2
Ita muste tafada basa lahenda ra, laꞌeneuꞌ Ramatua Yesus mamate na nai ai-kake a
1 Toranoo susue kara emin! Maulu na au leo emi mai, au afada emi Manetualain nino Na fo riꞌ lahenda dae-bafoꞌ a ta bubuluꞌ. Tehuu au ta uni dedea-nafadaꞌ ria fo dedea koaoꞌ. Ma au boe ta pake dedea-nafada madema fo atudu au malela ka.
2 Tepoꞌ fo au sama-sama oo emi, au afi ae leo iaꞌ: au nau atudu noi hihii-nanauꞌ esa, riꞌ Yesus Kristus. Ria riꞌ, Lahenda fo neme uluꞌ mai Manetualain helu memaꞌ nau feen mai. Tehuu tepoꞌ fo Yesus mai, lahenda ra paku raisa Ni nai ai-kake a. Au alelaꞌ matetuꞌ noi hihii-nanauꞌ ria.
3 Fai fo au sama-sama oo emi a, au ameda an ta abeꞌi, ma bii-amataꞌu.
4 Au dedea-afada, ma tui-beka, pake dedea bale faiꞌ. Au ta pake dedea madema fo arorolu emi. Taꞌa! Tehuu fai fo au dedea leoꞌ na, lahenda ra bubuluꞌ rae, Manetualain Dula-dale Malalao-malalafu Na riꞌ ator au, ma Ria kuasa Na nai au.
5 Au afi ae, maneniko emi mamahere Manetualain, nana huu emi mamanene lahenda duduꞌa-aafi tanden, sona ta malole. Malole lenaꞌ emi mamahere Manetualain, nana huu Ana natudu kuasa Na neuꞌ emi.
Manetualain nanori-nafada ita laꞌeneuꞌ duduꞌa-aafi tande roo-tetuꞌ
6 Sekona te, fai fo ami dedea mo lahenda fo riꞌ ramahere teteaꞌ a, ami manori-mafada pake duduꞌa-aafi tandeꞌ. Tehuu ta tuka lahenda dae-bafoꞌ a duduꞌa-aafi tanden, do tuka hata fo besaꞌ ia mana pareta rahiiꞌ ranori-rafada ni a, te neuꞌ ko basan sapu-lalo.
7 Tehuu ami manori-mafada noi duduꞌa-aafi tandeꞌ fo onda neme Manetualain mai. Nai fai a ulu na, Manetualain nafuni hihii-nanauꞌ ia ra. Tehuu besaꞌ ia, Ana naetuꞌ fo nau soi hata nino ria reuꞌ loan soaneuꞌ ita, ela lahenda rita Manetualain rela-saꞌan fo ri nananita nai ita daleꞌ.
8 Tehuu lahenda fo besaꞌ ia homu pareta, ara ta bubuluꞌ matetuꞌ Manetualain duduꞌ-aafi tande Na. Huu fo maneniko ara bubuluꞌ, sona sira ta bisa paku raisa ita Ramatua marela-masaꞌa na nai ai-kake a.
9 Nai Susura Makamoiꞌ a manaduiꞌ laꞌeneuꞌ Manetualain nino Na, fo bei mana mafuniꞌ nai fai a ulu na nae,
“Hihii-nanauꞌ fo lahenda dae-bafoꞌ a bei ta parnaa mata nara rita,
ma hihii-nanauꞌ fo lahenda dae-bafoꞌ a bei ta parnaa ridoo nara ramanene,
ma lahenda dae-bafoꞌ a ta bisa dodoo-tatai ralan.
Sekona te, Ramatuaꞌ a sadia memaꞌ basa hihii-nanauꞌ sira,
soaneuꞌ lahenda fo sue-lai Ni.”
10 Tebe fai a ulu na, lahenda ta bubuluꞌ hihii-nanauꞌ sira, tehuu besaꞌ ia Manetualain pake Ria Dula-dale Malalao-malalafu Na, fo soi hihii-nanauꞌ sira reuꞌ loa na soaneuꞌ ita.
Manetualain Dula-dale Na, bubuluꞌ basa hihii-nanauꞌ ara. Huu fo Ria boe parisaꞌ Manetualain dale Na losa Ria bubuluꞌ basan.
11 Ita esaꞌ ko nanuuꞌ dula-dale hehelin nai ita dalen. Huu ria na, de ita lahenda dae-bafoꞌ a afi ma tao hihii-nanauꞌ fo ta sama. Ma ta hapu lahenda fekeꞌ bubuluꞌ matetuꞌ ita dalen, noi ita dula-dale na. Leoꞌ na boe soaneuꞌ Manetualain. Ta hapu lahenda esa bubuluꞌ Manetualain dale Na boeꞌ. Noi Ria Dula-dale Na riꞌ bubuluꞌ matetuꞌ.
12 Ita sipo ta Manetualain Dula-dale Na so, ma Ria riꞌ ator ita. Huu ria na, de ita ta tuka lahenda nai dae-bafoꞌ ia duduꞌa-aafin. Huu fo Manetualain Dula-dale Na nai ita dalen, de ita bisa talelaꞌ basa hihii-nanauꞌ malole fo Ana taon soaneuꞌ ita so a.
13 Hihii-nanauꞌ sira siꞌ biasa ita dedean. Ami mafada basa hihii-nanauꞌ fo Manetualain Dula-dale Na nanori-nafadan neuꞌ ami. Ami ta manori-mafada pake rolu-malelaꞌ tuka lahenda dae-bafoꞌ a duduꞌa-aafin. Tehuu soaneuꞌ lahenda fo ralelaꞌ Manetualain, ami manori-mafada si pake dedea lakaꞌ neme Ria Dula-dale Na mai.
14 Neuꞌ lahenda fo ta ralelaꞌ Manetualain Dula-dale Na, ramanene ami dedea-nafadam, tantu ara ta nau sipoꞌ fa. Ara afi rae, “Ubeaꞌ ria? Ta raa daleꞌ fa!” Lahenda ria ta bubuluꞌ hihii-nanauꞌ sira, nana huu ana ta nabua-naesa noo Manetualain Dula-dale Na.
15 Lahenda fo nabua-naesa noo Manetualain Dula-dale Na, sona besaꞌ ko ana bisa bubuluꞌ basa hihii-nanauꞌ sira, ma bisa bubuluꞌ roo-tetuꞌ a riꞌ ubeaꞌ. Tehuu lahenda kamahere taaꞌ ara, ta bisa bubuluꞌ ma uku-sudi rala lahenda kamahere ara nonoi-tataon.
16 Ta bisa fa! Huu fo manaduiꞌ nai Susura Makamoiꞌ a nae,
“Bea riꞌ bisa bubuluꞌ Manetualain duduꞌa-aafin?
Do bea riꞌ bisa ator Manetualain,
fo Ana tao tuka lahenda ria pareta na?
Ta hapu lahenda esa boeꞌ!”
Sekona te ita bisa bubuluꞌ hihii-nanauꞌ sira, nana huu Kristus tulu-fali ita, fo bisa dodoo-tatai tuka Ria duduꞌa-aafin.