3
Sen ncheꞌe xrée ndo Dio
1 Kichuuna, juaꞌi nichjaꞌanta xranchi sen ó chónda Espíritue ndo Dio ixi jaꞌanta xrancheꞌenta xranchi chujni nunte xasintajni. Méxin, xrokonda nichjaꞌanta xranchi sen nandá taxi chuntia ndo Cristo.
2 *Janꞌan juakoꞌanta ngeꞌe tangiꞌa ixi ndako xjan nchínchín stenta, xjan nandá tiꞌi itsjin ko juaꞌi ine xjan nio ko xrajuaꞌi tienxinnta jai
3 ixi xrancheꞌenta xranchi ncheꞌe chujni nunte xasintajni. Xratochjuyaꞌanta ngeꞌe ncheꞌe ikaxin sen ko te̱to̱kuꞌu kichuunta. ¿Á jeꞌa meꞌe xrondachro ixi jaꞌanta xrancheꞌenta xranchi ncheꞌe ni nunte xasintajni?
4 *Kaxinnta ndachronta ixi ruaꞌnaninta janꞌan Pablo, ko ikaxinnta ndachronta ixi rueꞌénta ndo Apolos. Jaña xraxaonnta xranchi chujni nunte xasintajni.
5 ¿Ngisen ndo Pablo ko ngisen ndo Apolos? Janꞌanna jeꞌo ntaꞌana xrée ndo Dio ixi juakoꞌananta ko kuitikaonnta Ncháina. Ngujnguna jeꞌo juintaꞌana ngeꞌe kuetuanna̱na ndo Dio.
6 *Janꞌan kuenga tse̱e̱ chijnie ndo Jesucristo, ko ndo Apolos xranchi ngisen tikitée inda tse̱e̱, meꞌe juako ndo xranchi xrochuntianta ndo Dio ko jeꞌo jeꞌe ndo Dio tajon ndo juachaxin tsangi ika, meꞌe xrondachro ícha tsitikaonnta ndo.
7 Méxin, ngisen tenga ko ngisen tikitée inda, jeꞌo juincheꞌe sen xra̱; jeꞌo ndo Dio tajon ndo juachaxin tsangi ka.
8 Sen tenga ko sen tikitée inda xrajeꞌo tjintee sen, ko ndo Dio tsjengeꞌe ndo sen ꞌna̱ ixi ixra̱ juincheꞌe sen.
9 Méxin, janꞌan ko ndo Apolos jeꞌo ntaꞌana xrée ndo Dio, ko jaꞌanta stenta xranchi naa ijngi tsikinga chijnie ndo Dio, o̱ xranchi naa nchia jinchekochjian ndo.
10 Ndo Dio jian ndo, méxin, chjána ndo juachaxin ixi janꞌan tsakeꞌe xranchi naa xi tetuanꞌan xranchi sinchekonchjian sen nchia, meꞌe xrondachro ti bakée ixro saꞌó tsaxi tsiteꞌxin tjatuꞌo. Tjumeꞌe ikaxin sen kuite sen ícha ixro, ko ngujngu sen xrokonda ndako sinchekonchjian sen nchia,
11 ixi xroꞌan ngisen tsakeꞌe inaa ixro xrangíxixín nchia ixi ó jii xro saꞌó tsikaxi tsikiꞌtexin nchia, ko ixro meꞌe ndo Jesucristo.
12 Ko tjumeꞌe ngataꞌa ixro meꞌe chao tsiꞌte sen ixi chika oro ko chika plata, ixro chaxro tjintee, nta̱a̱, ka tsixema, o̱ ntaxro,
13 ko nchakon tsjexin kain ngeꞌe, ndo Dio tsjako ndo ixra̱ juincheꞌe ngujngu sen. Ko xroꞌi tsjakoxin ndo ngixeꞌi ixra̱ juincheꞌe ngujngu chujni.
14 Ko siá ti juincheꞌe sen jian, tsjacha sen naa ngeꞌe jian,
15 ko siá ti xra̱ juincheꞌe sen jeꞌa jian, tsitjáña kain xra̱ meꞌe, ko jeꞌe sen tsitjáñaꞌi sen, ixi xrokjui xranchi jeꞌe sen xrokuingeꞌe sen xroꞌi.
16 *Kain jaꞌanta, ¿á noaꞌinta ixi jaꞌanta ningue ndo Dio ko Espíritue ndo jii ngaya asáanta?
17 Ko siá xrojan ngisen tjaun sincheniꞌe ningue ndo, jeꞌe ndo Dio sinchetjáña ndo ni meꞌe, ixi ningue ndo Dio tjúá niꞌngo ko jaꞌanta meꞌe niꞌngo.
18 Jaꞌanta ncheyeꞌanta asáanta. Siá xrojannta ndachronta ngaya asáanta ixi ícha noꞌanta xranchi chujni ste nunte xasintajni, xrokonda xrokjannta xranchi naa ni noeꞌa ixi tjumeꞌe xrokjannta xranchi naa ni nduaxin ícha noꞌe.
19 Ixi ti ngeꞌe noꞌe chujni jii nunte xasintajni meꞌe xroꞌan tjintee tikon ndo Dio. Ko ndachro xroon chijnie ndo Dio tsikjin sen ó saꞌó: “Ti chujni ícha noꞌe, ko jeꞌo ti noꞌe na̱ meꞌe tsitjáñaxin na̱.”
20 Ko kaxon ndachro xroon chijnie ndo Dio: “Ncháina noꞌe ndo kain ngeꞌe xraxaon ni ndachro ícha noꞌe ko ti xraxaon na̱ xroꞌan tjintee.”
21 Méxin, nchejiéꞌa asáanta ixi ndachronta jii naa chujni ícha noꞌe, ixi kain ngeꞌe jii meꞌe tikinixinꞌanta,
22 janꞌan ndo Pablo, ndo Apolos, ndo Pedro, nunte xasintajni, ngeꞌe jichón, ti tsenꞌen ni, ngeꞌe jii jai, ko ngeꞌe tsonꞌen ícha tjumeꞌe, kain tikinixinꞌanta.
23 Ko jaꞌanta tikinixinꞌennta ndo Cristo ko ndo Cristo tikinixinꞌen ndo ndo Dio.