Turpaaina
A pirpir kaapa muga
A buk mi i pirpir kaapa u ra turpaai ra kum utnaa raap. I wapua daat naa God i waki a rakrakaan buaal ma ra maawa, a kum diwaai, a kum wewagua ma i waki daat kaai a taara kupi daat a welaar ma ra malalarina.
I wapua daat kaai naa i pilak paa Aabaraam ma ra nuna wuna taara kupi diat a waan paat a taara anun God.
A buk mi in wapua daat naa a taara diat paam a mongoro naa utnaa baa pa i koina. God i baboi ma i taar a naagagon karom diat, iaku i waraaut kaai a taara kupi diat a nunurai ma diat a nurnur uni.
A winawaan i ra buk Turpaaina:
God i waki a rakrakaan buaal (1:1—2:25)
A taara diat puka u ra aakaina mangamangaan (3:1-24)
Aadaam tuk Noaa (4:1—5:32)
Ina lomon (6:1—10:32)
A Tadaaru i walaklagon a pirpir anu ra taara (11:1-9)
Sem tuk Aabaraam (11:10-32)
A lalaaun anun Aabaraam, Aaisaak ma Iaakob (12:1—35:29)
A wuna taara anun Esaau (36:1-43)
A lalaaun anun Iosep ma ra kum tatena liklik (37:1—45:28)
A kum taara Israael diat ki irong Aaigipto (46:1—50:26)
1
U ra turpaaina
1 U ra turpaaina God i waki a maup ma a rakrakaan buaal.
2 Ma i laklagon ma pa ta utnaa uni, ma a baboto i burung baat a ngaala na polo. Ma a Nion God i rowo taltalili nate u ra polo.
3 Ma God i piri naa, “A kaapa in waan paat.” Ma a kaapa i waan paat.
4 God i baboi naa a kaapa i koina ma i weraana wa a kaapa ko ra baboto.
5 Ma God i waatung a kaapa baa “keke,” ma a baboto i waatungi baa “marum.” A bung na keke ma ra bung na marum ia raap. Io, a mugaana bung ia waan.
6 Ma God i piri naa, “Raa utnaa in waan paat kupi in weraana polo kupi in rudi.”
7 Io, God i paam a utnaa maa kupi in weraana wa a polo baa i ki napia ko ra polo baa i ki nate. Ma i waan paat lenutmaa.
8 God i waatung a utnaa maa “a maup.” A bung na keke ma ra bung na marum ia raap. Io, a weru bung ia waan.
9 Ma God i piri naa, “A polo natudaangi ra maup in waan ungaai un raa wanua ma a pia in waan paat.” Ma i waan paat lenutmaa.
10 God i waatung a utnaa mi baa i mamaa paat naa “a pia.” Ma a polo baa i ki ungaai taau i waatungi baa “a pakaana taai.” Ma God i baboi naa i koina.
11 Ma God i piri naa, “A kum aalawur mangaana diwaai ma ra wali in tawa paat ko ra pia.” Ma i waan paat lenutmaa.
12 A diwaai ma ra wali i tawa paat ko ra pia. Ma God i baboi naa i koina.
13 A bung na keke ma ra bung na marum ia raap. Io, a wetula bung ia waan.
14 Ma God i piri naa, “A kum kaapa diat a waan paat u ra maup kupi diat a weraana a keke ma ra marum ma diat a wakilang a kum bungbung, a kum kalkalaang ma a kum kilakilaala.
15 Ma diat a kup u ra maup kupi diat a wakaapa a rakrakaan buaal.” Ma i waan paat lenutmaa.
16 God i paam paa a ru ngaala na kaapa, a ngaala aakit kupi in naagagon a keke, ma ia baa i kinalik taana in naagagon a marum. Ma i paam kaai a kum naangnaang.
17 God i waki ta diat u ra maup kupi diat a wakaapa a rakrakaan buaal,
18 kupi diat a naagagon a keke ma ra marum, ma kupi diat a weraana a kaapa ko ra baboto. Ma God i baboi naa i koina.
19 A bung na keke ma ra bung na marum ia raap. Io, a wewaat na bung ia waan.
20 Ma God i piri naa, “A pakaana taai in teng ma ra kum lalaaun na utnaa ma a kum pika diat a rowrowo nate u ra rakrakaan buaal.”
21 Io, God i waki a kum aalawur ngaalangaala na wewagua u ra pakaana taai. Ma i waki kaai a kum aalawur mangaana lalaaun na utnaa raap baa diat teng u ra pakaana taai. God i waki kaai a kum aalawur mangaana pika. Ma God i baboi naa i koina.
22 God i pir wadaan diat ma i piri naa, “Muaat a babuta ma muaat a wabure muaat ma muaat a wateng a pakaana taai. Ma a kum pika kaai diat a wabure diat u ra rakrakaan buaal.”
23 A bung na keke ma ra bung na marum ia raap. Io, a welima na bung ia waan.
24 Ma God i piri naa, “A kum aalawur mangaana wewagua diat a waan paat kupi diat a lalaaun nate u ra pia: A kum laa na wewagua, a kum wewagua baa diat kakakaa u ra pia, ma a kum lomlom na wewagua.” Ma i waan paat lenutmaa.
25 God i waki a kum aalawur mangaana wewagua raap, a kum lomlom na wewagua, a kum laa na wewagua, ma a kum wewagua baa diat kakakaa u ra pia. Ma God i baboi naa i koina.
26 Ma God i piri naa, “Datul a paam a taara welaar ma datul, ma welaar ma ra malalarindatul. Diat a naagagon a kum ian ko ra pakaana taai, ma a kum pika ko ra maup, ma ra kum laa na wewagua. Diat a naagagon a rakrakaan buaal ma ra kum wewagua raap baa diat lalaaun uni.”
27 Io, God i waki a taara welaar ma ra malalarina.
I waki a muaana ma ra tabuan,
welaar ma ra malalarina ut i waki diat.
28 God i pir wadaan diaar ma i piri taan diaar, “Mur a babuta ma mur a wabure muaat ma muaat a wateng a rakrakaan buaal ma muaat a naagagoni. Muaat a naagagon a kum ian ko ra pakaana taai, a kum pika ko ra maup ma a kum lalaaun na wewagua raap baa diat lalaaun u ra pia.”
29 Ma God i piri naa, “Baboi, iaau tabaara mur ma ra kum waina diwaai raap u ra rakrakaan buaal. Diat maa mur a wangaan kon diat.
30 Ma karom a kum wewagua, ma ra kum pika ko ra maup, ma ra kum wewagua baa diat kakakaa u ra pia, karom diat raap baa diat lo a dadaip na lalaaun iaau tabaara diat ma ra wali ma ra kum dondona gilaai baa andiat utnaa na winangaan.” Ma i waan paat lenutmaa.
31 God i babo a kum utnaa raap baa ia paam taai. Ma i baboi naa i koina aakit. A bung na keke ma ra bung na marum ia raap. Io, a we-6 na bung ia waan.