49
Iaakob i pir wadaan a kum natnatuna
1 Namur Iaakob i wetulaa kup a kum natnatuna ma i piri lenbi, “Muaat a waan ungaai urin ma ang wapua muaat u ra aawa baa in waan paat un muaat u ra kum bungbung kuri namuga.
2 A kum natnatung, muaat a tur ungaai
ma muaat a walangoro iaau,
a tamaamuaat Iaakob.
Muaat a walangoro a tamaamuaat Israael.
3 “Ruben, ui a mugaana natunglik,
ui a dekdeking,
ui a mugaana wakilang i ra dekdeking.
Ui a ngaala baa a taara diat urur karom ui,
a dekdekim i ngaala aakit.
4 U welaar ma ra in aal na daanim baa i dekdek aakit,
baa pa te in paam kado paai.
Iaku, pa un lo ma a kini na munuga,
kabina maa u inep ungaai ku bulung ma ra nung taulaa,
pa u ru a baang.
5 “Simion ma Lewi diaar tenalik.
Anundiaar ruin liwan na wineium
pa diaar ngo ma ra wineium.
6 Pang tur ungaai ma diaar baa diaar wepaak
un ta utnaa baa diaar a paami.
Pang taraam u ra nundiaar kum ninunuk,
kabina maa diaar aa aak doko wa mongoro na muaana
u ra nundiaar kaankaan,
ma diaar bur a kum kaki ra kum karabaau
u ra nundiaar kum gaaia biaa ku.
7 A naagagon karom diaar in aaka aakit,
kabina u ra nundiaar kum kaankaan.
Maa anundiaar mangaana kaankaan pa ta maarmaari uni.
Iaau ang weraana wa a kum natnatundiaar,
ma diat a ki werweraan.
Diat a ki werweraan naliwan karom a taara Israael raap.
8 “Iuda, a kum tatem liklik diat a pir walaawa pa ui.
U ra ru limaam un uwia paa anum kum ebaar.
A kum tatem liklik diat a ki but keke karom ui.
9 Iuda, u welaar ma ra baarmaan na laaion.
Natunglik, u welaar ma ra laaion baa i waan talili ko ra aan wirua,
ma i inep wowowon,
welaar ma ra tabuan na laaion baa pa te in pet reke taau naana,
kaduk in kaankaan.
10 Ina buka na king pa in waan kon Iuda.
Ina buka na king pa in kakaraai ko ra nuna wuna taara,
tuk baa ia baa anuna ina buka maa in waan paat,
ma a kum taamtaamaan raap diat a taraam karomi.
11 Anuna mongoro na diwaai na waain aakit,
io, in do biaa ku anuna dongki u ra kum diwaai na waain.
In do biaa ku a naat na dongki u ra kum kokoina gagaana waain.
Ma in gi maku anuna maalu u ra polo na waain,
anuna iokaana maalu na minong
u ra polo na waain baa i taar.
12 A ruin kiok na mataana in taar dekdek
taa ra polo na waain,
ma a kaba lakono kaai in kabaang dekdek
taa ra polo na tu i ra bulumakaau.
13 “Sebulon in lalaaun nakono,
ma anuna ina waalwaalian
in koina ololo anu ra kum paraau.
A tuktuk i ra nuna pia in marawaai
naa ra taamaan Sidon.
14 “Isaakaar i welaar ma ra dekdek na dongki,
baa i inep pari naliwan u ra nuna ru kaa na nilalo.
15 Baa i baboi naa i koina aakit anuna wanua na ningo,
ma i koina aakit anuna pia,
in taar taa a pupuakina kupi in lo a kum mawaat,
ma in wakinalik paai karom te baa in wowo taai
kupi in papaam karomi.
16 “Daan in naagagon anuna taara,
maa diat kaai kon diat a taara Israael.
17 Daan i welaar ma ra ina aakaina wui u ra papaara aakapi,
baa in karaat a kaki ra os,
kupi ia baa i kaa u ra os in katuk tataada unamur.
18 “Tadaaru, iaau ki walaang kup anum warwalaaun.
19 “Gaad, a kikil na taara na winalong
diat a tur na wineium kupi,
iaku in um diat ma in lu diat.
20 “Aaser, ana pinapaam in wa wakaak,
a kum utnaa na winangaan maa in topaa a king.
21 “Naaptaali in welaar ma ra lomlom na diaa,
baa i murmur anuna nemnem.
Ma i buta paa a kum wakwakaak na naat.
22 “Iosep, in welaar ma ra in diwaai na waain
baa i wa mongoro na waina,
ain diwaai na waain baa i tur marawaai naa ra daanim,
ma a kum gagagaana i kakaa bolo u ra liplip.
23 A kum tena papanaak diat a weium dekdek ungaai mai,
diat a weium ma diat a nem na baanaakakai.
24 Iaku anuna panpanaak kaai pa in ngo paa.
A ru dekdek na limaana pa diaar a bilua,
kabina u ra wewaraaut anun God karomi,
a Dekdek na God anun Iaakob,
a Tena Baboura, ia a Waat Ki anun Israael.
25 Maa God anun tamaam in waraaut ui,
God baa i Dekdek Aakit in pir wadaan ui.
In taar a baata welaar ma ra wetabaar ko ra baakut,
ma in wadaan ui ma ra palaa ko ra pia.
In tabuan diat a daan,
ma diat a babuta.
26 A pir wadaan anun tamaam karom ui
i ngaala aakit,
i ngaala taa ra pir wadaan
baa i waan paat ko ra kum taangaai taanga namuga,
ma i ngaala taa ra utnaa u ra kum taangaai
baa diat tur takum.
A kum pir wadaan raap mi in ki un Iosep,
ma anuna kini na ngaala i ngaala taa ra kum tatena liklik.
27 “Beniaamin i welaar ma ra karangaap na paap
baa i karangaap dekdek.
U ra malaana i um anuna kum ebaar
welaar ma ra karangaap na paap
baa i aan a utnaa baa ia lebe paai.
U ra maluraap i weraana a utnaa
baa ia raa paai kon diat.”
28 Bi ia 12 wunwuna taara raap anun Israael ma mi ia kum pirpir baa tamaandiat i piri taan diat baa i pir wadaan diat. I pir wadaan a kum natnatuna ma ra pir wadaan baa i topaa diat raaraa.
A minaat in Iaakob
29 Ma Iaakob i pirpir karom diat lenbi, “Iaau waninaar ma baa ang maat, ma ang ngo welaar ma ra nung taara baa diat maat muga taang. Muaat a punang iaau ungaai ma ra kum tamtamaang u ra maata na waat u ra pia anun Epron, a te Ket.
30 A maata na waat maa kurong u ra pia Maakpelaa, marawaai Maamre irong Kaanaan. Aabaraam i kul paai ungaai ma ra pakaana pia kon Epron a te Ket, kupi din punpunang minaat iaai.
31 Matira di punang Aabaraam ma Saaraa anuna taulaa, di punang kaai Aaisaak ma Rebekaa anuna taulaa, ma iaau kaai iaau punang Leaa iaai.
32 A pia ma ra maata na waat maa, di kul paai ko ra taara Ket.”
33 Baa Iaakob ia pirpir raap karom a kum natnatuna, i ung tato a ru kakina unate u ra baana. Ma i lo paa a tintinip na dadaip ma i ngo welaar ma ra nuna taara baa diat maat muga taana.