8
Iesu anundaat mukmuga na tena wetabaar u ra matakina kunubu
1 Bari ia a ngaala na utnaa baa miaat aa pirpir paa uni: Ia baa ia ki u ra papaara ot na limaa ra kiki anun God, a ngaala na King aakit inaanga u ra maawa, ia maa anundaat mukmuga na tena wetabaar karom God.
2 I papaam karom God inaanga u ra maawa u ra pakaana baa i Taabu Aakit u ra ruma na wetabaar. Ia a ruma na wetabaar lingtatuna, baa a Tadaaru ut i paami ma wakir a taara diat paami.
3 A kum mukmuga na tena wetabaar raap karom God, God i ung ta diat kupi diat a taar taa a kum wetabaar ma diat a tun a kum wewagua kupi a wetabaar karomi. Lenmaa i mawaat kupi Iesu anundaat mukmuga na tena wetabaar in wetabaar kaai ma ta utnaa.
4 Baa gun in ki min napia, pa in tena wetabaar karom God, kabina maa raa kum tena wetabaar kuri ut diat napia, ma diat laana taar a wetabaar welaar ma ra kum Naagagon anun Moses.
5 A pinapaam na wetabaar diat laana paami u ra ruma na wetabaar. A ruma maa i welaar ku ma ra malalar i ra ruma inaanga u ra maawa. Bi ia kabina baa God i watumaarang Moses, baa i waninaar kupi in paam a ruma na sel baa diat a tuntun wetabaar uni. I piri taana lenbi, “Babourai! Un paam a kum utnaa raap, welaar ut ma ra malalar i ra ruma baa iaau aa waiaa taai taam inaanga u ra taangaai.” Pin 25:40
6 Iaku Iesu ia lo paa a pinapaam na tena wetabaar baa i ngaala aakit taa ra pinapaam na wetabaar anu ra kum tena wetabaar. Lenkaai maa a kunubu baa Iesu ia paam ot paai kupi in aal ungaai God ma ra taara, i ngaala aakit taa ra mugaana kunubu. A kum weweliman baa diat a kabi ra kunubu maa, diat koina aakit taa ra kum mugaana weweliman.
7 Baa gun a mugaana kunubu i takado aakit, io, pa ta niba ma kup te balet.
8 Iaku maa God i baboi naa aakaina mangamangaan i ki utbaai karom a taara ma i piri lenbi,
“A Tadaaru i piri naa: Baboi, a kum bungbung diat a waan paat,
baa ang paam a matakina kunubu
ma ra taara Israael
ma ra taara Iuda.
9 Pa in welaar ma ra kunubu
baa iaau paami ungaai ma ra kum taptabundiat
u ra bung baa iaau ben apari pa diat taangirong Aaigipto.
Pa diat murmur anung kunubu,
io, iaau taar taa in tamarung taan diat.
10 A Tadaaru i piri lenbi: Bi ia a kunubu baa ang paami ungaai ma ra taara Israael,
u ra kum bungbung namur.
Ang ung taa anung kum naagagon u ra nuknukindiat,
ma ang timu taai u ra balaandiat.
Ma iaau ang God anundiat,
ma diat anung taara.
11 Ma diat baa diat teptepaana,
ma diat tatena liklik,
pa diat a wer wetwetalaai diat balet ma lenbi,
‘Un nunura a Tadaaru,’
kabina maa diat raap diat aa nunura iaau,
a taara biaa ku ma diat kaai baa diat ngaala.
12 Ang una wa nundiat kum niraara,
ma pang nuk paa balet ma nundiat kum aakaina mangamangaan.” Ier 31:31-34
13 Baa God i waatung a kunubu mi baa “a matakina kunubu”, i kaapa naa a mugaana kunubu ia turaaina. Ma ra utnaa i turaaina ma ia welwelik uni, i marawaai baa in panaai.