10
Roygaptinchikuna Tata Dios yanapawanchisapa.
1 A, Tata Dios,
mallinakuni karuyawashkaykita.
Llakiptini mallinakuni mana yanapawanaykita.
2 Mana alli rurak runakuna sukaman kikinkunalla kreyinakushpankuna
rabyakushpa alli rurak runakunata sufrichinsapa.
Chashna kreyinakushpankunapish
kikinkuna churashkankuna trampallapi urmankasapa.
3 Mana alli rurak runakuna
kikinkunapa munanankunallata rurashpa kawsansapa.
Tukuy layata kikinkunallapa munashpa
Tata Diosta maldisishpa washanchansapa.
4 Chashna washanchashpa kikinkunalla kreyinakushpa rimansapa:
“Manami Tata Dios tiyanchu.
Manami ni pi ruranaynikunata tapuwankasapachu.”
5 A, Tata Dios,
chay runakuna sukaman mana allita rurashpa
chashnalla tukuy tiempu kawsansapa.
Kanpa, Tata Dios, kamachikunaykita
mana nimatashina kawansapa.
Chikninakukmasinkunata
mana kreyishpankuna rabyachinsapa.
6 Yuyansapa mana ni pi atipananta
chashna kawsanankunamanta michayta.
Rimansapa mana nimapi sufrinankunata.
7 Chaykunata rimashpa sukaman maldisikunsapa
llullakunsapa llullachikunsapa.
Runamasinkunata rabyachishpa sufrichinsapa.
8 Llaktankuna washapi mana nimanachik runata chapashpa
pakallalla wañuchinsapa.
Mana amachanakuy atipak runakunata kawashpa
shuyansapa wañuchinankunapa.
9 Chay mana alli rurak runakuna
pumakunashina machayninpi pakakudunkunamanta
mana amachanakuy atipak runakunata chapansapa.
Chapashpa shuyansapa imay orami apinkasapa nishpa.
Chashna apishpa munashkankuna layata paykunata ruransapa.
10 Pumakunashina pakchanakushpa takshayansapa
mana amachanakuy atipak runakunata apinankunapa.
11 A, Tata Dios,
chay runakuna yuyansapa
kan mana alli ruranankunata kunkanaykita.
Yuyansapa uyaykita wichkashpa mana kawanaykita.
12 A, Tata Dios, atarimuy. Yanapawaysapa.
Ama sufrik runakunata kunkaychu.
13 A, Tatayni Dios
¿imapatí mana alli rurak runakuna
burlata rurashunkisapa?
Paykunaka yuyansapa kan mana kastigakunaykita.
14 A, Tata Dios,
kikiki kawashkanki
sakra mana allikunata ruraptinkuna.
Chayrayku paykunata kastiganayki tiyan.
Chashna kastigakuk kaptiki
mana amachanakuy atipak runakuna
kanta maskashunkisapa amachakunaykipa.
Kanmi tukuy wakcha runakunata yanapankisapa.
15 A, Tata Dios,
chay mana alli rurak runakunata kastigaysapa
amana sufrichikushpa kawsanankunapa.
Tukuy paykunata kastigaysapa kullunankunakaman.
16 Kanmi, Tata Dios, mana tukuyniyukta kamachikunki.
Mana kreyishuk runakunata llaktankunamanta wishchunkisapa.
17 A, Tata Dios,
mana kikinlla kreyinakushpa kuyashuk runakuna
roygashuptinkuna uyarinkisapa.
Paykunata animuchishpa yanapankisapa.
18 A, Tata Dios,
tukuy wakchakunata sufrik runakunata yanapaysapa
wañuy yachak runakuna
amana runamasinkunata sufrichinankunapa.