18
Kwapura ma vitupavira badana miibiina.
1 Muriyai Yesu miiba sago kana kivikivina kurisi iterei, ivi beyebeyena da mara nonowa ita niponipowana ma ke meyani i nota ina peku.
2 Ivona bo, “Kwanatu sago kamonai vitupavira badana sago imakamakai, tuna na God ke ita vovokaravei ma bade wawaya ke ita vivikamyuyuwesi.
3 Ma kwapura sago nani kwanatunai imakamakai ma mara nonowa ipipisi kurina ma ivivi nowi bo, ‘Kevi viteku. Wawaya sago yavata kavi kayotakurana na kuni maniniya.’
4 Namadani kava vinowi ivi karei ma vitupavira badana ibara, ke ina kayowana da iti vitei. Ma turinai na ivona bo, ‘God ke ata vovokaravei ma wawaya ke ata vivikamyuyuwesi,
5 ma namanaki, weni kwapurina mara nonowa inibariku. Tuna kubiine ani vitei da nani wawayina yavata ivi kayotakurana na ani tupaviresi da berana ani maniniya. Mikeda kwapurina ke ani vitei na ina kayovinibara kirakiiyeku!’ ”
6 Ma Bada Yesu ivona bo, “Weni vitupavira badana na ke maninina ma ina sisiya kovi yanei na kovi nuwanotanotei.
7 Ma God na maninina, ma ina wawaya vovinesi i tou kurina madeghai ma didibarai etereterei na iyanesi ma bera maninina eberaberai kubiisi. Ma ke meyani da ita vonavonesi da karakava.
8 Avonavonemi da yaghiyaghinai ini vitesi ma i nuwapoya ina tupavimaniniya. Ma Wawaya Natusi ina nekiibau ku dobu na kadeni da dobu kamonai vitumaghana damsi ina makamakai ina pananisi bo kegha?”
Perisi ma teks yuyuna wawayisi miibiina.
9 Wawaya viya enotanota meyesi, da God ku matana ti na maninisi da wawaya viya ekitakitaoruwesi. Tuna kubiine Yesu weni miibiina ivi sisiyei kurisi.
10 “Tomotomowa ruwa inae ku Taparoro Numana, nipowana kubiine. Sago na Perisi tomowina ma kana viruwa na teks yuyuna tomowina.
11 Ma Perisi tomowina imiiri ma ina nipowana kamonai tuna mani ivi gheghena meyei. Ivona bo, ‘God aikiikiiwem da taku vaghina, ke wawaya viya nakanani. Ti na yapiyapisi, berabero wawayisi ma vipekana wapawapa wawayisi. Ma bade taku ke nokoni teks yuyuna tomowina nakanani.
12 Taku taparoro nununai aisiya da mara ruwa ma aku miiya aviiviiya na aku verena ruvanai atereterei.’
13 Ma teks yuyuna tomowina imiiritaweyana. Idune ma ere nuwapoyina nuwakadana iravi ma ivona bo, ‘God, kevi kamyuyuweku, taku berabero wawayiku.’ ”
14 Ma Yesu ivona bo, “Avonavonemi da God weni tomowina ina bera beroberosi peyarina inotatawei da nuwanuwana yagharina ma ikiibau inae ina ku numa, ke nakanani ma Perisi tomowina. Iyavo kava ekayokayotata ma enotanotai da ighe kirakai na God ina tereoruwesi. Ma iyavo kava ina tereoruwe meyesi na God ina terepisi.”
Yesu ededa yoghoyogho ivi biibiinisi.
(Mat 19:13-15; Mak 10:13-16)
15 Mara sago wawaya ededa yoghoyogho gisigisisi irutinapiyesi Yesu kurina da ita votovonisi ma iti biibiinisi. Ma kana kivikivina ikitisi na iyeghisi.
16 Ma Yesu ededa yoghoyogho ikwaturiyariyesi ma ivona bo, “Ke kona tarapaparisi, kovoteresi da ina pisi kuriku. Wawaya weni ededa yoghoyoghosi nakanani na God ina vikiivavona rapesiyai.
17 Vonavaghata avonavonemi, iyi tam kekayokayowei da God ina vikiivavona ku kamona kuna rui na kebera meyem da tam weni ededisi nakanani. Ke kuna berai na ke meyani kuna rui.”
Mura wawayina.
(Mat 19:16-30; Mak 10:17-31)
18 Jiu damsi i bada sago ipisi ma Yesu ivi tarakiiyanei bo, “Bada biibiim, aviyavisina ana berai da yawasa makamakii nonowina ana viiya?”
