2
Ndo Dio jian nchéña ndo ijie̱ ngajin chujni
1 *Nchakon tsjankataꞌanta ijie̱ ngajin inaa chujni, jaꞌonta tsamanta ijie̱ ixi kaxon jaꞌanta ncheꞌenta ti ndakoꞌa.
2 Ó noi̱na ixi nchakon ndo Dio nchéña ndo ijie̱ ngajin ngisen sínká naa ngeꞌe, ixi ti nduaxin nchéña ndo ijie̱.
3 Ko jaꞌanta, ti tsjankataꞌanta ijie̱ ngajin ikaxin chujni, ¿á xraxaonnta chao rincheꞌenta siá naxrajeꞌo ndakoꞌa ncheꞌenta?, ko, ¿á ndo Dio xroꞌan ijie̱ sinchéña ndo ngajinnta? Jaꞌanta juaꞌi satsingeꞌenta ndo.
4 ¿Á xraxaonnta ixi xroꞌan tjintee ti ndo Dio tsango jian ndo ko takaꞌi toñao ndo ngajinnta? ¿Á noaꞌinta ixi ti jian ncheꞌe ndo ngajin chujni, jiꞌi ncheꞌe ndo ixi tsitikaonnta ndo ko tsintuꞌenta ti ndakoꞌa?
5 Ko siá rincheꞌenta ti ndakoꞌa ko ncheníeꞌa asáanta jaꞌonta ritamanta ixi ícha tangi tsintekonꞌannta. Tsi̱i̱ nchakon ndo Dio sinchéña ndo ijie̱ ngajin kain chujni ko jeꞌe ndo tsango tsoñao ndo ko tangi tsonꞌannta,
6 ixi jeꞌe ndo tsjenga ndo ꞌna̱ ngajin ngujngu chujni ti ixra̱ tsijincheꞌe na̱.
7 Ko tsajon ndo juachaxin tsechón na̱ kain nchakon, ni juée kain juachaxien ndo Dio ko juée na̱ tsechón na̱ ti jii jeꞌe ndo, ko ni ndako ko jian juincheꞌe ixra̱.
8 Ko tsoñao ndo Dio ngajin ni nchejié aséen ko ni tjaunꞌa tsitikaon ti ndako tjako ndo. Ni jiꞌi tangi tsintekonꞌen na̱ ixi ícha juaxruxin ncheꞌe na̱ ti ñaꞌi.
9 Tangi tsonꞌen kain ni juincheꞌe ngeꞌe ñaꞌi, ko ni meꞌe xrochónda na̱ itsjé juachjaon, saꞌó ni judío ko kaxon ni jeꞌa judío.
10 Ko ndo Dio tsajon ndo juachaxin ko juaxruxin ko xrochóndeꞌe ndo juasaya ngajin kain ni kuitikaon ndo, ko saꞌó ni judío ko kaxon ni jeꞌa judío.
11 Ixi ndo Dio jeꞌa jeꞌo tjueꞌe ndo kaxion chujni ixi kain na̱ naxrajeꞌo tjintee na̱.
12 Kain chujni chónda ijie̱, ko maski noeꞌa na̱ ngeꞌe tsikjin ndo Moisés, xrajeꞌo tsama na̱ ijie̱. Ko chujni kuayéꞌe ley tsikjin ndo Moisés, ko ncheꞌe na̱ ti ndakoꞌa, ley meꞌe tsóñexin na̱ ijie̱.
13 Jeꞌa jeꞌo ixi tsinꞌen na̱ ley, meꞌe xrokotjúáxin jíee na̱. Naꞌi. Xrokonda tsitikaon na̱ ngeꞌe tituanꞌan ndo Dio.
14 Kaxin ni jeꞌa judío, siá jian ncheꞌe na̱, maski chúxinꞌa na̱ ley tsiketuanꞌan ndo Dio, jeꞌo na̱ ndako tituenꞌen na̱ aséen na̱, ko noꞌe na̱ ngeꞌe jian ko ngeꞌe ndakuaꞌi jii.
