19
Jesús divorciomanta yachachin
Jesús caycunata nispa, Galileamanta Judea provinciaman puriporkan. Inti llojsimuy lado Jordán mayuman chayaporkan. Achqha runacuna Jesuspaj khepanta jamorkancu. Chaypitaj onkoskacunata alliyacherkan.
Waquin fariseocuna Jesusman kayllaycorkancu. Juchaman pantachinancupaj taporkancu:
—¿Leyman jina imallamantapas casaraska runa esposanmanta divorciacuyta aticunmanchu?
Jesús paycunata contestarkan:
—¿Manachu Diospaj palabranpi leenquichis cay pachapaj kallariyninpi Dios kharita warmitawan ruwaskanta? Diostaj nerkan: ‘Chayraycu khareka tata mamanta sakeponka esposanwan juntacunanpaj, iscaynincutaj uj runa jinalla cankacu.’ Ajinaka manaña iscaychu cancu, manachayri ujlla. Chayraycu Diospaj juntaskanta runaka ama wijch'uchichunchu.
Paycunataj taporkancu:
—¿Imaraycutaj Moisés mandarkan esposaman divorcio papelta kospa cacharipunata?
Jesustaj nerkan:
—Khoru sonkoyoj caskayquichisraycu, Moiseska esposamanta divorciacunanta permiterkan. Kallariypeka mana jinachu carkan. Nokataj niyquichis, esposan mana adulterio juchata ruwachcajtin, pillapas esposanmanta divorciacuspa waj warmiwan casaracun chayka, adulterio juchata ruwan.
10 Discipuloncunataj nerkancu:
—Casaraska runa warminwan chay jina canan cajtenka, mana convininchu casaracunaka.
11 Jesustaj contestarkan:
—Mana tucuychu entendincuman caytaka, manachayri picunatachus Dios entendiyta yanapan chaycunalla. 12 Mana tucuy kharichu casaracuyta atin. Imaraycuchus ujcunaka mana casaracunapaj jinachu nacincu, ujcunatataj runacuna capancu mana casaracunancupaj, ujcunataj Diospaj gobiernonpi sirvinancuraycu mana casaracuncuchu. Jina cayta atejka, jina cachun.
Jesús wawacunata bendicin
13 Wawacunata Jesusman pusamorkancu, maquincunata paycuna pataman churaspa oración ruwananpaj. Discipuloncunataj wawa apamojcunata c'amiyta kallarerkancu. 14 Jesús nerkan:
—Ama jarc'aychischu wawacuna nokaman jamunanta, imaraycuchus Diospaj gobiernonka wawa jina cajcunapaj.
15 Wawacuna pataman maquincunata churaspa, bendicerkan. Chay lugarmantataj puriporkan.
Uj khapaj wayna
16 Uj wayna Jesusman purispa, taporkan:
—Yachachej, ¿ima allintataj ruwanay wiñay causayniyoj canaypaj?
17 Jesustaj nerkan:
—¿Imaraycutaj allincajmanta tapuwanqui? Ujlla allenka, chaytaj Dioslla. Salvación causayman yaycuyta munanqui chayka, Diospaj mandaskancunata casucuy.
18 Paytaj nerkan:
—¿Maykencunata?
Jesús payta nerkan:
—‘Ama wañuchinquichu, adulterio juchata ama ruwanquichu, ama suwacunquichu, ama pimantapas llullata ninquichu. 19 Tata mamayquita respetay, runamasiyquitataj munacuy kan quiquiyquita jina’.
20 Waynataj nerkan:
—Tucuy chaycunata junt'aniña. ¿Imarajtaj faltawan?
21 Jesustaj payman nerkan:
—Cabal mana juchachana jina runa cayta munaspaka, puriy, cajniyquita vendimuy, chay kolketataj pobrecunaman kopuy. Ajinamanta janaj pachapi khapaj cayniyqueka canka. Chhicamanta jamuspa, nokawan puriy.
22 Waynataj chayta uyarispa, llaquiska puriporkan, imaraycuchus payka sinchi khapaj carkan.
23 Jesús discipuloncunaman nerkan:
—Segurayquichis, khapajcunaka ñac'ayta yayconkacu Diospaj gobiernonmanka. 24 Ujtawan niyquichis, camelloraj agujapaj ninrinta astawan facilta pasanman, uj khapaj runa Diospaj gobiernonman yaycunanmantaka.
25 Cayta uyarispa, discipuloncunaka astawanraj musphararkancu, nerkancutaj:
—¿Chhicari pillataj salvaska cayta atinman?
26 Jesús paycunata khawarispa, contestarkan:
—Runapaj mana aticojka, Diospaj aticun.
27 Pedrotaj nerkan:
—Nokaycu tucuy imaycuta sakempuycu kanwan purinaycupaj. ¿Imatataj jap'ekasajcuri?
28 Jesustaj paycunaman contestarkan:
—Segurayquichis, tucuy imapas mosojyachiska canan tiempo chayamojtin, Tataj Churin sumaj glorioso trononpi tiyaycojtin, kancuna, nokawan purejcuna, chunca iscayniyoj tronocunapi tiyaycullanquichistaj, chunca iscayniyoj Israelpaj miraynincunata juzganayquichispaj. 29 Tucuy runa nokaraycu wasincuta, waukencunata, panancunata, tatanta, mamanta, wawancunata, jallp'ancutapas sakejcunaka pachaj cuti yapaskata wiñay causaytawan jap'ekankacu. 30 Cunan ñaupajpi cajcunamantaka, Diospaj gobiernonpi achqhayoj khepapi cankacu. Cunan khepapi cajcunamantataj, achqhayoj ñaupajpi cankacu.