8
Señor Jesucristoga, tsay mushog conträtupag mas mandacug sacerdötim
1 Llapan willayangagpitapis cay yachatsicuymi masga välen: Llapan sacerdöticunapa mas mandagnin Señor Jesucristo Dios Yayapa derëchucag lädunchö jamaycur sacerdötintsic capamangantsicpita.
2 Señor Jesucristoga imayca sacerdötinömi cieluchö Dios Yayapa rasumpacag templunchö serviycan. Tsay cieluchö templuta quiquin Dios Yayam rurashga manam runacunatsu.
3 Llapanpis sacerdöticunapa mandacugnincunaga, Dios Yayaman garaycunata gararnin wätacunata wañutsir waycayänanpag acrashgam cayan. Tsaymi Señor Jesucristopis ima garayllatapis Dios Yayata garanan convienin.
4 Si Pay cay patsachö carga, manach sacerdötitsu canman cargan, israelcunapa templunchö sacerdöticuna caycäyaptinnaga. Tsay sacerdöticunaga Moisés gellgangan ley ningannöllam Dios Yayapag ofrendata churarnin garaycunata apaycäyan.
5 Cay patsa templuchö sacerdöticuna serviyanganga, cieluchö Dios Yayapa templunpa imayca llantun ricugllam. Tsaymi Moisés carpapita Dios Yayapag santo templun rurananpag caycaptin, Dios Yaya nirgan: “Templöta ruranayquipag entenditsirniqui, Sinaí jircachö ricätsingagnölla ruranqui” nir.
6 Pero Señor Jesucristoga cieluchö Dios Yayapa templunchömi servin, cay patsachö sacerdöticunapa conträtunpitaga juc mas allicag conträtuwan. Paymi quiquin cruzchö wañurnin, Dios Yayawan runacunata amistatsishga. Tsaymi Señor Jesucristopa mushogcag conträtunga mas allish, Dios Yayapa mas allicag conträtu änicunganman churashga captin.
7 Si Moiséspa tiempunchö conträtu rasumpa alli cashga caycaptinga, gepacag mushog conträtuga mananam rantin cananpag wanashwannatsu cargan.
8 Pero Dios Yayaga tsay tiempu runacuna mana allicunallata ruraycäyanganta ricarmi nirgan:
“Chämungam junagcuna Israel casta runacunawan Judá casta runacunawanpis juc mushog conträtu änicungäta cumplinäpag” ninmi Dios Yaya.
9 “Cay mushog conträtu rurangäga
manam unay awiluyquicunawan rurangänötsu canga.
Paycunatam Egipto marcapita jorgamur,
imayca maquipita jancharcur apagnö pushargä.
Pero paycunawan conträtu rurangä mandamientücunata
mana cumpliyaptinmi jagesquirgä” ninmi Dios Yaya.
10 “Tsaynö captinmi, tsay junagcuna päsasquiptin Israel castacunawan
mushog conträtuta rurashag” ninmi Dios Yaya.
“Israel runacunapa yarpaynincunawan shongoncunamanmi,
imayca gellgagnö llapan leynïcunata churashag.
Tsaymi sïga paycunapa Diosnincuna cashag
y paycunanam criyicug marca runäcuna cayanga.
11 Tsaynöpam paycunaga llapan regeyämanga,
ichicagpita gallaycur asta mas auquincagcunayag.
Tsaynöllam regeyämanga wactsa umildecagcunapita gallaycur
asta mas mandacuyyogcagcunapis.
Tsaymi manana ni mayganpis
runamajincunatawan waugencunatapis yachatsiyanganatsu
‘Dios Yayata regeyay’ nirga.
12 Llapan mana alli ruraynincunata perdonarmi,
jutsancunata ni imaypis masga yarparäshagnatsu.”
13 Tsaymi Dios Yaya cay conträtuga “mushogmi” nir, tsay puntacag conträtutaga auquisyarnin päsashgatanö mana servigpag churashga. Tsaynö captinmi ichicllana faltan puntacag conträtu illacänanpag.