6
Cu pahtỳj Pahpãm te me pahto impejti xà ata na me amji to pôj
2 Corinti 6.1-18
1 Me ipê Pahpãm cahê na cumã me ijàpên catêjê ita kam, wa ha me awỳ, mãr ca atỳj Pahpãm te hàhcaprĩa kam me ato impejti xà ata na me amji caxàr to impeaj ne.
2 Ne pê ramã Ixaj xwỳ pê Pahpãm jarkwa na ihcakôc catê ata, ita na Pahpãm jarkwa kôt ihhôc to hane he:
“Wa, ate amji tehcajpar xà na me iwỳr xà atana,
me akam ijapac prãam kam ikrĩ.
Ne me apytàr xà jõ amcro ata kam,
ite itỳj me apytàr” hane.
Mẽr hõhõ, me ikampa. He ita kam ri pahte me amjipytàr xà na, me Pahpãm na me pajàhwỳr xà. He ita kam ri ramã pahte me amji pytàr xà jõ amcroa kam hàhhuc.
Pê Pawrô cupê catyt kam Pahpãm mã hàpên catê na amji jarẽ
3 Wa ite amji kôt me jũm te catyt kam ipa intête mehcahpêrkàr cupate, wa catyt kam me ipa, mãr quênee jũm, ite me ijàpên xà ton to me ipa ata na, ihcakôc kên nare.
4 He wa itỳj quêt me ipê Pahpãm mã me ijàpên catêjê itajê na me amã amji to me ipipẽ to me ipa. Gapacta ne me ikam me ato xa ne me ipupuhe:
Wa itỳj ampo kên me, ite amji pupun kêanre me, ampo te amji wỳr me ikrã jacjên itajê mã, itỳj me ijũcanãr to me ipa.
5 He hõtpê me icahhy, ne me ijacjê, ne me hàhtôa ne ihtỳj me ito kên prãmte me ikrã, ne ajpẽn wỳr me icapôr to me ipa cakrô, wa itỳjcatyt kam me Pahpãm mã apê.
Ne wa itỳj me ijapên to tỳaj to me ipa.
Ne wa hanea ne itỳj me ijikwa ne me ijõt xà kaj na, Pahpãm mã mehcajrẽn to me ipa.
Ne hanea ne prãm na ame ipa cakrô, wa itỳj catyt kam Pahpãmmã ijàpên to me ipa mã, me ijũcanãr to me ipa.
6 Ne wa ampo kên ton xà ata pê ampỳa mã me ipa, ne Pahpãm te amji kam hapac xà ri quêt me imã hahkre pej to prãm.
Ne wa itỳj cute me ito kên catêjê atajê kam me icryc, mã me ijũcanãr to mentête amji jiprõn to me ipa. Ne quêt ijàhcaprĩa kam, catyt kam me to amji kam ijapac to me ipa.
Ne hanea ne ihtỳj Pahpãm Carõ Pejti te me imã amji jõr, wa ihkôat me ipa.
Ne hanea ne ihtỳj me imã mehcunea kĩn, wa mehkĩan kam me ipa.
7 Ne wa hanea ne itỳj me cumã Pahpãm jarkwa hêj xi nare ata jarẽn to me ipa.
Ne hanea ne itỳj Pahpãm carôat kôt, me ijàpên xà pihhoti catiaton to me ipa.
Ne wa catyt kam Pahpãm te amji kam hapac xà pejti kôt me ipa xà ita to me icurê xwỳn catêjê kam pra ne toa me cupê amji pytà, ne me tohjê.
8 Ne ite me amã, ite amji kam me ijapac xà na amji jarẽn xà itajê, ihtỳj me ipê Pahpãm jarkwa na cumã me iprar catêjê impeaj na me ijarẽ.
Mã mehkwỳ kwỳ ihtỳj me ito me icati, mã mehkwỳ me ito ijõkrenõ, ne me imã ipahàm to.
Mã mehkwỳ me ito mehcakôc to impejti,
mã mehkwỳ me ito mehcakôc kêanre.
He me ito hajỹr cakrô, wa nee itajê nõ na me toamji kam me ijapac nare.
Ne me cumãa, me papê me pahhêj xi catêjê cakrô,
wa itỳj catyt kam ihêj xi xà nare to icakôc to me ipa.
9 Ne me cumãa, nee me ipê jũmjê catihti atajê nare cakrô,
mã me hàhtôa mã pjêcunea kam me ijahkre pej.
