2
1 No ria na, Manetualain adu na lalai ma dae-bafoꞌ a, no basa oe-isi nara.
2 Ana noi-tao nabasa si, de balahaꞌ naraa no fai kahitu na, boe ma Ana hahae aon.
3 No ria na, Ana tao fai kahitu a dadi neuꞌ fai bau-inaꞌ neme fai fekeꞌ ara mai. Ana ator leo naꞌ, nana huu noi-tao nabasa nonoi-tataon, basa de fai kahitu a, boe ma Ana hahae aon.
4a Manetualain adu lalai ma dae-bafoꞌ a, tutui na riꞌ naꞌ so.
Manetualain adu-tao na touꞌ ma inaꞌ
4b Tepoꞌ fo MANETUALAIN besaꞌ ko mulai adu lalai no dae-bafoꞌ a,
5-6 bei ta hapu parusa hata-hata esa boeꞌ, nana huu Ana bei ta naondaꞌ uda fa. Tepoꞌ ria, hapu adaꞌ noi masuꞌ neme dae a mai fo naꞌoe dae-bafoꞌ a. Ma bei ta hapu lahenda tao oka-tine.
7 Basa boe ma, MANETUALAIN hai na dae baiꞌ, de tao nan dadi neuꞌ lahenda. Basa de Ana fuu ani hahaeꞌ leo idu bolon daleꞌ neu, boe ma lahenda ria nasoda tutiꞌ a.
8 Basa de MANETUALAIN buka okaꞌ esa nai dae Eden pooꞌ dulu. Boe ma Ana fee lahenda a leo neuꞌ okaꞌ ria.
9 Nai okaꞌ ria daleꞌ, Ana namomoriꞌ na ai huu malole rupaꞌ ara so, fo lahenda bisa raa no mina-malada. Ana namomoriꞌ na ai huuꞌ rupaꞌ dua rai okaꞌ ria talada. Maneniko lahenda naa ai huuꞌ sira esa boa na, ana nasoda naroo. Tehuu maneniko lahenda naa ai huuꞌ esa boa na bali, sona ana bisa bubuluꞌ nae bea riꞌ malole ma bea riꞌ tadaluꞌ.
10 Hapu lee esa nai naa, faa kalua neme okaꞌ ria mai. Lee ria nanuu baꞌe haa.
11 Baꞌe masososaꞌ a, nade Pison. Baꞌe ria rule-feo basa dae Hawila. Nai naa, hapu lilopilas.
12 Hapu lilopilas isiꞌ, hapu ai huuꞌ fo naana na naboomeni, ma hapu batu makarelaꞌ.
13 Lee ria baꞌe kadua na, nade Gihon. Baꞌe ria rule-feo basa dae Kus.
14 Baꞌe katelu na, nade Tigris. Baꞌe ia riꞌ dadi too nai dae Asyur, pooꞌ dulu. Baꞌe kahaa na, nade Efrat.
15 MANETUALAIN fee lahenda ria leo nai Eden, ela nafaduli natalolole okaꞌ ria.
16 Boe ma Ana pareta lahenda ria nae, “O bole mua sudi laꞌe ai boa ubeaꞌ neme basa ai huuꞌ nai okaꞌ ia.
17 Tehuu hapu esa nai naa, o ta bole muan fa. Riꞌ ai huuꞌ fo nafada nae bea riꞌ malole ma bea riꞌ tadaluꞌ. Maneniko mua ni, sona o mate.”
18 Basa de MANETUALAIN dedea bali, nae, “Maneniko lahenda ia nasoda mesaꞌ ana, sona ta malole a fa. De Au nau adu-tao feen, nonooꞌ esa naraa noo ni.”
19-20 Tepoꞌ ria, MANETUALAIN hai na dae, de tao na banda rupaꞌ ma manupuiꞌ. Basa de Ana neni banda ra, ma manupuiꞌ ara leo lahenda ria neu, ela leoꞌ bea na ana foi nade nara. De lahenda ria foi banda ra ma manupuiꞌ ara esaꞌko noꞌ naden. Tehuu ria mesaꞌ ana bei ta hapu nonooꞌ esa fo naraa non boeꞌ.
21 Basa de MANETUALAIN tao na lahenda ria suku namanee. Tepoꞌ fo ana suku, Manetualain hai na dui aiusun esa, boe ma napoti faliꞌ hinaꞌ ria.
22 Neme duiꞌ ria mai, Ana tao nan dadi neuꞌ inaꞌ esa. Basa de fee inaꞌ a leo lahenda ria neu.
23 Lahenda a nita inaꞌ ria, boe ma nae,
“Naa! Ia dei! Ia besaꞌ ko naraa no au!
Dui na sama leoꞌ au dui ka,
ma aopaa na boe, sama leoꞌ au aopaa ka.
Huu no ana dadi neme touꞌ a mai, de au foi ni, nade ‘inaꞌ’.”
24 Huu ria na, de touꞌ a muste foa ela ina-ama nara,
fo neu nasoda daleꞌ esa no sao na,
huu fo sira dua nanahekeꞌ dadi esaꞌ so.
25 Tepoꞌ ria, dua si bei poiraoꞌ, tehuu ara ta maeꞌ baiꞌ boeꞌ.