35
Israel ipaitaja iroñaaka Jacob
9 Ikanta ipiyaja Jacob ipoñaajaro Owintinitzi-pathati Tonkaarini, yapiitajiro Pawa iñaakaari, itasonka-wintairi.
10 Ikantziri:
“Piwairo onatzii Jacob,
Airomaita pipaitaja tsika pipaitawita,
Israel pimpaitajyaa.”
Iwajiniri Pawa pasini iwairo Jacob.
11 Ari ikantanajiri:
“Naaka Pawa Sintsi-pirori.
Ari noshikyaa-jiri pitomi aajatzi inkarati pincharini-tajyaari.
Noshikyaa-jiri pincharinitajyaari inkarati shininka-tawakaacha-ni, aajatzi inkarati nasiyi-tajyaaro-ni ishininka-tawakaiyaa tsika-rikapayi.
Nompinkatha-ritakaa-yitajiri inkarati pincharini-yitajyaari.
12 Aritaki nasitakaa-jyaamiro kipatsi nopakiriri pairani picharinini Abraham aajatzi Isaac.
Irojatzi nasitakaa-jyaariri inkarati pincharini-tajyaari.”
13 Irojatzi ipiyantanajari Pawa tsika ikinkitha-waitakaa-kiri Jacob.
14 Ari yaanaki irirori Jacob aparoni mapi, ikatziya-thantha-takiro tsika ikinkitha-waitakaa-kiri Pawa. Isaitan-tanakaro yiinkantsi, aajatzi imiritaitari ontasorintsi-tantyaari.
15 Ipaitana-kiro Pawapankoni tsika ikinkitha-waitakaa-kiri Pawa.
Kamaki Raquel
16 Ikanta yawisana-kiro Jacob Pawapankoni. Ariitzimataka Posini-pathaniki, ari okatsi-tako-tapaaki Raquel onintzi ontzimaa-niti. Oshiki okimaatsitaka owaiyantiri iintsiti.
17 Okanta oñaakiro aminirori oshiki ikatsi-tzimo-takiro iintsiti, okantana-kiro: “Airo pitharowan-tari, tzimapaaki pitomi.”
18 Aritaki kamimatanaki Raquel, opaitana-jiri otomi “Benoni”. Iriima asitariri ipaitakiri irirori “Benjamín.”
19 Ari okanta okamantakari Raquel, ikitaitakiro awotsiki jatachari Posini-pathaniki, ipaitai-tziri aajatzi Tantapankoni.
20 Ipiriintaki Jacob antaro mapi tsika ikitaitakiro. Irootaki iroka mapi iyoitantari ari okitataari Raquel.