15 Ixi ngeꞌe jian ncheꞌe na̱, tikonni ixi ngaya aséen na̱ jitaxin ti tituanꞌan ley ko aséen na̱ xraxaonxin na̱ á chao ste na̱ o̱ naꞌi.
16 Naa nchakon ndo Dio sinchéña ndo ijie̱ ngajin kain ti imao juincheꞌe chujni. Jiꞌi tsonꞌen ixi juachaxien Ncháina Jesucristo xranchi jitaxin chijni jian tjako̱ janꞌan.
Ni judío ko ley tsikjin ndo Moisés
17 Kaxinnta ndachronta ixi judío jaꞌanta ko xraxaonnta ixi jian titikaonnta ley kuayéꞌe ndo Moisés ko nchejié asáanta ixi chujnie ndo Dio jaꞌanta.
18 Noꞌanta ngeꞌe tjaun ndo Dio ko ixi ley noaxinnta sincheꞌenta ti jian.
19 Jaꞌanta nchejié asáanta ixi ndachronta ixi chao sinchekuenꞌennta ni ndakoꞌa ncheꞌe ko chao tsingatseꞌenta na̱ ixi tsitjáñaꞌi na̱ ti ichrji na̱ ti naxixeꞌe.
20 Ndachronta ixi noꞌanta sinchekuenꞌennta ni noeꞌa ko tsingijnanta ni tienxinꞌa ixi jaꞌanta chondanta ley chronga xranchi xroxraxaon chujni ti nduaxin.
21 Ko jaꞌanta, ¿xranchi sinchekuenꞌennta ikaxin chujni, siá jaꞌanta tangiꞌanta? ¿Xranchi tsjakoꞌenta chujni tse̱eꞌa na̱ siá jaꞌanta itsenta ti tikinixianꞌinta?
22 Ndachronta ixi juaꞌi xrochónda na̱ inaa nchri o̱ xi jeꞌa janchriꞌe o̱ ndoxiꞌe na̱, ko jaꞌanta, ¿sonda jaña ncheꞌenta? Ndachronta ixi titikaonꞌanta ídolo, ko, ¿sonda teꞌenta ngeꞌe tjintee jii ngaxinꞌin ningue ídolo?
23 Jaꞌanta nchejié asáanta ixi chuxinnta ley, ko titikaonꞌanta ngeꞌe tituanꞌan ley, ko jaña chondeꞌanta juasaya ndo Dio.
24 Ndako ndachro xroon jitaxin chijnie ndo Dio: “Kondeexin jaꞌanta ni jeꞌa judío nichjangíꞌe na̱ ndo Dio.”
25 Siá nduaxin xrokuitikaonnta ley kuayéꞌe ndo Moisés, jeꞌa xruenxon tsikaannta chjiꞌe ndo Dio. Ko titikaonꞌanta ley, meꞌe xrokjui xranchi tsikaaꞌinta chjiꞌe ndo.
26 Ko chujni tsikaꞌi chjiꞌe ndo Dio ko titikaon na̱ xranchi tituanꞌan ley, ni meꞌe xranchi ó tsikaa na̱ chjiꞌe ndo, maski nduaxinꞌa chónda na̱ chjiꞌe ndo.
27 Ko chujni kuaꞌi chjiꞌe ndo ko titikaon ley, ni meꞌe tsjankataꞌanta na̱ ijie̱ ixi jaꞌanta chuxinnta ley ko kuitikaonꞌanta, maski chondanta xroon jitaxin ley ko maski tsikaannta chjiꞌe ndo.
28 Ko jeꞌa nduaxin judío jaꞌanta jeꞌo ixi ó chondanta chjiꞌe ndo cuerpoanta xranchi ncheꞌe kain ni judío.
29 Ni nduaxin judío xrokonda xrochónda na̱ chjiꞌe ndo ngaya aséen na̱, jiꞌi naa ngeꞌe ncheꞌe Espíritue ndo Dio, ko jeꞌa jeꞌo tsitikaon na̱ ngeꞌe jitaxin xroon. Ko ni ncheꞌe jaña, nduaxin judío na̱, ko ndo Dio jii ndo juaxruxin ixi jaña ncheꞌe na̱ maski ikaxin na̱ naꞌi.