞌe bikona ko ngeꞌe kuinꞌanna.
21 Ko tjumeꞌe jeꞌe na̱ kuyakutee na̱ sen ko kuintuꞌe na̱ sen sakjui sen ixi kuitjaꞌi na̱ xranchi chao xrobikaon sen ixi kain ni tjajna ntiꞌa tajon na̱ juasaya ngajin ndo Dio ixi ti ngeꞌe jian juincheꞌe sen.
22 Ko xi koxruenꞌen ixi juachaxien ndo Dio, xi meꞌe chónda xa ícha ixi yuu kán nano.
Sen titikaon ndo Jesús tjancheꞌe sen ndo ixi xroxrakonꞌa sen
23 Tjumeꞌe ndo Pedro ko ndo Juan ó tsikajánda na̱ sen, meꞌe ikjui sen ti tsixraꞌo kain sen chúxin sen. Ko chronga sen kain ti kuetuanꞌan xitaana tetuanꞌan ko sen tachríi tetuanꞌan.
24 Ko juexin kuinꞌen sen, meꞌe kain sen nichjeꞌe sen ndo Dio ko ndachro sen:
―Ncháina, jaꞌanta juinchekonchjiannta ngajní ko nunte xasintajni ko ndachaon ko kain ngeꞌe jii.
25 Jaꞌanta ixi Espíritue ndo Dio nichjaxinnta ngajin ndo David, ndo juincheꞌe ixra̱ ngajinnta meꞌe jaꞌin ndachro ndo:
¿Sonda toñao ko tjakaxin kain ni tjajna chuxinꞌanta?
Xroꞌan tjintee kain ti xraxaon na̱.
26 Sen rey jii nunte xasintajni ko kain ni tjajna
naakua xraka na̱ ningakonꞌen na̱ Ncháina Dio ko ndo Cristo.
27 *’Nduaxin xi Herodes, ko xi Poncio Pilato, ko ni tsikjixin ikjín, ko ni israelita tsixraꞌo tjajna ntiꞌi ixi ningakonꞌen na̱ Chjanꞌan ndo Jesús, ndo chóndaꞌi ijie̱, meꞌe ndo kuincheꞌenta tsóña ndo Mesías.
28 Jaña juincheꞌe na̱ ngeꞌe ó saꞌó tsindachronta ixi jaña xrokonda xrokonꞌen.
29 Ncháina, tsjeꞌenta ti juinchexronka na̱ sen ko tingijnanta sen ncheꞌe xráanta ixi xrochronga sen chijnianta ko xroxrakonꞌa sen.
30 Ko ixi juachaxiannta sinchexrjuenꞌen sen ni niꞌe ko sincheꞌe sen ijié ixra̱ ixi nombrée chjanꞌanta, ndo tsango tjúá, ndo Jesús.
31 Ko juexin nichjeꞌe sen ndo Dio, bengi nunte ti ste sen. Ko kain sen kuayéꞌe sen juachaxien Espíritue ndo Dio ko kuaxi sen chronga sen chijnie ndo Dio ko xrakonꞌa sen.
Sen titikaon tonchjeyeꞌe kichuu sen ti chónda sen
32 *Kain sen kuitikaon ndo Jesús naakua ngeꞌe xraxaon sen ko kain sen tonchjeyeꞌe kichuu sen ti chónda sen ko xroꞌan ngisen ndachro ixi jeꞌe sen tituanꞌan sen xrojan ngeꞌe.
33 Sen kuincheꞌe ndo Jesús ixi juachaxien ndo Dio kuachronga sen ixi xechón Ncháina Jesús ko ndo Dio ícha juinchenchaon ndo sen.
34 Ko xroꞌan sen nóa bakeꞌe ngakjenꞌen sen ixi kain sen kuachónda jngiꞌe ko ndoꞌa kuanchekji sen ko meꞌe tikaꞌo sen tomi
35 ko bakajon sen ngajin sen kuincheꞌe ndo Jesús ko jeꞌe sen bakonchjeya sen ngajin ngujngu sen xrokondeꞌe.
36 Xranchi juincheꞌe naa xi levita ndatinꞌin José. Jeꞌe xa tsiki̱ꞌxi̱n xa nunte Chipre ko sen kuincheꞌe ndo Jesús juinchekinꞌin sen xa Bernabé, meꞌe xrondachro ngisen tajon juaxruxin.
37 Jeꞌe ndo Bernabé juinchekji ndo naa ijngi kuachónda ndo ko bikaꞌo ndo tomi ngajin sen kuincheꞌe ndo Jesús.