HEBREOS
Jesucristuman criyicog Israel runacunapä carta
Manam musyaytsu cay libruta pï gellganganpis. Waquin runacunaga yarpäyan Bernabe gellgangantam (Hechos 4.36; 13.1-4). Waquincunanam yarpäyan Apolos gellganganta (Hechos 18.24; 1 Corintios 1.12; 3.4-pita 6.22-yag). Waquinnam yarpäyan juc runa cay libruta gellganganta. Pï carpis cay librutaga gellgargan Israel runa car Jesucristuta chasquicog Israel mayincunapämi.
Cay libru musyatsimantsic Jesucristo poderösu cangantam. Payga angelcunapitapis (1.5-pita 2.18-yag), profëta Moisespitapis (3.1-pita 4.13-yag), y mandacog sacerdöticunapitapis (4.14-pita 5.10-yag; 7.1-28) mas imaycawan munayyogmi. Tsaynömi cay libru musyatsimantsic Tayta Dios salvamänantsicpä mushog conträtuta nogantsicwan ruranganta (8.1-13). Tsaynömi musyatsimantsic ashmacunata altarchö rupatsiyänanpa rantin Jesucristuman criyicullar jutsa ruraypita perdonacäyänanpä cagta (9.1-pita 10.18-yag).
Tsaypitanam tantiyatsimantsic Jesucristuman nagana yäracurga mana dejaypana yäracunantsicpä (5.11-pita 6.20-yag; 10.19-39). Tsaynömi cay libru tantiyatsimantsic imanö ñacarpis Tayta Diosman imaypis yäracunantsicpä (11.1-pita 12.29-yag). Y mascunatam cay libroga yachatsicun (13.1-25).
1
Tayta Diospa tsurin Jesucristo poderösu
1 Unayga profëtacuna imaycanöpam Israel runacunata tantiyatsiyargan Tayta Dios ningancunata.
2 Cananga Diospa tsurin Jesucristunam tantiyatsimantsic Tayta Dios ningancunata. Jesucristuwanmi Tayta Dios camargan cay patsatapis ciëlutapis. Tsaymi paypa maquinman churashga imaycatapis munayninchö tsaränanpä.
3 Tayta Diospa tsurin Jesucristoga Diosnintsicmi. Paymi llapan camangancunataga poderninwan tsararaycan mana ushacänanpä. Jutsantsiccunata Tayta Dios perdonamänantsicpä cruzchö wanurninmi gloriaman cutirgan. Cananga Tayta Diospa derëcha cag lädunchömi imaycatapis maquinchö tsarararnin jamaraycan.
Jesucristo angelcunapitapis mas puëdeg cangan
4-5 Tsaynö carmi Tayta Diospa tsurin Jesucristoga llapan angelcunapitapis mas puëdeg caycan. Jesucristutaga Tayta Dios nishga caynömi:
“Gamga cuyay tsurïmi canqui.
Tsaymi gamta churä imaycawan munayyog canayquipä” nir.
Tsaynöllam mastapis nirgan:
“Nogaga gampa taytayquim cä, y gammi nogapa tsurï canqui” nirnin.
Tsaynöga manam maygan angeltapis nirgantsu.
6 Tsaynöllam tsurin Jesucristupäga gloriaman cutiptin Tayta Dios nirgan:
“Llapan angelcunapis payta adorayätsun” nirnin.
7 Angelcunapäga Diospa palabranchö caynömi nican:
“Angelcunata ticratsï vientuman carpis o ninaman carpis noga munangäta rurayänanpämi” nir.
8 Tayta Diospa tsurin Jesucristupämi itsanga nican:
“Gamga Dios carmi imayyagpis maquiquichö imaycatapis catsinqui.
Gamga pitapis cläru cagllatam juzganqui.
9 Gamga munanqui llapan runacunapis munangänö allillata rurar cawayänanta.
Tsaymi noga taytayqui car gamta churargö imaycawanpis munayyog canayquipä.
Gamnö munayyogga manam pipis cannatsu.
Tsaynö carmi imaypis cushicunqui”.
10 Tsaynömi Señornintsic Jesucristo cay patsata y ciëluta camashga captin Diospa palabranchöga caynöpis nican:
“Señor, imaycawan munayyog carmi cay patsatawan ciëlutapis quiquiqui camarguyqui.
11-12 Llapan camangayquicunaga röpa ushacäregnömi ushacanga.
Llapan tsaynö ushacaptinpis gammi itsanga imayyagpis cawaycanquilla”.
13 Manam maygan angelcunatapis Tayta Dios ni imay nishgatsu tsurin Jesucristuta ningannöga. Tsurintaga nirgan:
“Jamacamuy derëcha cag lädüman nogawan iwal mandacog canayquipä.
Nircurmi llapan chiquishogniquicunata castigar musyacätsishun” nirnin.
14 Peru angelcunataga Tayta Dios churashga Jesucristuta chasquicog runacunata cuïdayänanpämi.