15
Jesús Pilatopaj ñaupakenpi
1 Pakariyamuyta sacerdotecunapaj jefencuna, llajtapaj jefencuna, leymanta yachachejcunapiwan Athun Asambleapi tucuynincu tantaycucuspa, Jesusta wataskata aparkancu Pilatoman entreganancupaj.
2 Pilato Jesusta taporkan:
—¿Kanchu judiocunapaj Reynin canqui?
Jesustaj nerkan:
—Kan ninqui, jinapuni —nispa.
3 Sacerdotecunapaj jefencuna imaymanamanta Jesús contra parlachcarkancu.
4 Chayraycu Pilato ujtawan tapullarkantaj:
—¿Manachu imatapas contestanqui? ¡Uyariy, imaymanamanta juchachachcasunquichis!
5 Jesustaj ni chaywanpas contestarkanchu. Chayraycutaj Pilatoka muspharkan.
Jesús juchachaska wañuchinapaj
6 Sapa Pascuapi Pilatoka costumbrenman jina cacharej ujnin presota, maykentachus runacuna mañaskancuta.
7 Chay tiempopitaj uj runa, Barrabás sutiyoj, carcelpi preso cachcarkan, uj ch'ajwaypi ujcunawan cusca runata wañuchej.
8 Achqha runa tantacamuspataj, Pilatomanta mañayta kallarerkancu costumbreman jina ruwacunanpaj.
9 Pilatotaj paycunata taporkan:
—¿Judiocunapaj Reynintachu cacharinayta munanquichis? —nispa.
10 Pilatoka reparacorkan sacerdotecunapaj jefencuna envidiacuspa Jesusta payman entregaskancuta.
11 Sacerdotecunapaj jefencunaka runacunata pituspa, yachaycucherkancu Barrabascajta cacharichinancupaj.
12 Pilatotaj paycunata ujtawan taporkan:
—¿Imanasajtaj judiocunapaj Reynin niskawanri?
13 Runacunataj wajach'acorkancu:
—¡Chacataska cachun! —nispa.
14 Pilatotaj tapullarkantaj:
—¿Imatataj mana allinta ruwanri? —nispa.
Paycunataj astawan wajach'acorkancu:
—¡Chacataska cachun! —nispa.
15 Pilatotaj runacunawan allinpi cayta munaspa, Barrabasta cachariporkan. Ñaupajta Jesusta bajtanancupaj mandarkan, chaymantataj soldadocunaman entregarkan chacatanancupaj.
16 Soldadocuna gobierno wasi patioman Jesusta pusaycorkancu. Chaypitaj tucuy soldadomasincunata wajarkancu tantacunancupaj.
17 Jesusta reyta jina morado katanata churaycorkancu. Qhichcamanta coronata ruwaspa, umanman churaycorkancu.
18 Payta asipayaspa burlacuyta kallarerkancu:
—¡Judiocunapaj Reynin causachun! —nispa.
19 Umapi c'uparkancu, thutkatarkancutaj, konkoriycuspataj adorayta yanacorkancu.
20 Chay jina burlacuy pasayta, chay morado katanata orkhopuspa paypaj p'achanta churaycuporkancu. Apaporkancu chacatanapaj.
Jesús chacataska
21 Cirenemanta Simón, Alejandropaj Rufopajpiwan tatancu, campomanta chayamuchcajtin, soldadocuna jap'ispa mandarkancu Jesuspaj cruzninta apananpaj.
22 Gólgota sutiyoj lugarman Jesusta aparkancu. (Gólgota niyta munan: “Calavera Lugar.”)
23 Chaymanta Jesusman mirrayoj vinota ujyachiyta munarkancu, Jesustaj mana ujyarkanchu.
24 Jesusta chacataspa, soldadocuna paypaj p'achancunata partinacunancupaj sortearkancu, imatachus sapa uj apacunancuta yachanancupaj.
25 Chacataycojtincu, iskon hora carkan.
26 Letrerota churarkancu imamantachus wañuchiskancumanta: “Judiocunapaj Reynin” nispa.
27 Jesuswan cusca chacatallarkancutaj iscay suwacunata, ujninta pañannejpi ujnintataj llok'ennejpi.
28 Chaywan junt'acorkan Escriturapaj niskan: “Juchasapacunawan yupaska.”
29 Chayninta pasajcunapas umancuta maywispa, insultarkancu, cay jinata nispa:
—¡Bah, kan, Diospaj templonta urmachej, quimsa p'unchaypitaj ruwarkoj!
30 Kan quiquiyqui salvacuy, cruzmanta urakamuy.
31 Ajinallatataj sacerdotecunapaj jefencuna leymanta yachachejcunapiwan Jesusmanta burlacuspa, nerkancu:
—Wajcunata salvarkan, pay quiquintaj mana salvacuyta atinchu.
32 ¡Cristo, Israelpaj Reynin, cunan cruzmanta urakay ricunaycupaj, creenaycupajtaj!
Ajinallatataj chacataska cajcunaka burlacorkancu.
Jesús wañupun
33 Chaupi p'unchaymanta chaupi tardecama, tucuy cay pacha tutayaycorkan.
34 Chaupi tardetataj Jesús callpawan wajach'acuspa nerkan: “Eloi, Eloi, ¿lema sabactani?” nispa. (Cay niyta munan: “Diosníy, Diosníy, ¿imaraycutaj sakerpariwanqui?”)
35 Waquin chaypi cajcunamanta payta uyarispa nerkancu:
—Uyariychis, profeta Eliasta wajachcan.
36 Ujnin runataj phawaspa vinagreman esponjata chaporkan. C'aspiman churaspataj, korkan ch'umuycunanpaj. Nerkantaj:
—Dejallaychis. Ricusunchis, ichapas Elías jamuspa apakanka —nispa.
37 Jesustaj callpawan wajach'acuspa, wañuporkan.
38 Templo uqhupi athun cortinantaj iscayman lliq'icorkan, janajmanta urayman.
39 Jesuspaj ñaupakenpi uj capitán romano sayachcarkan. Imaynata wañupuskanta ricuspataj, nerkan:
—Ciertopuni cay runaka Diospaj Churin —nispa.
40 Waquin warmicunataj carumanta khawachcarkancu. Paycuna uqhupi cachcarkancu María Magdalena, sullc'acaj Santiagopaj Josepajpiwan mamancu María, Salomepiwan.
41 Jesús Galileapiraj cachcajtin, chay warmicuna paywan purichcaspa sirverkancu. Cachcallarkancutaj waj achqha warmicuna Jesuswan Jerusalenman purejcunamanta.
Jesús p'ampaska
42 Samana p'unchaypaj waquichicuna p'unchay ch'isiyaycuchcajtin,
43 Arimatea llajtayoj José Pilatoman purerkan. Chay Joseka Athun Asambleapi importante carkan. Payka Diospaj gobiernonta suyachcallajtaj. Mana mancharicuspa, Pilatomanta Jesuspaj cuerponta mañarkan.
44 Pilatoka Jesús wañuskaña caskanmanta muspharkan. Chayraycu capitanta wajaspa taporkan jayc'ajmanta wañupuskanta.
45 Wañuskaña caskanta yachaspataj, Joseman permisota korkan Jesuspaj cuerponta apakapunanpaj.
46 Josetaj fino sabanata rantimuspa, Jesusta cruzmanta apakarkan. Sabanapi p'istuycuspa, kaka jutc'uska sepulturaman churaycorkan. Puncutataj rumiwan tapaycorkan.
47 María Magdalenataj Josepaj maman Mariapiwan ricorkancu maypichus Jesús churaska caskanta.