50
Babilonia imano cananpäpis rimashan
1 Babilonia nasyun imano cananpäpis Tayta Diosga profëtan Jeremiastami willacachiran:
2 «Nasyuncunaman willacuy. Llapanta musyachiy.
Señalpaj bandërata churay. Willapashätaga juctapis mana gongaypa willacuy.
Cayno niy: ‹Babiloniataga maynami charisha.
Bel diospis pengaychömi caycan.
Marduc diosga fiyupa mancharishami caycan.
Ïduluncunaga, manacaj diosnincunaga
pengaychömi, mancharishami carcaycan.›
3 Norte caj-lächo caycaj nasyuncunapitami Babiloniamanga juc nasyun runacuna aywaycämun.
Paycuna chayamorga chunyajtami cachaycongapaj.
Chaychöga runa ni animalcunapis manami tiyangapänachu.
Chaycho tiyajcunaga llapanmi gueshpir aywacongapaj.»
4 Tayta Diosmi nin: «Chay wichan Israel runacunawan Judá runacunaga noga Tayta Diosninta ashimashpanmi wagaraycar cutimongapaj.
5 Sionman aywaj nänipa aywarmi tapuconga. Nircur chaymanmi aywanga cayno nishpan: ‹Llapanchi shuntacaycur aywar Tayta Dioswan conträtuta rurashun imaycamapis allilla canapaj. Chay conträtutaga amana imaypis gongashunnachu.›
6 «Acrashä runacunaga pantacasha uyshacunanömi carcaycasha. Mandajnincunami llutanpa yarpächisha jircacunacho uysha pantacajnöpis pantacäcunanpaj. Paycunaga purisha juc jircapita juc jircamanmi. Chayno purir gongaycärishanami maycho tiyanan cashantapis.
7 Contrancuna tariycärir ñacachej. Nircur nej: ‹Noganchëga manami juchayojchu canchi. Quiquincunami juchayöga alli goyächej Tayta Diosta mana wiyacushanpita. Unay awiluncunapis Paymanmi yäracoj.›
8 «¡Acrashä runacuna, Babiloniapita gueshpicuy-llapa!
¡Uyshacunata chïbu pushajno ñaupa-puntata llojshiy-llapa!
9 Nogami camacächishaj
norte caj-läpita munayniyoj nasyuncuna
Babiloniaman chay öralla wacpita-caypita yaycapaycunanpaj.
Sumaj parlacarcärir aywarmi binsenga.
Paycunaga fiyupami pillyayta yachan.
Lëchancunawanga jitayllan-tupumi chayachin.
10 Babilonia runacunataga ima-aycantapis guechongami.
Apaytapis mana puydinancamami guechonga.
Noga Tayta Diosmi chayno në.
11 «Acrashä runacunata ima-aycatapis guechoj Babilonia runacuna,
¡cushicuy-llapa fistata ruray-llapa!
¡Alli guewacho ternëra pañajnöraj pinticachay!
¡Cawallu wagajnöraj wichyacuy!
12 Ichanga nasyunniqui fiyupa pengaychömi ricacongapaj.
Waquin nasyunpita mas piyurmi ricacongapaj.
Chaqui, chunyaj purunyashami ricacongapaj.
13 Rabyacurcushpämi chay nasyuntaga cachaycushaj juc runapis mana tiyajta.
Chunyajman ruracashatami cachaycushaj.
Imano castigashätapis ricaycur
chaypa päsaj cäga llapanmi fiyupa almirashpan mancharenga.
14 «Babiloniacunataga intërunpa curalacaycäriy.
Lëchayojcuna sumaj camacay.
Nircur paycunataga lëchayquicunawan illapay.
Paycunaga nogapa conträmi juchata rurasha.
15 Intëru cantunpa curalaraycajcuna cayno gaparpay:
‹¡Babiloniaga binsishanami caycan!
¡Tunishanami ricchacuna törrincunapis! ¡Pergancunapis juchushanami!› nir.
Nogami imanöpis rurashanpita ayñita cutiycächë.
Imanömi gamcunata rurashurayqui, chayno gamcunapis ruray.
