13
Manea matalolole emi masodam
1 De, ia nana au sakaꞌ uu dama emi kalaiꞌ telu na. Maneniko bea nau neo lahenda, sona bosoꞌ nafarene heni atoran a. Huu fo manaduiꞌ nai Manetualain Susura Makamoi Na nae, “Maneniko bea nau napaneneoꞌ lahenda esa, sona muste lahenda dua do telu sakasii, ma tutuiꞌ esaꞌ a dei, besaꞌ ko sipoꞌ. Kalu ta leo naꞌ fa, sona bosoꞌ sipoꞌ.”
2 Maulu na tepoꞌ fo au leo emi naaꞌ eti kalaiꞌ dua na, au afarereneꞌ fee lahenda mana tao tadaluꞌ ara so. Besaꞌ ia au fee seluꞌ asa nafarereneꞌ, sama-sama roo basa lahenda mana tao tadaluꞌ ara. Sama leoꞌ maulu na, au fee nafarene ae, kalu au dadi mai sona ara sipo ra huhuku nara.
3 Emi saka buti mae, Kristus dedea nesiꞌ au. Maneniko Kristus nau ator emi, sona Ana noi-tao neniꞌ kuasa bauinaꞌ nai emi talada. Huu fo Ana ta noi-tao male-maleꞌ a fa.
4 Tepoꞌ fo ara raisa Ni nai ai-kake a, memaꞌ Ana male-maleꞌ a, huu fo Ana hai heni kuasa Na. Tehuu Manetualain fee Kristus kuasa, de besaꞌ ia Ana nasoda. Leo mae ita fo riꞌ dadi teuꞌ Ria lahendan, tameda taan ta tabeꞌi fa, tehuu Manetualain fee ita sodaꞌ bebeuꞌ. Huu ria na, de ami bisa malalau emi pake Ria kuasa Na.
5 Parisaꞌ ao mara emi dalem, fo ela bubuluꞌ mae, emi mamahere tebe-tebe Kristus do, taꞌa? Ria kuasa Na nananitaꞌ nai emi masoda ma do, taꞌa? Uji ao mara leo naꞌ. Huu fo kalu Ana ta nabua-naesa noo emi, sona emi ta dadi meuꞌ Ria lahendan fa.
6 Kalu emi parisaꞌ ami, sona emi bisa mita Ria kuasa Na nai ami masoda ma. No ria na, ami lui ma ao mara meme uꞌujiꞌ a mai.
7 Ami hule-haradoi neuꞌ Manetualain, fo ela emi bosoꞌ tao salaꞌ. Ami ta tao daleꞌ mae lahenda rahiiꞌ ami nonoi-tataom do, taꞌa. Leo mae lahenda fekeꞌ tipa ami, tehuu ami mahiiꞌ emi tao malole. Leo mae leoꞌ na boe ta hata-hata fa.
8 Huu fo ami ta tao sudi ubeaꞌ, ela soaꞌ hata roo-tetuꞌ. Ami tao noi malole.
9 Huu fo kalu emi bara-aiꞌ, ma ami male-maleꞌ a, sona ami mamahoꞌo. Ami hule-haradoi neuꞌ Manetualain ela tao namanoꞌu-namadai emi namahere mara.
10 Huu ria na, de leo mae au dooꞌ a oo emi boe, besaꞌ ia au duiꞌ hihii-nanauꞌ ia ra, fo ela fai bea au mai, sona au bosoꞌ dedea hara bera emi bali. Au dadi uuꞌ ita Ramatua na lahenda nadedenun. Tehuu Ana fee au hak ma kuasa ela afofoa emi, ta alulutuꞌ emi fa.
Paulus duiꞌ nateꞌe susura na
11 Toranoo susue kara! Ia nana au dedea-nafada mateꞌe ka, soda-mole, nai susue-lalaiꞌ daleꞌ. Tao matetu basa hihii-nanauꞌ ara. Mamanene matalolole au lelea-nonore ka. Masoda teiꞌ esa ma daleꞌ esa. Emi muste esa malole noo esa. Manetualain, sue-lai emi. Au hule fo Ana sama-sama noo emi laꞌo naroo, ma Ana tulu-fali emi, ela emi masoda mole-dame esa noo esa.
12 Fai beaꞌ ma emi mateteꞌa aoꞌ, sona meniꞌ dedeꞌiꞌ lalao-lalafuꞌ, fo riꞌ naraa soaneuꞌ Manetualain lahenda lalao-lalafun. Manetualain lahendan fo rai ia, basa si haitua haraoe soda-moleꞌ susue-lalaiꞌ soaneuꞌ emi.
13 Au hule fo ita Ramatuan Yesus Kristus natudu dale malole Na neuꞌ emi. Au hule fo Manetualain natudu susue-lalain neuꞌ emi. Au hule fo Manetualain Dula-dale Malalao-malalafu Na natudu dale balaroe-balanau Na neuꞌ emi, fo ela emi basa teiꞌ esa ma daleꞌ esa.
Noi rinaaꞌ so,
Paulus