15
Tingijnanta ixi ícha soji tsitikaon sen kichuunta
1 Jai̱na siá ícha soji titikaonna Ncháina Jesucristo, xrokonda tsingijnana sen xrasojiꞌa titikaon ndo, ko sincheꞌana jeꞌo ti nchei̱na juaxruxin.
2 Kainna xrokonda sincheꞌena ti jian ngajin sen kichuuna, ko jaña tsingijnana sen ixi ícha xrochuntia sen Ncháina Jesucristo.
3 Ixi ndo Cristo juincheꞌa ndo jeꞌo ti juincheꞌe ndo juaxruxin. Naꞌi. Jeꞌe ndo kuitikaon ndo ngeꞌe ndachro xroon chijnie ndo Dio: “Tangi juinchenina ti nichjangíꞌe na̱ ndo Dio.”
4 Kain ngeꞌe jitaxin xroon chijnie ndo Dio tsiketaxin ixi jai̱na xrokonoi̱na ngeꞌe jian, ko xrochonꞌenna ngeꞌe tsayéꞌena, maski tangi tsoi̱na, ixi chijnie ndo Dio chjai̱na juachaxin ixi xrochondana juaxruxin.
5 Ko ndo Dio, meꞌe ndo tingijnana ko chjai̱na ndo juaxruxin, tsingijnanta ndo ixi jian tsarikuꞌunta sen kichuunta, ko tsinteenta xranchi juako ndo Cristo Jesús.
6 Ko kainna naxrajeꞌo xronichjeꞌena ndo Dio ko tsajonna juasaya ngajin ndo, Ndotée Ncháina Jesucristo.
Chijni jian tsayéꞌe ni jeꞌa judío
7 Méxin, titikaonnta ko tjueꞌé kichuunta xranchi ndo Cristo kuayaꞌanta ndo, ko jaña tsajonnta juasaya ngajin ndo Dio.
8 Janꞌan chao xrondachrja̱n ixi ndo Cristo kui̱i̱ ndo ixi tsingijna ndo ni judío ixi tsonꞌen ngeꞌe jian tsindache ndo Dio sen tachríꞌana ó saꞌó, ixi jaña tsjako ndo Cristo ixi ndo Dio jian ndo ko ncheꞌe ndo ngeꞌe tsindachro ndo.
9 Kaxon kui̱i̱ ndo ixi ni jeꞌa judío tsajon na̱ juasaya ngajin ndo Dio ixi bikonóeꞌe ndo na̱, xranchi chronga xroon chijnie ndo Dio:
Janꞌan ko chujni ste jée tjajna tsajonna juasaya ngajin ndo Dio
ko xrotsje̱na himno ngajin ndo.
10 Kaxon ndachro chijnie ndo Dio:
Jaꞌanta ti jeꞌa judíonta, takeꞌénta juaxruxin ngajin kain chujnie ndo Dio.
11 Kaxon íjngo tsindachro xroon chijnie ndo Dio:
Tájonnta juasaya ngajin Ncháina Dio kainnta, maski jeꞌa judíonta,
ko kain chujni xrotsje̱ ngajin ndo Dio.
12 Kaxon ndo Isaías tsikjin ndo:
Tsachrjenixin ndo Isaí naa ngisen
tsetuenꞌen kain ni jeꞌa judío,
ko jeꞌe na̱ tsitikaon na̱ ndo Dio,
ko meꞌe tsechón na̱ kain nchakon.
13 Ndo Dio, ndo tsajon juachaxin stechonꞌennta, xrotjáanta ndo juaxruxin ko xrochaꞌanta ixi titikaonnta ndo, ixi juachaxien Espíritue ndo xrochonꞌénnta ngeꞌe tsayeꞌenta.
14 Kichuuna, nduaxin nóna ixi jaꞌanta jiannta ko jian tienxinnta ko noꞌanta meꞌe sinchekuenꞌennta sen kichuunta.
15 Ko jaña ikjin xroon jiꞌi ixi jian tsonoꞌanta ngeꞌe sincheꞌenta ko xrotjáñaꞌinta. Jaña ntaꞌa ixi ixra̱ jiꞌi kuituanna ndo Dio sintaꞌa,
16 ko kuinchena ndo sintaꞌa xrée ndo Jesucristo, xronichja chijnie ndo Dio ngajin ni jeꞌa judío. Ixra̱ meꞌe ti tjako̱ chijni jian ixi tsayéꞌe na̱ juachaxin tsechón na̱ kain nchakon, ko jeꞌe na̱ xrokjan na̱ xranchi naa ngeꞌe jian tsayéꞌe ndo Dio ixi Espíritue ndo.
