1 Jon
Jon Ina Giruma Karena
(1 John)
Vonaviakova
Aposol Jon ina giruma karena kamonai na nota ghamaghamasi ruwa emakamakai. Sago na Keresiyana wawayisi ikiiepepisi da mara nonowa God ma Natuna Yesu Keriso yavata iti nuwasago. Ma kana viruwa na ivi akovisi da wawaya viya i vibeyebeyena viberowai nani vinuwasagona ita resoi. Ti damsi ivivi beyebeyena da aviyavisina kudubina dobuwai na berona kavakava. Ma ivonavona da tupuwita ma bera peyarina dobuwai tavovotovoni na epuyapuyakita. Tuna kubiine ivonavona da God Natuna Yesu na kanuma kava, ke wawaya vaghata. Ma bade ivonavona da Yesu ini yawasita na dobu ina nuwapoya ma ina bera kudubina takiibutawei. Ma bade ivonavona da Keresiyana na ke yawasa maninina bo nuwaviinavivirana ini nuwapoyei, nani berasi na iyamsi kegha.
Ma Jon na weni notasi viviberosi ke iti vaghinei. Igiruma da Yesu Keriso dobuwai imakamakai na tuna wawaya ere tupuwina ma iyavo kava Yesu itumaghanei ma God yavata inuwaviina na bade turaturasi yavata ini nuwaviinavivirana. Tuna kubiine weni notana ivi sisiya kirakiiyei.
Jon ina nota weni nakanani irereghi.
Sapta 1:1-4 Vikiikiiwa.
Sapta 1:5 da ku 2:29 Yasegana ma nubakutuva.
Sapta 3:1-24 God natunatuna ma Seitan natunatuna.
Sapta 4:1-6 Vonavaghata ma vibero.
Sapta 4:7-21 Ita biga da tinuwaviinavivirana.
Sapta 5:1-21 Vitumaghana tepanai dobu ina yawasa berona taghegavovori.
1
Yesu na God Vonana ma yawasa everevereta.
1 God dobu iyamoyamoni na namada wawaya sago imakamakai, tuna na God Vonana ma yawasa karena. Ma tokai gamona kavi yanei, matakiiyai kakitai ma kavotovotovoni,
2 na tuna kaimamatarei tami kurimi. Yawasa Vaghata Wawayina irudeba na kakitai. Ma kawamatarai kavonavonemi da yawasa makamakii nonowina na Mamai God gwabinai ipisi ma inekiibau kurita.
3 Aviyavisina kavi yanei ma kakitai na peyarina kaisisiyei kurimi, iyamna akii kayowana da tami ma tokai na yavata tinuwasago. Ma bade Mamai God ma Natuna Yesu Keriso yavata tinuwasago.
4 Kagirugiruma kurimi da akii nuwabiibai ina rakata kamokamowa.
God na yasegana.
5 Keriso gwabinai sisiya kavi yanei na kurimi kaidebei na weni. God tuna na yasegana. Ma didibara berasi gwabinai kegha.
6 Mikeda tavonavona da God yavata tinuwasago ma didibara berasi patana da taberaberai na tibero ma vonavaghata yawasina ke kata vovotani.
7 God tuna yasegana kamonai emakamakai ma tota bade nakanani taberai. Yasegana yawasina kamonai tababa na turaturata yavata tinuwasago ma ita bera beroberosi kudubina Natuna Yesu taranai ina kowakowatawei.
8 Ma kata vona da bera beroberosi ke kata beraberai na tibero. Nakanani kati sisiya na vonavaghata gwabitiyai kegha, tota mani tiberoberowe meyeta.
9 Ma kawamatarai ita bera beroberosi timamatarei na God kudubina ina kowatawei ma ina terevimaninita, iyamna tuna na ke viviberona ma ina bera maninisi kavakava. Tuna kubiine ina vonakiiyapa bagibagina iterei kurita na ina berai.
10 Ma kata vona da bera beroberosi ke meyani kata beraberai na tavonavona da God tuna viviberona ma vonana ita yawasa kamona ke ita makamakai.