19 Ma Yesu ivonei bo, “Avi kubiine kuvoneku da taku biibiiku? Ke sago wawaya biibiina da God ina kina kava.
20 Tam sisiya bagibagisi vonaviyoyovana kamonai kuakovi. ‘Ke kuni pekana wapawapa, ke kuna kiivunuwa, ke kuna yapi, ke kuni mamatara bero, ma am mamai da am maduwa kevopepetisi.’ ”
21 Ma tomowina ivonapotei bo, “Bada, gisikuwai avi karei ma patana da weni sisiyisi bagibagisi peyarina avovotekatekei.”
22 Ma Yesu weni sisiyina ivi yanei na ivona bo, “Bera sago kava emakamakai da kuta berai. Am sawara kudubina kevi gimarei ma mane na wawaya moyamoyakisi kuna veresi da mura makamakii nonowina kunumai kuna viiya. Muriyai kepisi da kuna kiviniku.”
23 Ma tomowina weni sisiyina ivi yanei na ivi nuwapoya kirakai, iyamna tuna na mura wawayina.
24 Yesu ikitai da tomowina ivi nuwapoya na ivona bo, “Ipiropiro da mura wawayisi God ina ku vikiivavona ina rui.
25 Vonavaghata, ipiropiro da kamel unubu ku bonaghina ita susura ma bade ipiropiro kirakai da mura wawayina ita rui God ina vikiivavona ku kamona.”
26 Iyavo kava weni sisiyina ivi yanei na ivi tarakiiyanei bo, “Nakanani na iyavo kava yawasa makamakii nonowina ina panani?”
27 Ma Yesu ivonapotesi bo, “Aviyavisina ipiropiro kirakai da wawaya ke kovokovoghina da ina berai na God kurina itekateka kirakai.”
28 Ma Pita ivona bo, “Ma tokai, na ikikava? Akii bera kudubina kavi verukuyowana da kakivikivinim.”
29 Ma Yesu ivonesi bo, “Vonavaghata avonavonemi, wawaya iyai God ina vikiivavona kubiine ina numa, ina rakaraka, kawana, varevaresina, ina mamai da ina maduwa bo natunatuna ina kuyowesi
30 na aviyavisina peyarina ikuyokuyowei na weni yawasina kamonai God ini teparari ma ku tepana ina vere kirakiiyei. Ma bade kunumai yawasa makamakii nonowina ina panani.”
Yesu ina rabobo ivi sisiyei.
(Mat 20:17-19; Mak 10:32-34)
31 Yesu kana kivikivina ivi 12 itinavivirisi ku ririna ma ivonesi bo, “Tagheghae ku Jerusalem na aviyavisina peroperoveta igirugirumi Wawaya Natusi kubiine na ina tupuwa.
32 Ina paniya ma kupuna damsi ku imasi ina terei da ini namei, ini avaberowei, ina kanukanui, ina widiya ma ini raboboi.
33 Ma mara viarobina kamonai rabobowai ina vomiiri.”
34 Ma aviyavisina ivivi sisiyei na kana kivikivina damisi ke ita viiviiya. Sisiyina iyamna vaghata na gavugavuna, tuna kubiine ke itakovi.
Wawaya matapotapotana ikita.
(Mat 20:29-34; Mak 10:46-52)
35 Yesu kana kivikivina yavata ku Jeriko kwanatuna inenekiibau na tomowa matapotapotana keta baranai imakamakai da mane kubiine ivivi nowi.
36 Ma ivi yana da koroto ghamana ibaba ipipisi na ivi tarakiiyana da aviyavisina ituputupuwa.
37 Wawaya ivonei bo, “Yesu, Nasaret tomowa, epipisi.”
38 Ma ivi kwatu bo, “Yesu, tam David Tupurereghina, kevi kamyuyuweku!”
39 Ma wawaya viya ivi nao na iyeghai. Ivonei da kawana ita pota ma kegha, tuna ighekiirara bo, “David Tupurereghina, kevi kamyuyuweku!”
40 Ma Yesu ivi kiimiiriyei ma ivonesi da tomowina ita rutinapiyei kurina. Ipisi na Yesu ivona bo,
41 “Aviyavisina kekayokayowei da ana berai kubiim?”
Ma ivonapotei bo, “Bada, aku kayowana da ata kita.”
42 Ma Yesu ivona bo, “Kekita. Kuvi tumaghana kubiine kuyawasa.”
43 Yaghiyaghinai ikitabanenega ma ivi karei da God ivovokavakavari ma Yesu ikivikivini. Ma koroto ghamana weni berana ikitai na ti yavata God ivovokavakavari.