3
A punuka anu ra taara
1 Io, ina wui ia raa ngaala na tena manaana u ra warwaruga ko ra kum lomlom na wewagua raap baa a Tadaaru God ia waki pa diat. Ina wui i tiri a tabuan, “I dowot ut maa God i piri naa koku mur wangaan ko ra kum diwaai raap u ra wanua mi?”
2 A tabuan i baalui naa, “Mir a wangaan ko ra kum diwaai raap,
3 iaku raain diwaai ku kuri naliwan baa God i piri naa koku mir wangaan koni, ma koku utkaai mir paami, kaduk mir a maat.”
4 Iaku ina wui i piri taa ra tabuan, “Painte, pa mur a maat.
5 God i piri lenmaa kabina i nunurai naa baa mur a wangaan koni, a mataamur in tapalaa, ma mur a welaar mulu ma God ma mur a nunura a koina ma ra aakaina.”
6 A tabuan i babo in diwaai baa waina i babo wakwakaak ma i koina aakit kup a winangaan, ma i koina kaai kupi din lo a manaana koni. Io, i lo paa raa kum waina diwaai ma i aani ma i taar taa kaai raa mangaan taa ra nuna muaana baa kuraa ut i tur naana, ma ia kaai i aani.
7 Io, a kiok na mataandiaar i tapalaa, ma diaar babo lele paai naa diaar towaturia. Io, diaar ingit ungaai paa a kum dondona fig, ma diaar gopi.
8 U ra bung na maluraap maa, baa i madiring a buaal, diaar waana walangoro paa a Tadaaru God baa i waan waanwaan nabalaara wanua, ma diaar paraau koni naliwan u ra kum diwaai.
9 Ma a Tadaaru God i wewataai ma i piri taa ra muaana, “Kuraa ui awaai?”
10 A muaana i baalui naa, “Iaau walangoro pa ui baa u waan urin, ma iaau burut ma iaau paraau kon ui, kabina maa iaau towaturia.”
11 God i tiri naa, “Woi maa i piri taam naa u towaturia? Lelawaai, u aa wangaan paa ko rin diwaai baa iaau piri naa koku u wangaan koni?”
12 A muaana i baalui naa, “A tabuan baa u waki taai karom iaau, i taar taa kum waina diwaai taang ma iaau aan paai.”
13 A Tadaaru God i tiri a tabuan, “Aawa mulu mi u aa paam taai?” A tabuan i baalui naa, “Ina wui i waruga ta iaau uni, ma iaau aani.”
14 Ma a Tadaaru God i piri karom ina wui naa,
“Ang taar a naagagon na binabaalu taam,
kabina u ra utnaa mi u aa paam taai.
Ui ot ku ko ra kum wewagua raap,
a kum laa na wewagua ma ra kum lomlom na wewagua,
un lo a naagagon na binabaalu mi.
Turpaai umari un laana kakaa ma ra in balaam,
ma un laana aan a kabu
u ra kum bungbung raap u ra num kinkini na lalaaun.
15 Anung naagagon karom ui
baa mur ma ra tabuan mur a nget wetalaai mur,
a kum taptabu ra tabuan ma a kum taptabum kaai diat a ki na ebaar.
A tabu ra tabuan in paa ginagina in lorim ma ui un karaat a kakina.”
16 Ma God i piri taa ra tabuan,
“Anung naagagon na binabaalu karom ui,
baa un kipbaala un kariaana a kum mawaat,
ma u ra bung baa un babuta un kariaana a ngaala na ngunungut.
Iaku anum ngaala na nemnem kup anum muaana in ki ut,
ma ia ut in naagagon ui.”
17 Ma God i piri taa ra muaana,
“U walangoro paa anum tabuan ma u wangaan ko ra in diwaai baa iaau piri naa koku u wangaan koni.
Io, anung naagagon na binabaalu in ki u ra pia,
kabina u ra utnaa baa u aa paam taai.
Un laana papaam dekdek kup a maam winangaan,
ma un kariaana a ngunungut uni a kum bungbung raap u ra num kinkini na lalaaun.
18 Kum barudu ma ra kum katkadaa diat a tawa paat u ra maam wanua,
ma un papaam dekdek kupi un wangaan ko ra wai ra kum diwaai baa u aa maarut paai.
19 Un laana papaam dekdek ma un wangaan ko ra maakmaagonim,
tuk un maat, io, un waan talili balet kup a pia, baa di aa paam pa ui koni.
Di paam ui ko ra pia, io, un waan talili balet kup a pia.”
20 Aadaam i taar a iaa ra nuna tabuan baa Iwa, kabina maa ia naa ra kum taara raap baa diat a lalaaun.
21 A Tadaaru God i paam maalu ko ra pani ra wewagua ma i wagop taa Aadaam diaar waana mai.
God i lu wa Aadaam ma Iwa ko ra wanua Iden
22 A Tadaaru God i piri lenbi, “Baboi, a muaana ia waan paat welaar ma datul ma ia manaana u ra koina ma ra aakaina. Koku di maadek taai kupi in lo ta wai ra in diwaai na lalaaun, kaduk in wangaan koni ma in lalaaun takum.”
23 Io, a Tadaaru God i lu wa Aadaam ma Iwa ko ra wanua Iden. Ma Aadaam i papaam u ra pia baa God i paam paai koni.
24 Baa God i lu wa diaar, i ung taa a kum aangelo ma ra in liwan baa i kupkup u ra papaara taubaar u ra wanua Iden. Ma in liwan maa i papakaat taltalili kupi in tur baat a taara baa koku diat waan marawaai naa ra in diwaai na lalaaun.