5
Xroon ko Xjantuchjon
1 Tjumeꞌe bikon ngaya tja ndo ti jian, ndo jitaꞌa trono, jitsé ndo naa xroon tsikjin sen ngaya ko tuenxin ko tsikijee̱xin xroon ixi ya̱a̱to̱ sello.
2 Ko bikon naa ndo ángel chónda juachaxin ko séen tjanchangi ndo ko ndachro ndo:
―¿Ngisen chónda juachaxin tsintjian sen sello ko tsantjeꞌe xroon?
3 Ninaa ngisen jii ngajní ko nunte xasintajni ko chringi inche juaꞌi tsantjeꞌe sen xroon ko juaꞌi tsjeꞌe sen ngeꞌe ndachro xroon.
4 Ko janꞌan tsango tsjanga ixi kuichueꞌa ninaa ngisen chónda juachaxin chao xrokuantjeꞌe xroon o̱ jeꞌo xrobikon sen ngeꞌe ndachro xroon.
5 Tjumeꞌe naa sen tachríi ndachijina:
―Ítsjangaꞌia, ixi ntiꞌi jii Kujenda kuachrjenixin tjajna Judá ko kuachrjenixin ndo Rey David. Ndo meꞌe juacha ko chónda ndo juachaxin chao tsantjeꞌe ndo ko tsintjian ndo ti ya̱a̱to̱ sello chónda xroon.
6 Tjumeꞌe ngajinxin trono ko ti ste noó sen jichón ko ngusine ti ste sen tachríi, ntiꞌa siin naa ndo xrokjui xranchi Xjantuchjon, tikonni xranchi naatsikóñaxón na̱ xjan ko chónda xjan ya̱a̱to̱ nteꞌe xjan ko ya̱a̱to̱ jmakon xjan. Meꞌe xrondachro ya̱a̱to̱ Espíritue ndo Dio tsixruanꞌan ndo itsji nchijíi nunte xasintajni.
7 Ko Xjantuchjon konchjiñeꞌe xjan ti jii ndo jitaꞌa trono ko itsé xjan xroon jiá itja ndo ti jian.
8 Ko nchakon itsé xjan xroon meꞌe, ti noó sen stechón ko sen ikán no sen tachríi bakeꞌexin ntatuchiꞌin sen ti jii tutée Xjantuchjon. Ko ngujngu sen chónda sen naa arpa, ko copa tsikóñaxin chika oro jichre inda chaxro xraxe. Meꞌe xrondachro kain ti nichjeꞌe sen ndo Dio, kain sen tikinixinꞌen tjajnée ndo.
9 Ko sen noó jichón ko sen ikán no sen tachríi itsje̱ sen naa soon natjúá:
Jeꞌo jaꞌanta tikinixinꞌannta tsayeꞌenta xroon
ko tsintjiannta ti sello chónda libro;
ixi jaꞌanta naakóñaxónnta na̱
ko jníanta kuenaxinnta chujni ste kain tjajna, sen nichja kain ngigua, tjajna nchínchín ko tjajna ndua ixi xrokuayéꞌe ndo Dio sen.
10 *Jaꞌanta kuajonnta juachaxin ixi xrokjanna rey ko taana sintaꞌana ixra̱ ngajin ndo Dio naꞌnana,
ko kaxon kuajonnta juachaxin tsetuanꞌanna nunte xasintajni.
11 Tjumeꞌe tsja̱ꞌa̱ ko kui̱nꞌa̱n tée itsjé sen ángel ste sen ngandeꞌe trono ko no sen jichón ko ikán no sen tachríi. Ko ste itsjé millones sen.
12 Séen itsje̱ sen:
Xjantuchjon, naakóñaxón na̱ xjan,
méxin tikinixin xjan tsayéꞌe xjan kain juachaxin tsetuanꞌan xjan
ko tsayéꞌe xjan kain ti tjintee,
ko kain ngeꞌe tsonoꞌe xjan,
kain juachaxin ko kain juasiai̱na.
13 Kaxon kui̱nꞌa̱n ixi kain ngeꞌe juinchéña ndo Dio jii ngajní, nunte xasintajni, jii chringi inche ko kain ngeꞌe jii chringi ndachaon ndachro:
Kain jaꞌanta tájonnta juasaya ngajin ndo jitaꞌa trono ko ngajin Xjantuchjon
ixi tikinixinꞌen sen kain juachaxin ko kain ngeꞌe jian ko kain juasaya kainxin nchakon.
14 Ko noó sen stechón ndachro sen:
―Jaña tsonꞌen.
Ko sen ikán no sen tachríi bakeꞌexin ntatuchiꞌin sen, kuajon sen juasaya ngajin ngisen jichón kain nchakon.