16 Babiloniacho tiyaycaj juc-lä runacunaga manchariypaj guërrata ricashpanmi
nasyunninman marcanman-cama gueshpir cuticonga.
Chaura Babiloniachöga ni jucnayllapis manami quëdanganachu murupacoj, ni micuy shuntajpis.
17 «Israelcunaga caycaran jircacho ogracasha uysha caycajnömi. Chayno caycaptinmi rimëruga Asiriapa raynin micucoj liyunno shamuran. Chaypitaga Babiloniapa raynin Nabucodonosorna usharinanpaj shamuran.
18 Chaypitami Israelcunapa munayniyoj Tayta Diosnin në: Babiloniapa raynin Nabucodonosorta, chaycho tiyajcunatapis castigashäpaj Asiriapa rayninta castigashänömi.
19 Chayno ruraptë Israelcunaga quiquinpa nasyunninmanmi cuticongapaj. Uyshapaj guewa caycajnöpis paycunapaga aypallami chacrancuna caycanga: Carmelo puntapis, Basanpis, Efraín aypalla puntayoj jircapis, Galaadpis.
20 Chay wichan Israelcunawan Judá runacunaga carcaycangapaj juchancunapita, mana allita rurashanpitapis perdunashanami. Cawaycajcunataga perdunashämi. Noga Tayta Diosmi chayno në.
21 «Babiloniapa contrancuna, Merataim partiman pillyaj yaycapaycuy.
Pecod particho tiyaycajcunamanpis yaycapaycuy.
¡Chay particunacho tiyajcunataga gaticachashpayqui ushajpaj wañuchiy!
¡Nishätaga llapanta cumliy!
Noga Tayta Diosmi chayno në.
22 «Intëru Babilonia nasyunchömi mayacaycan fiyupa guërra caycashan,
llapanta illgarcaycächishan.
23 ¡Cumbanöpis intëru nasyunta magaj Babilonia nasyun cananga paquicäcushami!
¡Babilonia chayno ruracäcuptin intëru nasyun runacunami fiyupa manchariycan!
24 Babilonia runacuna, gamcunataga nogami trampata churapashcä.
Mana cuentata-gocuypami chayman tunishcanqui.
Nogapa conträ ricacushayquipitami
chaycho watacasha caycajllata contrayquicuna charishurayqui.
25 Nogaga quichaparishcä pillyananpaj pillyacunancuna churarashantami.
Nircur jorgamushcä rabyasha pillyanä armäta.
Babilonia runacuna tiyashan nasyunchöga
yarpaycashäcunatami rurashaj.
26 ¡Intërupita shamoj suldärucuna, magaj yaycapaycäriy!
¡Micuy churacunancunatapis quichariycäriy!
¡Llapanta shuntaycur ushariy!
¡Cawaycäga ni jucnayllapis ama quëdachunchu!
27 Llapan nubillucunatapis wañuchiy.
Wañuchinanpaj caycaj partiman apachiy.
¡Wawallau!
¡Babilonia castigasha cananpaj junaj chayamushanami!
28 «Babiloniapita waquin gueshpejcuna parlashanta wiyay-llapa.
Ayñita imano cutichishätapis parlajta wiyay-llapa:
‹Templunta illgächishanpitami Tayta Diosga Babilonia runacunata ayñita cutichisha› nir.
29 «¡Lëchawan illapay yachajcunata llapanta shuntay
Babiloniaman magaj yaycupaycärinanpaj!
¡Siudä cantunpa tiyacaycäriy
pipis mana gueshpinanpaj!
¡Rurashanmanno ayñita cutichiy!
¡Imanömi jucta ruraran chayno paycunatapis ruray!
Paycunaga Israelcunapa Santo Tayta Diosnin caycaptëmi
mana rispitamashpan rabyachimasha.
30 Chaypitami llapan mösuncuna cällicunacho wañusha mashtarpanga.
Chay junajmi llapan suldäruncunapis wañonga.
Noga Tayta Diosmi chayno në.
31 «Alli-tucoj nasyun runacunaga, llapaniquipa contrayquimi caycä.
