6
Manetualain tao malole soaneuꞌ ita
1 Huu no ami moi-tao sama-sama moo Manetualain, de ami hule kokoe emi leo iaꞌ: Emi sipo ma Manetualain dale malole ina Na so, de emi bosoꞌ tao ni neuꞌ mana dadi taaꞌ.
2 Huu fo Ria Susura Makamoi Na manaduiꞌ nae,
“Naraa laꞌe ledo-fain, Au amanene neuꞌ o.
Au tulu-fali o, tepoꞌ fo Au fee lahenda sodaꞌ.”
Nenene matalolole! Besaꞌ ia ledo-fain malole a. Huu fo besaꞌ ia Ramatuaꞌ a fai Na, fo fee lahenda sodaꞌ.
3 De ami nau manea matalolole ao-ina mara, ela masoda roo-tetuꞌ. Huu fo ami ta nau dadi eena-natabaaꞌ soaneuꞌ lahenda fo nau leo Manetualain eno masoda na neu. Ma ami boe nau dedea tuka matetu na, fo ela lahenda bosoꞌ ramumulu-ramamaeꞌ ami nade malole nara.
4 Basa-basan fo ami tao a, ami saka enoꞌ fo matudu mae, ami ia nana Manetualain lahenda malalau-maoono malolen. De, leo mae ami hapu susa, hapu doidoso, do masoda nai kakiliu-soroadoꞌ a talada boe, ami manenete mahere.
5 Fai fo ami hapu fefepa-liliꞌu, ena ami nai bui daleꞌ, lahenda ra adu nahuu-nalenaꞌ, ami moi-tao sota maan seli, ami ta suku fa, ma fai fo mamalaa, ami manenete mahere.
6 Ami manenete noo dale malalao-malalafuꞌ. Ami bubuluꞌ dodou laꞌeneuꞌ Manetualain. Ami manenete ma sabar. Ami tao malole soaneuꞌ lahenda. Ami mataaꞌ Manetualain Dula-dale Na ator ami. Ami sue-lai matetuꞌ lahenda, ma ta masarole-masaraliꞌ fa.
7 Tepoꞌ fo ami dedea, ami dedea matetuꞌ, ta dedea fufudiꞌ fa. Ami sipo kuasa neme Manetualain mai, fo tao malole. Ami sama leoꞌ soldadu fo homu Ramatuaꞌ a tee-tafan katemaꞌ, de matati maseki musu.
8 Leo mae lahenda hada-horomata neuꞌ ami, do ara ramumulu-ramamaeꞌ ami nade malole ma; leo mae ara dedea ratuda ami, do ara ranea ami nade malole ma; leo mae lahenda dedea fufudiꞌ rae, ami tipu-dai lahenda, do ara dedea rae, ami dedea matetuꞌ, tehuu ami manenete.
9 Ruma ta ralelaꞌ ami fa. Tehuu dodouꞌ ralelaꞌ ami nade ma. Lai dodouꞌ kura baiꞌ ami mate, tehuu ami bei masoda maroo boe. Ami hapu fefepa-liliꞌu laiꞌ dodouꞌ, tehuu ami ta mate boeꞌ.
10 Leo mae ami mameda man beraꞌ a, tehuu ami mamahoꞌo-matadale maroo. Leo mae ami doiꞌ taꞌa, tehuu ami tao ma lehenda dodouꞌ ramasuꞌi nai dale nara. Ami ta manuu hata esa boeꞌ, tehuu sama leoꞌ ami manuu basa-basan.
11 Ami dedea ledo-ledo soaneuꞌ emi nai kota Korintus. Ami sue-lai matetuꞌ emi.
12 Ami matudu susue-lalaim neuꞌ emi, ma ta eena-babaa fa. Tehuu emi eena-babaa susue-lalaim neuꞌ ami.
13 De, au nau lea-nore emi, sama leoꞌ emi nana au ana kara. Malole lenaꞌ emi sue-lai maroo ami.
Bosoꞌ mabua-maesa moo lahenda fo ta ramahere Manetualain
14 Bosoꞌ mabua-maesa moo lahenda fo ta ramahere Kristus. Huu fo emi ta sama fa. Lahenda kamahereꞌ fo leo-laꞌo roo-tetuꞌ, ma lahenda fo soaꞌ Manetualain, ta naraa ara roi-tao reu esa fa. Lahenda dale malole a noo lahenda tadaluꞌ a ta naraa dadi tia-lai. Ria sama leoꞌ makaledoꞌ a ta nabua noo maiuꞌ.
15 Kristus ta bisa dedea-raoꞌ noo nitu ra malaka na, hete? Leoꞌ na boe, lahenda fo ta namahere Manetualain, ta hapu babatiꞌ sama-sama noo lahenda kamahereꞌ a.
16 Emi dale dodoo ma leo beaꞌ? Bate mae emi bisa leo Manetualain uma mamaso Na daleꞌ meu, fo doꞌo-tabe Ni dei, besaꞌ ko leo uma sosokoꞌ daleꞌ meu, fo hule-haradoi neuꞌ hata sosokoꞌ ara do? Ta naraa fa hete! Huu fo Manetualain nana Manetualain masodaꞌ. Ria boe ita Ramatua na. Ma ita dadi sama leoꞌ Ria uma mamason, nana huu Ana leo-naparasa nai ita dale nara. Huu fo manaduiꞌ nai Ramatuaꞌ Susura Makamoi Na daleꞌ nae,
“Au uma Ka nai Au lahenda kara talada.
Au masoꞌ-kalua nai sira talada.
Au dadi uuꞌ sira Manetualain.
Sira boe dadi reuꞌ Au lahenda kara.”
17 Huu ria na, de Ramatuaꞌ a duiꞌ nae leoꞌ ia,
“Emi muste kalua meme sira talada mai, ma heoꞌ meme sira mai,
ela emi bosoꞌ dadi sama leoꞌ sira.
Emi dale mara muste lalao-lalafuꞌ.
Emi muste dooꞌ a meme basa-basan fo riꞌ nakekeo-nakakanu emi dale mara,
No ria na, Au sipoꞌ emi noo malole.
18 Au dadi uuꞌ emi Amam;
ma emi dadi meuꞌ Au ana kara.
Ramatuaꞌ Mana Kuasa a,
riꞌ nahara-nadasi nae leoꞌ na.”