15
Ya̱a̱to̱ ángel ko ya̱a̱to̱ ichin tsjexixin tsoníexin chujni
1 Bikon ngajní inaa ixra̱ ijié: ya̱a̱to̱ ndo ángel chónda ndo juachaxin ngajin ya̱a̱to̱ ichin tsoníexin chujni nunte xasintajni. Jiꞌi xrondachro tsango jitoñao ndo Dio.
2 Kaxon bikon naa ngeꞌe xranchi naa ndachaon tsikjan xranchi xroxrao tsintekjanxin ixi xroꞌi. Tjenka ntiꞌa siin sen juacha kuatsinga kain ngeꞌe juincheꞌe iku tsango chjinga jii ko ti tsikachrjeya xranchi jeꞌe ba ko kaxon número xranchi tinꞌin ba. Sen meꞌe siin sen ngataꞌa ndachaon ko stetsé sen arpa tsikajon ndo Dio ngajin sen.
3 Ko itsje̱ sen soon kuantsje ndo Moisés, ngisen juincheꞌe xrée ndo Dio, ko sóen Xjantuchjon, ndachro:
Tsango ijié ngeꞌe ncheꞌenta
ko tsango jian kain ngeꞌe tsijinchéñanta.
Jaꞌanta Nchána ndo Dio, ndo chónda kain juachaxin.
Ndako ko nduaxin chao ncheꞌenta kain ngeꞌe.
Jaꞌanta Rey tetuanꞌannta kain nchakon ngataꞌa nunte xasintajni.
4 ¿Ngisen xroxrakonꞌa ngajinnta, Nchána?
¿Ngisen tsajonꞌa juasaya ngajin jaꞌanta?
Jeꞌo jaꞌanta tsango tjúánta.
Kain ni nchijíi nunte xasintajni tsajon na̱ juasaya ngajinnta
ixi bikon na̱ kain ixra̱ jian tsiji̱ncheꞌenta.
5 Tjumeꞌe bikon ngajní ko ntiꞌa xitjeꞌe̱ niꞌngo ti jitinga ngeꞌe tsiketuanꞌan ndo Dio.
6 Ko niꞌngo kuachrjexin ya̱a̱to̱ ndo ángel tikao sen ya̱a̱to̱ ichin. Steyá ndo manta tjintee tjúá ko chaxro tóngíxin ko steteyá ndo cinta chika oro.
7 Naa sen noó stechón kuajon naa copa jitjiá vino kuayéꞌe ngujngu ya̱a̱to̱ ndo ángel, ko ya̱a̱to̱ copa meꞌe xrondachro ti toñao ndo Dio, ndo jichón kain nchakon.
8 Ko ngaxinꞌin niꞌngo kaon iꞌnchi ti ti̱ꞌxi̱n ti ijié juachaxin chónda ndo Dio ko xroꞌan ngisen chónda juachaxin tsatsinga ngaxinꞌin niꞌngo tsatsingaja ti ya̱a̱to̱ ichin tikao ti ya̱a̱to̱ ndo ángel.