Ne me cumãa, wa ijõtpê amji to me ityc xà japên to me ipa cakrô,
wa itỳj me amji to me ipijapar to me ipa.
Ne ihtỳj me icahhyr to me ipa cakrô,
nee cute amji mã me hamãr ne me ijipej nare.
10 Ne me imã amji kĩn nare cakrô,
hõtpê Pahpãm pyrên me ijakry.
Ne me ipê ampo hamreare cakrô,
wa itỳj ite, Pahpãm te amji kam hapac xà to, me hàhtôa ne me to hakràj.
Ne me ipê ampo pê pjê itatekjê jamreare cakrô,
mã hõtpê me imãampo pê côjkwa tekjê atajê cunea.
Pê Pawrô hirã pê, ihcunea na, me cumã amji jarẽn pa
11 Corinti jõ krĩ kam me ikjêjê itajê, wa ite nee ampo na me apê amji to ipimxur nare, ne quêt hirãa pê me amã ihcunea na me amji jarẽn par. Ne itỳj imã me akĩnti ata to ite me amã ipipẽ.
12 Ne imã me akĩan to me akĩn cakrô, mã nee ihhêj ne me amã me ikĩn nare.
13 Ne Jeju kôt ihhêj rũm me apê me ikra pyràac. Ne imã me akĩnti ita jahpan xà na, hanea ne hipêr amã me ikĩn.
Cu ha nee me cupê Jeju na mehkwỳ nare atajê caca xà mã me paxàr nare
Epet 5.3-14; Tijac 4.4-5; 1 Petrô 4.1-6
14 Ne me apê Jeju to ate amji mã me ahimpej catêjê atajê, ca ha nee amji mã me Jeju to mehhimpej nare atajê me, me gàpên xà na ame ajpẽnpar, ne ajwar, ajpẽn cahê na me gàpên nare. Ampo na? Quê ha pijamã jũm krã impejti ne catyt kam ipa atajê me, jũm krã kên ne amjia kôtipa atajê me, ajpẽn cahê na me hàpên to me ipa? Hãpà! Jũ wỳr quê ame amji mã hamã ne ajpẽn cahê na me hàpên to me ipa. He xà quê ajkĩ ihtỳj amcro me awcapàtkô ajcacwa? Hãpà!
15 He xà ajkĩ ihtỳj Jeju Crixtô me Xatanaj mã ajpẽn cajrẽn? Hãpà! Me cupê ajpẽn curê xwỳn. Mẽr hõhõ, por jũmjê amji mã Jeju tomehhimpej to me ipa atajê, quê nee Jeju to amji mã mehhimpej nare atajê me, ajpẽn kam me ihhônco nare, ne ajpẽn kaj na me ajpẽn kampa.
16 Quê ha pijamã jũm Pahpãm tĩr rohnỳtti mã ata jũrkwa wỳr pahpãm cahàc krekà tĩr nare ata to hỹrmã mõ, ne kam hãm? Hãpà! Jũ wỳr quê Pahpãm me, pahpãm cahàc krekà ata apu amji mã hamã, ne ajpẽn kôt amji kampa. Mẽr hõhõ, Pahpãm Carõ Pejtime pajĩ caxwãm pê ihkrĩ ita kam, ihhêj rũm me papê Pahpãm tĩr rohnỳtti mã ata jũrkwapyràac. He pê Pahpãm jarkwa to mehcakôc catêjê atajê me hàhtôa, ne ramã Pahpãm jarkwa na, hõ kàhhôc kam, ahna mehhôc to hane he:
“Wa ha itỳj me cahê na ikrĩ, ne mehcotea na apu ipa,
ne pa amji to me hõ Pahpãm, quê ha me cupê me ikwỳ.
17 Na ca ha mehkrã kên catêjê te Pahpãm to amji mã mehhimpej nare atajê pê me acato,
ne ajtea me cupê ampỳa mã ame apa.
Ne nee ca ha mehkôt cute me ampo kên ton xà atajê nõ ton nare.
Ca ha me to hane, wa ha itỳj me ana amji caxàr to impeaj ne.
18 Na wa ha me Apãm Cati na amji to, ne me apê me ikra na me ato” hane.
Hõhõ, pê Pahhiti mehcunea jirôa pê carôt tỳjti ata, me ana amji jarẽn to hane.