Gamcunata castiganäpaj caycaj junaj chayamushanami.
32 Alli-tucoj nasyun runacuna mana allimanmi chayanquipaj.
Cananga manami pipis faburniqui canchu.
Llapan siudäniquicunamanmi ninata sindipaycushaj.
Chaura ninanami intëru siudäniquicunata rupar ushacurcongapaj.»
33 Munayniyoj Tayta Diosmi nin: «Israel runacunatawan Judá runacunataga fiyupami ñacarcaycächin. Contrancuna prësu charicaycärir manami cachariyta munanchu.
34 Noga munayniyoj Tayta Diosmi Israelcunataga imapitapis jorgushaj. Nircur nasyunninchöga jaucami goyächishaj. Babilonia runacunatami ichanga fiyupa castigashaj.
35 «¡Babilonia runacunaga guërracho cachun!
¡Mandajnincunapis, fiyupa yachaj runacunapis llapan guërracho cachun!
36 ¡Musyacojnincuna guërracho cachun
chaynöpa löcuna ricacunanpaj!
¡Suldäruncunapis guërracho cachun
chaynöpa manchariywan sicsicyananpaj!
37 ¡Guërracho cachun carrëtacunata garachasha apananpaj caycaj cawalluncunapis!
Juc-lä nasyunpita guellaypaj pillyaj suldäruncunapis warmino ricacuchun.
¡Paycunapa ima-aycantapis apacuchun!
38 ¡Mayuncunapis chaquicäcuchun!
Chaynöga cachun melanaypaj ïduluncuna Babiloniacho aypalla captin.
Chay runacunaga mana bälej ïduluncunawanmi pasaypa pirdicasha caycan.
39 «Chaura Babiloniachöga tiyanga purun mishicunawan jirca allgucunallanami. ‹Avestruz› jutiyoj äbicunapis aypallanpami tiyanga. Runacunaga imaypis mananami tiyanganachu.
40 Illgächiptë imanömi ricacuran Sodomapis Gomorrapis y läduncho caycaj siudäcunapis chaynömi ricaconga. Chaymi Babilonia nasyuncho yapayga manana pipis tiyangapänachu; ni pachacuyllapis manami pachaconganachu. Noga Tayta Diosmi chayno në.
41 «Caru norte caj-lächo caycaj partipitami juc nasyun runacuna shamunanpaj camaricurcaycan.
Paycunaga fiyupa munayniyojmi.
Paycunamanga aypalla raycunami guellicushapis caycan.
42 Paycunaga sablincunawan, lëchancunawanmi carcaycan.
Paycunaga fiyu runacunami. Manami pitapis cuyapanchu.
Pillyashpanpis gaparpan lamar yacu pullchajyar gaparajnörämi.
Cawallun muntashallami aywanpis.
Babiloniacunawan pillyananpäga
camaricushallanami carcaycan.
43 Cay willapata mayaycur Babiloniapa raynenga
manchariyllawan chiyacashami ricacusha.
Yarpachacuyllawan llaquicuyllawan cuerpuncunapis nanaycan,
gueshyaj warmita nanay charejnörämi.
44 «Jordán mayu cantun shatapita liyun llojshir alli guewa caycashancho animalcuna caycajman aywajnömi nogaga illajpita shamushäpaj. Chaura Babiloniacunaga manchacamashpan gueshpir aywaconga. Nircurna camacächishaj acrashä runa paycunapa mandajnin cananpaj. ¿Piraj nogamanga tincunman? ¿Piraj nogawan churacanman? ¿Pï michicojraj nogata ichipämanman?
45 Babiloniacunapaj noga munayniyoj imano yarpashätapis wiyay-llapa. Babilonia nasyuncho tiyajcuna imano cananpaj yarpaycashätapis wiyay. Chaycho tiyajcunataga tacshannincunatapis apacongami. Nasyun intërutami pasaypa ushacashata cachayconga.
46 Babilonia chayno ushacaptenga intëru nasyun runacunami manchariywan sicsicyanga. ‹Washaycamay› nir gaparashanpis intëru nasyuncunamanmi wiyacangapaj.»