17 Janꞌan naa ngisen titikaon ndo Cristo Jesús, méxin, juaxruxin ritjén ixi ntaꞌa xrée ndo.
18 Ko juaꞌi xrondachrja̱n inaa ngeꞌe. Jeꞌo ndachrja̱n kondee juachaxin kuajon ndo Cristo kuayáꞌa̱ ixi xronichja ngajin ni jeꞌa judío chijnie ndo ixi tsitikaon na̱ ndo Dio. Ko ó kuitikaon na̱ ixi chijni juáko ko jeꞌa ixi jeꞌo ti nichja, kaxon ixi ngeꞌe jian juintaꞌa.
19 Ixi juachaxien Espíritue ndo Dio juintaꞌa itsjé ixra̱ ijié ko juintakuanꞌan na̱ chijnie ndo Cristo ixi jaña tsechónna kain nchakon. Ko juangíxin juáko tjajna Jerusalén ko kain tjajna tjenka ntiꞌa ko nguixin no Iliria.
20 Ko tjaꞌon tsjáko chijni tajon juachaxin ngajin tjajna ti xratienꞌa na̱ chijnie ndo Cristo, ixi janꞌan tjaunꞌa sintaꞌa ixra̱ ti no inaa sen ó juincheꞌe sen ixra̱.
21 Tjaꞌon sintaꞌa xranchi ndachro xroon chijnie ndo Dio:
Xrokuinꞌen ni xranaiꞌa tsikinꞌen chijnie ndo.
Ko xrokuienxin chujni, ni xratienxinꞌa chijnie ndo.
Ndo Pablo xraxaon ndo itsji ndo tjajna Roma
22 *Ó itsjé nchakon tjaꞌon xrojuasótsjaꞌanta ko xrajuaꞌi tjaso.
23 Ko jai ó juexin ixra̱ rintaꞌa nguixin ntiꞌi. Ko ó tsjé nano tjaꞌon xrojuasótsjaꞌanta,
24 méxin, xraxaꞌon tsjaso nchakon tsatsinga itsji tjajna España. Juaꞌi tsituna itsjé nchakon ngajinnta ko nóna ixi juaxruxin tsakeꞌe ixi tsikonnta, ko tjaꞌon tsingijnaninta nchakon satsjixin ntiꞌa.
25 *Ko jai satsji tjajna Jerusalén, tsikiꞌan tomi tsingijnaxin sen kichuuna ntiꞌa.
26 Ixi sen niꞌngo nunte Macedonia ko sen niꞌngo nunte Acaya juaꞌo sen tomi ixi xroxruanꞌan sen ngajin sen kichuuna, sen nóa, ste tjajna Jerusalén.
27 *Jeꞌe sen, sen jeꞌa judío, juaxruxin juincheꞌe sen jiꞌi, ixi sen judío titikaon ndo Cristo bingijna ti jeꞌe sen, sen tjajna Macedonia, ixi xrokonoꞌe sen chijnie ndo Dio ó seno. Ko jai kaxon jeꞌe sen bingijna sen ko kuajon sen ngeꞌe chónda sen ixi xrokuayéꞌe sen judío titikaon Ncháina.
28 Ko nchakon tsajon tomi ngajin sen kichuuna, tjumeꞌe janꞌan satsji tjajna España ko no ña̱ tsatsinga tsjasotsjaꞌanta.
29 Nóna ixi nchakon tsjaso ntiꞌa tjajna Roma xrontatjunta kain ngeꞌe jian juincheꞌe ndo Cristo ngaji̱n.
30 Kichuuna, tinóatáana ixi Ncháina Jesucristo ko Espíritue ndo, ti tajon juachaxin tjueꞌe kichuuna, tjancheꞌenta ndo Dio ixi tsingijnana ndo.
31 Kaxon tjancheꞌenta ndo ixi tsingijna ndo ixi xroꞌan ngeꞌe sinchena ni titikaonꞌa ndo Dio, ni jii tjajna Judea, ko tomi tikaꞌan sen kichuuna ste tjajna Jerusalén, jian tsayéꞌe sen tomi.
32 Tjumeꞌe, siá ndo Dio tjaun ndo, juaxruxin tsjaso ti stenta ko juaxruxin tsjokéena ntiꞌa.
33 Ndo Dio, ndo chjai̱na juaxruxin, tsakeꞌe ndo ngajin kainnta. Jaña tsonꞌen.