15
¿Imataj runata khellichan?
1 Waquin fariseocuna leymanta yachachejcunapiwan Jerusalenmanta chayamuspa, Jesusman chimpaycuspa taporkancu:
2 —¿Imaraycutaj discipuloyquicuna ñaupaj abuelonchiscunapaj costumbrenta p'aquincu? ¿Imaraycutaj paycunari maquincuta mana mayllacuncuchu miqhunancupaj?
3 Jesús contestarkan:
—¿Imaraycutaj kancunapas Diospaj mandacuskanta p'aquinquichis costumbreyquichiscunata ruwanayquichisraycu?
4 Dioska mandarkan: ‘Tata mamayquita respetanqui.’ Chaymanta: ‘Pichus tatanta chayri mamanta maldicejka, wañuchun.’
5 Kancunataj ninquichis: ‘Pillapas tatanta chayri mamanta ninman: Mana yanapayta atiyquichu, imaraycuchus tucuy cajniyta Diosmanña kopuni, nispa chayka,
6 manaña obligaskachu yanapananpaj tatanta ni mamantapas.’ Ajinapi kancunaka Diospaj mandacuskanta p'aquinquichis, costumbreyquichista ruwanayquichisraycu.
7 ¡Iscay uya runacuna! Profeta Isaías kancunamanta allinta nerkan:
8 ‘Cay runacunaka simillancuwan honrawancu,
sonkoncutaj carupi nokamanta cachcan.
9 Imapajpas sirvinchu adorawaskancoka.
Yachachiskancutaj runacunapaj
mandacuskancunalla.
10 Jesús runacunata wajaspa nerkan:
—Uyariychis, entendiychistaj.
11 Siminta yaycoj runataka mana khellichanchu, ni ima miqhuy, manachayri siminmanta llojsej.
12 Discipuloncuna Jesusman chimpaycuspa, taporkancu:
—¿Yachanquichu fariseocuna niskayquita uyarispa phiñacuskancuta?
13 Jesustaj contestarkan:
—Mayken sach'apas Tataypaj mana tarpuskanka, saphinmantapacha t'iraska canka.
14 Fariseocunata dejaychis. Paycunaka ñausacuna cancu, waj ñausacuna pusaj. Uj ñausa waj ñausata pusan chayka, iscaynincu jutc'uman urmayconkacu.
15 Pedrotaj Jesusman nerkan:
—Cay niskayquita sut'inchawaycu.
16 Jesustaj nerkan:
—¿Manarajchu kancunapas entendinquichis?
17 ¿Manachu entendinquichis siminta yaycojka wijsaman yaycuskanta, chaymantataj llojsipuskanta?
18 Simimanta llojsejcajtaj sonkomanta jamun; chaytaj khellichan.
19 Runapaj sonkonmanta llojsejka caycuna: mana allin pensaycuna, runa wañuchiycuna, adulterio jucha ruwaycuna, mana casaraspa tiyaycuna, suwacuycuna, llullacuycuna, insultaycunapiwan.
20 Caycunaka runata khellichan. Maqui mayllacuna costumbreta mana junt'aspa miqhoyka mana sonkota khellichanchu.
Waj llajtayoj warmi Jesuspi creen
21 Jesús chaymanta llojsispa, Tiroman Sidonmanpiwan puriporkan.
22 Chaypi tiyaj uj cananea warmi kayllaycorkan wajach'acuspa:
—¡Señor, rey Davidpaj Churin, qhuyapayaway! ¡Ususiy sajra espirituyoj!
23 Jesustaj ni imata contestarkanchu. Discipuloncunataj payman chimpaycuspa, rogarkancu:
—‘Puripuy’ niy chay warmita; imaraycuchus khepanchista jamun wajach'acuspa.
24 Jesús warmita nerkan:
—Dioska cachamuwan Israel llajtapi caj oveja jina chincaska runacunallaman.
25 Chaywanpas warmeka Jesuspaj ñaupakenpi konkoriycuspa, rogarkan:
—¡Señor, yanapariway!
26 Jesustaj contestarkan:
—Mana allinchu wawacunapaj t'antanta kechuspa alkocunaman konaka.
27 Warmitaj nerkan:
—Arí, Señor, alkocunapas wasiyojpaj mesanmanta urmakaj ñut'ucunataka miqhullancutaj.
28 Jesús payman nerkan:
—Warmi, creeyniyqui sinchi athun. Munaskayquiman jina ruwaska cachun.
Chhicamantapacha ususenka alliyaporkan.
Jesús achqha onkoskacunata alliyachin
29 Jesús chaymanta llojsipuspa, Galilea kocha cantoman chayarkan. Uj lomaman llojsispataj tiyaycorkan.
30 Achqha runacuna Jesusman tantacorkancu. Pusamorkancu cojocunata, ñausacunata, mana maquiyojcunata, jup'acunata, waj achqha onkoskacunatawan. Jesuspaj ñaupakenpi churarkancu, paytaj alliyacherkan.
31 Runacunataj muspharaspa khawarkancu jup'acuna parlajta, mana maquiyojcuna alliyaskata, cojocuna purichcajta, ñausacunapas ricucojta. Israelpaj Diosnintataj alabayta kallarerkancu.
Jesús miqhunata kon tawa waranka runaman
32 Jesús discipuloncunata wajaspa nerkan:
—Cay runacunata qhuyapayani. Quimsa p'unchayña caypi nokawan cancu; ni ima miqhunancu canchu. Manataj munanichu mana miqhuskata wasincuman cachapuyta, ñanpi yuyaynincu ama chincananpaj.
33 Discipuloncunataj nerkancu:
—¿Imaynatataj achqha runapaj miqhunata tarichuwan cay mana runayoj lugarpi?
34 Jesús paycunata taporkan:
—¿Jayc'a t'antayquichistaj can?
Paycuna contestarkancu:
—Kanchis t'anta, uj chhican challwitacunapiwan.
35 Jesustaj runacunata mandarkan pampapi tiyaranancupaj.
36 Kanchis t'antata challwacunatawan maquinpi jap'ispa, Diosman graciasta korkan. Partiraspataj, discipuloncunaman korkan. Paycunataj runacunaman jaywararkancu.
37 Tucuynincu miqhorkancu sajsanancucama. Chaywanpas puchoj ñut'uncunata kanchis canastata junt'acherkancu.
38 Miqhojcunataj tawa waranka kharicuna carkancu, mana yupaspa warmicunata ni wawacunatapas.
39 Jesús runacunata cachapuspa, boteman yaycupuspa, Magadán lugarman puriporkan.