21
Sara boki Isak fee Abraham
1-7 Basa ria boe ma, MANETUALAIN fee ua-naleꞌ neuꞌ Sara, tuka Ria hehelu na. Abraham namalasi so, te Sara nairu. Fai fo ana boki a, Abraham teun natun esa so. Naraa no ledo-fain, boe ma Sara boki na ana touꞌ esa. Abraham foi anaꞌ ria nade, Isak (sosoa na nae, ‘ana hiꞌa’).
Sara boe dedea nae, “Manetualain tao na au hiꞌa, nana huu besaꞌ ia au amahoꞌo. Lahenda ra afi rae, au ta bisa hapu anaꞌ nai au fai lasi ka soꞌ. Sekonaa te, leo mae au sao ka namalasi kokoo so, tehuu au bei boki fee ni. De besaꞌ ia, sudi bea fo ramanene hata ia, sira boe hiꞌa sama-sama roo au.”
Boki basa Isak faiꞌ falu, boe ma Abraham sunat ana, tuka Manetualain pareta Na.
Hagar no Ismael hapu uusiꞌ
8 Isak boe-boe nambau-ina. Fai fo sakaꞌ fila ni, Abraham tao feta bau-inaꞌ.
9-10 Laiꞌ esa de, Sara nita Abraham sao murin Hagar ana ni Ismael naseseboꞌ Isak. Bei nita leoꞌ na, boe ma Sara dedea no sao na nae, “Usi heni ata fo riꞌ neme Masir mai a, no ana na! Huu fo au ta nau ata a anan ria sipo hata posakaꞌ esa boeꞌ. Adaꞌ noi au ana ki Isak, riꞌ muste hapu katemaꞌ asa.”
11 Abraham namanene Sara dedea nae leoꞌ na, boe ma dale na nasalaꞌ, nana huu Ismael boe, ria anan.
12 Tehuu Manetualain dedea no Abraham nae, “Abraham, e! O bosoꞌ afi leo sao murim ria no ana na. Tuka noi Sara hihii-nanaun, huu fo tititi-nonosiꞌ fo au helu a, neuꞌ ko o hapu nemeꞌ Isak mai.
13 Tehuu Au boe fee ua-naleꞌ neuꞌ o sao muri ma ana na, nana huu ria boe ana bokim. Neuꞌ ko ria tititi-nonosin boe dadi reuꞌ lahenda nusaꞌ esa.”
14 Balahaaꞌ, balahaa ana na, boe ma Abraham tao tua-lepa fee Hagar, ma feen nasalili neni oe boto esa. Basa de ana nafuli heni inaꞌ ria no anan Ismael. Basa boe ma ara laꞌo rafeo nai dae rouꞌ naneneaꞌ Beer Syeba.
15 Sira oe nininu na basan, boe ma Hagar foa ela ana na neuꞌ ai huu anaꞌ esa lao na.
16 Ana afi nai dale na nae, “Au ta anenete relu laꞌe anaꞌ ia mamate na soꞌ.” Basa de ana oruꞌ ela anaꞌ a bate meter lima hulu, de natuuꞌ. Boe ma ana dola nasaꞌeedu.
17 Manetualain namanene Ismael haraoe dodola na, boe ma eilaꞌo-limalopen esa neme nusatetu-ikutemaꞌ naloo Hagar nae, “Hagar! Ubeaꞌ taon de o susa tao leoꞌ ia? Bosoꞌ bii, huu fo Manetualain namanene anaꞌ ria haraoe dodola na so.
18 Foa fo mu dama anaꞌ ria leo. Matetea dale na, huu fo neuꞌ ko au tao a ria tititi-nonosin dadi reuꞌ lahenda nusa kahereꞌ esa.”
19 Basa de Manetualain tao nadilaꞌ Hagar mata na, losaꞌ ana nita oe dodoluꞌ esa nai naa. Boe ma ana neu dou oe neuꞌ boto ria, de naninuꞌ anaꞌ a.
20-21 Ismael no mama na leo rahaniꞌ mo soroae Paran. Ana nambau-ina mai, boe ma dadi neuꞌ mana ou kahereꞌ. Basa de mama na feen sao ina Masir esa. Basa ia ra dadi, nana huu Manetualain sama-sama no Ismael.
Abraham no Abimelek radame ao nai Beer Syeba
22 Tepoꞌ ria, mane Abimelek no ria parani musu na, nade Fikol, mai raneta ro Abraham. Maneꞌ a dedea nae, “Abraham! Ami bubuluꞌ so, mae Manetualain sama-sama no o. Huu ria na, de o tao sudi ubeaꞌ a basan dadi.
23 Besaꞌ ia au hule o soo-supa nai Manetualain mata Na mae, o ta edi-fule au oo basa upu-ana kara. Sama leoꞌ au tao malole neuꞌ o, sona o boe muste tao malole neuꞌ au ma nusaꞌ ia.”
24 Abraham nataa nae, “Ia! Au soo-supa.”
25 Tehuu Abraham boe tui maneꞌ a nae, “Papa maneꞌ lahenda mara ralea ra au oe dodolu ki esa.”
26 Maneꞌ a namanene leoꞌ na, boe ma nataa nae, “Ae! Au besaꞌ ko amanene hata ia. Ubeaꞌ taon de papa ta tui neme maulun ria mai fa? Au ta bubuluꞌ bea riꞌ nonoi-tataon ria.”
27-28 Boe ma Abraham no Abimelek heke hehelu-barataaꞌ. Abraham heo fee maneꞌ a sapi ma bibi-lopo. Boe ma ana heo tamba seluꞌ bibi-lopo tenaꞌ hitu.
29 Maneꞌ a natane ni nae, “Ubeaꞌ taon de o tao leo naꞌ?”
30 Abraham nafada nae, “Papa maneꞌ sipo ma bibi-lopo tena kahituꞌ ia ra, fo dadi tanda nae, papa mane manaku, au riꞌ ali oe dodoluꞌ ia.”
31 Huu no dua si soo-supa reuꞌ na, boe ma ara fee mamanaꞌ ria, nade Beer Syeba. Sosoa na nae, ‘Oe dodolu mansooꞌ’.
32 Ara soo-supa basa, boe ma mane Abimelek no parani musu na fali leo sira nusa Filistin na reu.
33 Basa ria, Abraham sele ai tamareska huuꞌ esa nai Beer Syeba. Mulai faiꞌ ria, ai huuꞌ a fee nafarereneꞌ neuꞌ Abraham nae maꞌulu na ana doꞌo-tabe neuꞌ MANETUALAIN fo Masodaꞌ Losa Dodoo na nai na.
34 Basa boe ma Abraham leo namanoso nai lahenda Filistin ara nusa-namon.