12
Warmimanta dragonmantawan
1 Janaj pachapi uj athun señal riqhurerkan: uj warmi p'achawan jina intiwan p'istuska, chaquin urapi quillayoj, umanpitaj uj coronayoj chunca iscayniyoj koyllurcunawan.
2 Warmeka onkoj cachcarkan, parto nanaycunamantataj kaparerkan onkocunanpaj ñac'arispa.
3 Chaymanta janaj pachapi waj señal riqhurillarkantaj: uj athun puca dragón kanchis umayoj, chunca wajrayoj, umanpi uj coronayoj.
4 Chupanwan quimsa parte koyllurcunata janaj pachamanta katatispa, jallp'aman jich'aycamorkan. Dragonka onkoj warmipaj ñaupakenpi sayaycorkan, churinta nacichejtin jina okoycunanpaj.
5 Warmitaj uj khari wawata onkocorkan. Chay wawataj tucuy nacioncunata fierro varawan gobernanka. Chay churintaj kechuska carkan, tronopi caj Diosman apaskataj.
6 Warmitaj Diospaj waquichiskan ch'usaj lugarman escaparkan, chaypi miqhuchiska cananpaj waranka iscay pachaj sojta chuncayoj p'unchayta.
7 Chaymanta janaj pachapi uj makanacuy carkan. Miguel sutiyoj curaj ángel angelnincunapiwan makanacorkancu dragón contra paypaj angelnincunapiwan.
8 Chaywanpas mana atipayta aterkancuchu. Manañataj paycunapaj janaj pachapi lugar carkanchu.
9 Ajinaka janaj pachamanta wijch'uska carkan athun dragonka, chay ñaupaj palli, supay Satanás sutiyoj, tucuy runata engañaj. Pay angelnincunapiwan jallp'aman wijch'umuska carkancu.
10 Chhicataj janaj pachapi uj alto vozta uyarerkani, nerkantaj:
“Chayamunña Diosninchispaj salvacionnin,
atiynin, gobiernonpas, Cristopaj
autoridadninpiwan;
imaraycuchus hermanonchiscunata juchachajka wijch'uskaña.
Payka tuta p'unchay juchachaj Diospaj
ñaupakenpi.
11 Hermanonchiscuna juchachajta atipancu
Corderopaj yawar jich'askanwan, paycunapaj
willaskancu evangeliopiwan;
wañuyta mana manchacorkancuchu,
manachayri listo carkancu wañunapaj.
12 ¡Cusicuychis ari, janaj pachacuna,
chaypi causajcunapas!
¡Ay, jallp'api kochapi tiyajcuna,
imaraycuchus supay, pisi tiempollaña caskanta
yachaspa, sinchi phiñaska kancuna contra
purin!”
13 Jallp'aman wijch'uska caskanta ricucuspa, supay dragonka churiyoj warmita katirerkan.
14 Chaywanpas warmiman koska carkan athuchaj ancapaj iscay rijran, paypaj ch'usaj lugarninman jalapunanpaj, supay pallimanta caruman. Chaypi miqhunata konancu carkan quimsa wata sojta quillayojta.
15 Supay palli siminmanta unuta jich'arkan, mayuta ruwaspa warmita apachinanpaj.
16 Jallp'ataj warmita yanaparkan, quicharacuspa supaypaj siminmanta jich'askan unuta ujyaycaporkan.
17 Chaywan supay dragonka warmi contra astawan phiñacorkan. Makanacoj purerkan warmipaj puchoj familiancuna contra, Diospaj mandacuskancuna casucoj contra, Jesuspaj willaskanpi fiel purejcuna contra.
18 Supay dragontaj kocha cantopi sayaycorkan.