HEBREOS
Hebreosbi kallari parluguna
Kai libroda maijin escribishkadaga na yacharinchu. Ashtanbish Alli Shimida uyusha crij israelgunamumi escribishka yuyachin. Kaibiga Jesusta crinaga ñauba crishkagunadash yalli gashkada rikuchin.
Shuj yachanagunaga kaibi tiyan: Diosbuj Churiga angelgunadash yallimi (1.1-24), Jesús Dioslladi gashash kai pachamu shamushaga genteguna shinami tukuga (2.5-18), Diosbuj samanamu waigungaj Pai ima nishkada uyasha kazuchun (3.7-19), ñukuchi imabi jawalla urmakish Jatun Mandaj Curaga llakirijmi (4.14-16), shuyana yuyimi ñukuchij almada ashtan jinchi charirigun (6.13-20), kunun p'unllagunaga Jesús jawa pachabi ñukuchimunda mañagun (7.25), Cristo ñukuchimunda kushka yaurllami yalli valin (9.11-28), crishkamundami ñauba taitagunaga Dios <Alli> nishkaguna gaga (11.1-40), Mandajka ñukuchidaga na shaikurishalla katichunmi riman (12.1-13).
1
Dios Paibuj Churida parlachun kachushkamunda
1 Sarungunaga ñukuchij ñauba taitagunamu tauga kutin tuki laya ninagunan parlachunga Dios Pai nishkada parlujkunamumi parlachishka,
2 ashtan kunun kai tukuri p'unllagunabi ñukuchimu parlachunga Paibuj Churidami kachashka. Paimundami kai pachabish jawa pachabish tuki ima tiyashkada rurashka, shinaidi Paimumi tuki japinada kuga.
3 Dios k'uilla p'alaniguj Pai ima shina gashkadash Paibuj Churilladimi rikuchin. Shinaidi Pai tukida ruri pudijlla parlarishkanmi tukida charirigun. Ñukuchij juchagunada p'ichashka k'ipaga jawa pachabi Dios tiyana alli ladubimi tiyariga.
Churiga angelgunadash yalli gashkamunda
4 Angelgunaj shutigunadash yalli k'uilla kushka shutida japishkamunda Diosbuj Churiga paigunadash yallimi tukuga.
5 Diosga ima urash maijin angel-lladash,
“Kanmi Ñukaj Churi gangui.
Kununmi Ñuka Kambuj Taita tukugani,”
nishaga na nigachu. Shinalladi maijin angel-llamundash,
“Ñukami Paibuj Taita gasha, shinaidi Paimi Ñukaj Churi ganga,”
nishaga na nigachu.
6 Ashtanbish Diosga Paibuj shujlla ligítimu Churida kai pachamu rijsichishaga,
“Tuki Diosbuj angelguna Paida <Allimi gangui> nichun,” nishkami.
7 Diosga angelgunamundaga,
“Paibuj angelgunadaga waira shinada shinaidi kutin Paibujllada rurajkunadaga
rupaguj nina shinadami ruran,” ninmi.
8 Paibuj Churimundaga,
“Kanga na tukuribuj ima urash na tukuringama Mandaj Diosmi gangui,
shinalladi chi Kambuj mandana varan mandushkaga kabishkada rurujmi gan.
9 Kabishka ruranada k'uyusha milligunada p'iñashkanguimi.
Shinushami Diosga, Kambuj Diosga, Kanmu umabi asha aceiteda churasha agllasha
Kangun igulda purijkunamu kushka kushida yalli jatun kushida kushka,” ninmi.
10 Kutin ninmi,
“Kan, Mandujllami, kallarimunda tuki kai pachada alli allida ruragangui.
Kambuj makillandimi jawa pachadash ruragangui.
11 Tuki kaiguna tukuringami, shinash Kanga kausagunguillami.
Tuki chigunaga churana shinami tukuringa.
12 Chigunadaga churanada patarij shinash ruranguimi;
shuj churanada cambiasha churaj shinash ruranguimi.
Shinash Kanga shinalladimi katigungui.
Kambuj kausana watagunash na tukuringachu.”
13 Diosga maijin angelgunalladash,
“Kanda na rikunachijkunada kambuj chaki sarunabi
Ñuka churungagama Ñukaj alli ladubi tiyari,”
nishaga manalladi nigachu.
14 ¿Nachu tuki angelgunaga Dios nishkada ruruj, shinaidi kishpichinada japinagunada ayudachun kachashkaguna gan?