11
Yuu sen xruanꞌan ndo Dio xrochronga ngeꞌe tsonꞌen
1 Tjumeꞌe kuayáꞌa̱ naa nta̱a̱ tjatichuaxinni ko kuituanna:
―Itjia ko tjatichuꞌa ningue ndo Dio ko altar neꞌe ndo ko tsjeꞌe ngijanꞌin sen ste ntiꞌa, sen stetajon sen juasie sen ngajin ndo.
2 *Ko tjatichuaꞌia ntasien ningue ndo Dio ixi ntiꞌa tsayéꞌe ni jeꞌa tjajnée ndo Dio, ixi tsetuenꞌen na̱ tjajna Jerusalén ko xrochóndeꞌa na̱ juasaya tjajna, níi nano ko tuꞌo.
3 Janꞌan xroxruanꞌan yuu sen ncheꞌe xra̱na, tseyá sen manta tiie, xrochronga sen chijnina, chijni nduaxin, níi nano ko tuꞌo.
4 Kayui sen meꞌe xrochronga chijnina, sen meꞌe kayui nta̱a̱ olivo ko kayui candelero ste ngajin ndo Dio, ndo tetuanꞌan nunte xasintajni.
5 Ko siá xrojan chujni tjaun sincheniꞌe sen, jeꞌe sen tsantsjexin sen roꞌa sen xroꞌi, xroꞌi tsjaakaxin sen chujni tjaun sincheniꞌe sen ko tsenꞌen na̱.
6 Ko jeꞌe sen xrochónda sen juachaxin tsijeꞌe̱ sen ngajní ixi tsaniaꞌi ichrin nchakon xronichja sen chijnie ndo Dio ko xrochónda sen juachaxin ixi sinchekjan sen inda ijni̱ ko sincheniꞌe sen inche ixi itsjé ichin kain nchakon tjaun sen.
7 *Tjumeꞌe nchakon tsjexin xrochronga sen chijnina, chijni nduaxin, tjumeꞌe kuée Xixronꞌanxrée tsachrjexin ba tuye yasoꞌe ko tse̱ꞌto̱ ba ngajin sen ko tsjacha ba naatsóñaxón ba sen.
8 Ko cuerpoe sen tsitsinga ti chaoé tjajna ijié ti tsikoña na̱ Ncháina Jesús nganito nta̱cru, ko ntiꞌa nchekinꞌin na̱ Sodoma ko Egipto.
9 Ko níi nchakon ko tuꞌo, kain ni tsi̱xi̱n jée tjajna, ni nichja jée ngigua ko nación tsikonna sen tsikenꞌen sen jitsinga sen ko tsintueꞌa na̱ sen xroxrabaa sen.
10 Ko ni nunte xasintajni juaxruxin tsintee na̱ tsikon na̱ tsikenꞌen sen, ko sinchéña na̱ kia ko sincheki̱to̱nꞌen kichuu na̱ itsjé ngeꞌe ixi juaxruxin ste na̱ ixi tsikenꞌen sen, sen tsixruanꞌan ndo Dio, ixi nchakon kuintee jeꞌe sen tsango tangi kuintekatsinga na̱.
11 Ko kuatsinga kaníi nchakon ko tuꞌo, tjumeꞌe ndo Dio juinchexechón ndo kayui sen kuachronga chijnie ndo, ko bingatjen sen ko ni bikon tsango xronka na̱.
12 Ko kayui sen kuinꞌen sen séen nichja naa ngisen jii ngajní ko ndachro:
―Tajiínta ntiꞌi.
Ko jeꞌe sen kuajinꞌin sen ngajní, naa itjui̱ juinchengajinꞌin sen. Ko kain ni kuaningakonꞌen sen, bikon na̱ sen.
13 *Ko hora meꞌe tsango kontengí nunte, ko texin parte tjajna ijié chjenjin ko ya̱a̱to̱ mil chujni kuintekenꞌen na̱. Ko kain ni jichón, ni kuituꞌe, tsango xronka na̱ ko kuaxi na̱ kuitikaon na̱ ndo Dio jii ngajní ko kuajon na̱ juasie na̱ ngajin ndo.
14 Ña̱ ti konꞌen yuxin juachjaon ko tuinxin tsi̱i̱ juachjaon nínxin.
Itjao ya̱a̱tu̱xin
15 Tjumeꞌe ya̱tu̱xi̱n ángel kuanoa ndo itjao chónda ndo ko ngajní kuinꞌenni séen nichja itsjé ngisen ndachro:
Kain juachaxien nunte xasintajni tikinixinꞌen ndo Dio ko ngisen kuincheꞌe jeꞌe ndo, meꞌe ndo Cristo,
ndo tsetuanꞌan kain nchakon.
16 Ko ngujngu sen ikánoó tachríi ste ngataꞌa ntachaonꞌen sen ngajinxin ndo Dio kuisée sen ko kuajon sen juasie sen ngajin ndo Dio.
17 Ko ndachro sen:
Ncháina ndo Dio, tsango chondanta kain juachaxin.
Jaꞌanta ti ó saꞌó bakeꞌenta, ti richónnta jai
ko jaꞌanta tsjiꞌinta íjngo.
Juasianta ixi juakona̱nanta kain juachaxin chondanta
ko ó kuaxinta kuetuanꞌannta nchijíi nunte xasintajni.
18 Kain chujni ste nunte xasintajni koñao na̱,
ixi ó kui̱i̱ nchakon jaꞌanta sinchéñanta ijie̱ ngajin na̱
ko ngajin ni tsikenꞌen.
Ko nchakon meꞌe tsajonnta ngeꞌe jian ngajin sen juincheꞌe xráanta, sen kuachronga chijnianta
ko ngajin sen titikaonnta,
chujni tsango tituanꞌan ko chujni naꞌi.
Ko sinchetjáñanta ni juinchetjáña chujni bakeꞌe nunte xasintajni.
19 *Tjumeꞌe xitjeꞌe̱ nta̱chja ningue ndo Dio ti jii ngajní, ko ngaxinꞌin niꞌngo tikonni ti jitjinga ngeꞌe tsiketuanꞌan ndo Dio. Ko tsango kongíxin ko tsango juatee ko tsango kontengí nunte ko tsango kuania tuni.