20
Bigabiga vao kamonai miibiina.
1 Yesu ivonesi bo, “God ina vikiivavona na weni nakanani. Mara sago boiboiyai na vao badana ina numa ikiibutawei inae da bigabiga ita viinisi da ina vao kamonai ita biga.
2 Ivonesi da ita wayowa kupom na wawaya sago sago duma silva riririghina.
3 “Madegha ighepaka ma vao badana mara viruwina ikiibau ma vigimagimara gawarinai ikita da tomotomowa viya ivivi miiriyana, i biga kegha.
4 Ma ivonesi bo, ‘Tami bade konae da aku vao kamonai kona biga ma ani miiya bubunimi.’
5 Vaghina ma, tomotomowisi inae.”
“Ma vao badana na madegha punai ma ravi madeghinai na bade berana sago iberai.
6 Ma raviyai ivovirame ku vigimagimara gawarina ma ikita da wawaya viya patana da ivivi miiriyana. Ma ivonesi bo, ‘Avi kubiine koimiiriwapeyana? Iyamna kegha.’ ”
7 “Ma ivonapotei bo, ‘Ke sago wawaya ita kayowekai da kubiine kata biga.’ ”
“Ma vao badana ivonesi bo, ‘Vaghina, tami bade konae da aku vao kamonai kona biga.’ ”
8 “Madegha ita kamkovoghi ma vao badana ina vao kana koyakoyagha ivonei bo, ‘Bigabiga wawayisi kekwatusi da kuni miiyesi. Ma iyavo kava raviyai biga ivi karei na ini nao. Ma iyavo kava mara boiboiyai biga ivi karei, ti damsi na ini muri kuni miiyesi.’ ”
9 “Wawaya raviyai biga ivi karei na sago sago duma silva riririghina sago ivi miiyesi, tuna nakanani ma biga ku pom miiyanina.
10 Vaghina ma, iyavo kava mara boiboiyai biga ivi karei ipisi da iti miiyesi na inotai da kii miiya ita rakata. Ma kegha, peyarisi kii miiya na silva riririghina sago.
11 I miiya iyuna ma vigamowana ivi karei vao badana kurina.
12 Ivonei bo, ‘Nokoni damsi ivi muri ipisi ma tokai na biga ghamana kabera kupomei, madegha iraranikai. Ma kuberai da kii miiya ma kakii miiya na sago.’ ”
13 “Ma vao badana i wawaya sago ivonapotei bo, ‘Aku tomo, ke ata bera beroi kurim. Kuvi vaghinei da silva riririghina sago kava ati miiyem.
14 Vaghina, am miiya kuviiya ikovi ma kenae. Aku kayowanai na tam ikikava avi miiyem na bade nakanani nokoni tomowina avi miiyei, tuna muriyai vaghata ipisi.
15 Aku rewapana emakamakai da taku mani aku mane na aku kayowanai ana berai. Ma aku agabiibai kubiine kunuwakapi bo?’ ”
16 Ma vaghina, Yesu ina sisiya turina ivonesi bo, “God ina vikiivavona kamonai iyavo kava karako inao na ini muri ma iyavo kava karako imuri na ini nao.”
Yesu ina rabobo ivi sisiya meyei.
(Mak 10:32-34; Luk 18:31-34)
17 Yesu ivomiiri igheghae ku Jerusalem ma kana kivikivina ivi 12 itinavivirisi ku ririna ma ivonesi bo,
18 “Tagheghae ku Jerusalem na wawaya sago, taparoro babadisi i babada ma vonaviyoyovana vibeyebeyena wawayisi kurisi ini wawaneku da taku Wawaya Natusi, ini tupavireku ma ina vonakiiyaragha da ana rabobo.
19 Ina patumiku ma kupuna damsi ku imasi ina tereku da ini nameku ma ina widiku ma korosiyai ina tuparatuku da ana rabobo. Ma mara viarobina kamonai rabobowai ana vomiiri.”
Jemes ma Jon i maduwa ivi nowi.
(Mak 10:35-45)
20 Nani murinai Zebedi kawana, natunatuna Jemes ma Jon irutinisi inae Yesu kurina ma ivi tuwaporeruruwana da iti nowi.
21 Ma Yesu ivona bo, “Am kayowana avai?”
Ma ivonapotei bo, “Aku kayowana da kuni vaghinei da maranai kuni kiivavo na natuku sago katagheyamuwai ma sago dugemuwai ina makai.”
22 Ma Yesu ivonapotesi bo, “Ke kotakovi da avi koisisiyei. Tami kovokovoghimi da aku redu kona karapotai, bo?”
Ma ivi ruwa ivonapotei bo, “Tokai kovokovoghikai.”
23 Ma Yesu ivonesi bo, “Vonavaghata da aku reduwai konuma. Ma taku aku rewapana kegha da wawaya ata vinesi da iyai katagheyakuwai ma iyai dugekuwai ina makai. Nani gawarisi na aku Mamai ivovunaghi ikovi na kii wawaya namada ivinesi.”
24 Maranai Yesu kana kivikivina imaruwa ivi yanei da Jemes ma Jon nakanani ivi nowi na nuwanuwasi ipughu.
25 Tuna kubiine Yesu ikwatusi ipisi ma ivonesi bo, “Tami koakovi da meni kiikiivavosi ke iti tumaghana na ivi rewapana kirakai, ti na wawaya bagibagisi ma ekayokayotata kirakai.
26 Ma tami na ke nakanani kona berai. Iyavo kava kamomiyai ekayokayowei da ini wawayaghama na ina tereoruwe meyei da tuna na kudubimi ami bigabiga.
27 Ma iyavo kava ekayokayowei da ini nao na ini sleiv turaturana kubiisi.
28 Ma taku Wawaya Natusi bade nakanani, ke ata pisi ku dobu da wawaya vitaku ita kavari. Kegha, apisi da wawaya vitasi ata kavari. Ana suwara meyeku da wawaya kii tupi ani miiyei da berabero kamonai ana votawesi ina kiibau da yawasa ina panani.”
Yesu matapotapotasi ruwa ivi yawasisi.
(Mak 10:46-52; Luk 18:35-43)
29 Yesu kana kivikivina yavata Jeriko kwanatuna ikiikiibukuyowei na koroto ghamana ikivinisi.
30 Ma tomotomowa ruwa matapotapotasi keta baranai imakamakai na ivi yanei da Yesu inenae ma ikiirara bo, “Bada, David Tupurereghina, kevi kamyuyuwekai.”
31 Ma wawaya nani korotona kamonai iyeghisi ma ivonesi da kawasi ita pota. Ma kegha, ighekiirara, ivona bo, “Bada, David Tupurereghina, kevi kamyuyuwekai.”
32 Yesu ivi kiimiiriyei ma ikwatusi ipisi ma ivonesi bo, “Aviyavisina kokayokayowei da ana berai kubiimi?”
33 Ma ivonapotei bo, “Bada, kakayokayowei da kana kita.”
34 Ma Yesu ivi kamyuyuwesi ma matasi ivotovoni. Yaghiyaghinai ikitabanenega ma Yesu ikivini.