8
Jesús lepra onkoyniyojta alliyachin
1 Jesús lomamanta urakamojtin, achqha runa paywan cusca purerkancu.
2 Uj lepra onkoyniyoj runa Jesusman chimpaycorkan. Konkoriycuspa, mañacorkan nispa:
—Señor, munaspaka alliyachiway.
3 Jesús llanqhaycuspa, nerkan:
—Munani, alliyaska cay.
Runataj chhicapacha alliyaporkan.
4 Jesús nerkan:
—Uyariway, ama ni piman willanquichu. Puriy, sacerdoteman ricuchicamuy. Ofrendata koy Moisespaj mandacuskanman jina, tucuy runa alliyaskaña caskayquita yachanancupaj.
Jesús capitanpaj uywacuskanta alliyachin
5 Jesús Capernaum llajtaman yaycojtin, uj capitán romano chimpaycuspa rogarkan.
6 Nerkantaj:
—Señor, wasiypi uywacuskay onkoska, such'uyapun, sinchi nanaycunata sufrichcan.
7 Jesús contestarkan:
—Purisaj, alliyachimusaj.
8 Capitantaj contestarkan:
—Señor, mana nokaka wasiyman yaycunayquipaj jinachu cani. Nillay, uywacuskayka niskayquiwan alliyaponka.
9 Noka quiquiy curajcunapaj mandonpi cani. Jinallatataj soldadoycuna mandoypi can. Ujninta ‘puriy’ nini, purin. Ujnintataj ‘jamuy’ nini, jamun. Uywacuskayta imallatapas ‘ruway’ nejtiy, ruwan.
10 Jesús chayta uyarispa muspharkan. Katejnin runacunata khawarispataj, nerkan:
—Segurayquichis, cay jina athun creeyniyoj runata mana Israelpipas tarinichu.
11 Niyquichis, inti llojsimuynejmanta, inti yaycuynejmantawan achqhayoj jamuspa, janaj pacha Diospaj gobiernonpi tiyayconkacu Abrahamwan, Isaacwan, Jacobpiwan miqhunancupaj.
12 Diospaj gobiernonpi canancu carkan chaycunataj tutayajman wijch'uska cankacu; chaypi wakankacu, nanaymanta quiruncuta c'ariris nispa c'uturacuspa.
13 Chaymanta Jesús capitanman nerkan:
—Wasiyquiman puripuy, creeskayquiman jina ruwaska cachun.
Uywacuskantaj chhicapacha alliyaporkan.
Jesús Pedropaj suegranta alliyachin
14 Jesús Pedropaj wasinman purerkan. Chaypitaj Pedropaj suegranta calenturawan onkoskata tariparkan puñunapi.
15 Jesús maquinmanta llanqhaycojtin, calenturan thaniporkan. Paytaj jatarispa, paycunata atendiyta kallarerkan.
Jesús achqha onkoskacunata alliyachin
16 Ch'isiyaycuytaña achqha sajra espirituyojcunata Jesusman apamorkancu. Jesustaj ujta parlarkospalla sajra espiritucunata katerkorkan. Alliyachillarkantaj tucuy onkoskacunata.
17 Cayka pasarkan profeta Isaiaspaj niskan junt'acunanpaj: “Pay quiquin qhuyay cayninchiscunata kechorkan, onkoyninchiscunatataj aparkan.”
Jesuswan puriyta munajcuna
18 Jesús achqha runata muyurejpi ricuspa, discipuloncunaman nerkan: “Kocha chimpaman puriychis.”
19 Leymanta yachachej uj runa Jesusman chimpaycuspa, nerkan:
—Yachachej, kanwan puriyta munani maytachá purinqui chayta.
20 Jesustaj contestarkan:
—Zorrocunapaj jutc'uncu can tiyanancupaj, pisketocunapajpas tapancu can; nokapajri ni maypi wasi canchu samaricunaypaj.
21 Ujnin discípulon nerkan:
—Señor, permitiwayraj ñaupajta tataytaraj p'ampaycamunayta.
22 Jesustaj nerkan:
—Nokawan puriy. Wañuskacuna wañuskancunata p'ampachuncu.
Jesús wayrata thanichin
23 Jesús discipuloncunawan boteman yaycuspa puriporkan.
24 Kochapi purichcajtincu, sinchi athun wayra jatarerkan. Ajinamanta boteman unu junt'aycuspa uqhuman chincaycuchipuchcarkan. Jesustaj puñupuska.
25 Discipuloncuna rijch'achimorkancu, nispa:
—¡Señor, salvawaycu! ¡Unuman chincaycapuchcanchisña!
26 Jesús nerkan:
—¿Imaraycutaj sinchita manchachicunquichis? Pisi creeyniyoj canquichis.
Sayariytawantaj wayrata kochatawan c'amispa, thaniycucherkan.
27 Paycunataj musphaspa ninacuchcarkancu:
—¿Imayna runataj cayri, wayrapas kochapas c'amejtin, casunancupajri?
Gadaramanta sajra espirituyojcuna
28 Gadara jallp'aman, Galilea kocha chimpaman chayarkancu. Iscay sajra espirituyoj runacuna sepulturanejmanta llojsimuspa, Jesusman chimpaycorkancu. Sinchi sajra caskancuraycu, chaynin ñanta ni pipas pasayta aterkancuchu.
29 Wajach'acuspa, nerkancu:
—¡Jesús, Diospaj Churin! ¿Ima ruwanayquitaj nokaycuwan? ¿Nokaycu ñac'arichejchu jamunqui, manaraj ñac'arinaycu tiempopi?
30 Carupachapi achqha qhuchicuna miqhuchcarkancu.
31 Sajra espiritucunataj Jesusta rogarkancu:
—Katerkonawayquichis cajtenka, qhuchicunaman yaycojta dejawaycu.
32 Jesustaj nerkan:
—Puriychis —nispa.
Sajra espiritucunaka runacunamanta llojsipuspa, qhuchicunaman yaycuraporkancu. Qhuchicunataj sayaj khata pataman phawaspa, kochaman chhokaycucorkancu, chaypitaj miquicuspa wañurarkancu.
33 Qhuchi michejcunataj chayta ricuspa, llajtaman phawaspa willamorkancu tucuy ima pasaskanta sajra espirituyoj runacunamanta.
34 Chay llajtamanta tucuy runa llojsimorkancu Jesús cachcaskan lugarman. Taripaspataj rogarkancu chay lugarmanta puripunanpaj.