Yohanis susura na laꞌeneuꞌ hata fo neuꞌ ko mori-dadi
nai dae-bafoꞌ a nonoe na losaꞌ hapu
Dae-bafo Rupa Bebeuꞌ
1
1-2 Soda-moleꞌ neme au mai, Yohanis, fo Yesus Kristus lahenda nadedenun.
Nai susuraꞌ ia, au duiꞌ laꞌeneuꞌ hata fo neuꞌ ko mori-dadi. Au bubuluꞌ hata ia ra leo iaꞌ: Manetualain riꞌ nafada memaꞌ neuꞌ Yesus Kristus. Boe ma Manetualain nadenu Yesus fo nafada Ria lahenda nara. Basa de Yesus nadenu eilaꞌo-limalopen esa neme nusatetu-ikutemaꞌ a mai, fo neu natudu basa hata ia ra, ela au duiꞌ memaꞌ. Huu fo ta dooꞌ a soꞌ te, tantu basa hata ia ra dadi. De, emi muste mamanene matalolole Manetualain Dedea-nafadan fo Yesus nafada so a.
Basa lahenda fo lees susuraꞌ ia losaꞌ lahenda bisa ramanene, sona ara raua-ranale ran seli. Ma lahenda fo ramanene susuraꞌ ria isi-liin, ma tao tuka hehelu na, sira boe raua-ranale. Huu fo ria fai mamai Na, naneneaꞌ so.
Yohanis haitua haraoe soda-moleꞌ fee lahenda sarani kahituꞌ fo rai propinsi Asia
Au haitua susuraꞌ ia neuꞌ sarani bubua kahituꞌ fo rai propinsi Asia.
Au hule fo Manetualain natudu dale malole Na, ela emi bisa masoda no tetu-temaꞌ, mole-dame, ma tesatei-tamadaleꞌ. Huu fo Manetualain nana nasoda memaꞌ neme lele uluꞌ mai. Ana nasoda nai besaꞌ ia, ma neuꞌ ko nasoda losa doo na neu. Au hule fo Ria Dula-dale Na natudu dale malole na boe, ela emi masoda no tetu-temaꞌ, mole-dame, ma tesatei-tamadaleꞌ. Au ita Ria Dula-dale Na, sama leoꞌ dula-daleꞌ hitu rasare ra Manetualain kadera mana pareta Na.* Au hule fo Yesus Kristus natudu dale malole Na boe, ela emi bisa masoda no tetu-temaꞌ, mole-dame, ma tesatei-tamadaleꞌ. Yesus dedea lelekaꞌ laꞌo naroo laꞌeneuꞌ hata fo Manetualain nafada Ni a. Fai a ulu na Ana mate, tehuu Manetualain fee Ni nasoda seluꞌ, ela Ana dadi neuꞌ lahenda masososaꞌ, fo nasoda seluꞌ neme mamates a mai. Ria boe dadi Malaka fo ator maneꞌ nai dae-bafoꞌ ia.
Huu no Yesus sue ita, de daa Na faa soaneuꞌ ita. Ma mamate Ni ria, Ana soi enoꞌ ela poꞌi-tata na ita teme sala-sikoꞌ ara mai. Boe ma Ana soꞌu na ita dadi teuꞌ Ria anaraun nara, ela ita toi-tao soaneuꞌ Ria Aman Manetualain. Yesus Kristus nana tebe kahereꞌ, ma kuasa Na ta manabasaꞌ fa. Tebe, ria!
De, madilaꞌ mata mara fo mete matalolole! Besaꞌ ia Yesus no Papa Na rai nusatetu-ikutemaꞌ a. Ta dooꞌ a soꞌ te, Ana onda faliꞌ nai oaꞌ a daleꞌ. Basa lahenda fo rai dae-bafoꞌ a neuꞌ ko rita Ni. Leoꞌ na boe, neuꞌ lahenda fo maulu na ara pau Ni a. Basa lahenda nai dae-bafoꞌ ia rasaledale ma dola nana huu ara bubuluꞌ rae maulu na Ria ri ara tipa Ni. Tebe basa ia ra tantu dadi.
Manetualain nae,
“Au ia,
Alfa losa Omega.
Au ia,
A losa Z.
Basa-basan mori-dadi reme Au mai,
neme masososa na mai, losa babasan.
Au ia asoda memaꞌ neme uluꞌ mai.
Au asoda nai besaꞌ ia.
Ma Au boe asoda losa doo na neu.
Au riꞌ mana kuasa madema nan seliꞌ!”
Yohanis nita Ana Lahendaꞌ a
Ita basa tamahere belaꞌ a tae, Yesus nana, ita Mane na. Huu ria na, de au dadi uuꞌ emi toranoom. Lahenda fekeꞌ a ramanasa, nana huu ita tuka Yesus. Boe ma ara tao doidoso ita basa. Tehuu Yesus natetea ita dale nara, fo ela bisa tanenete taroo. Hapu lahenda ta sipoꞌ nana huu au tui-beka fee lahenda laꞌeneuꞌ Manetualain Dedea-nafadan, ma anori-afada lahenda laꞌeneuꞌ Yesus boe. Huu ria na de, besaꞌ ia ara hopu ra au, de tuꞌu au leo pulu ia mai so, fo nade Patmos. 10 Laiꞌ esa de, naraa laꞌe fai mamasoꞌ, Manetualain Dula-dale Na onda maiꞌ au. Kekeneu te, au amanene haraoe esa naloo namberaina neme au dea ka. Lii na sama leoꞌ fufuuꞌ a. 11 Haraoeꞌ ria nadenu au nae, “Yohanis! Au sakaꞌ atudu hata esa neuꞌ o. Basa hata fo mita a, o muste duiꞌ asa. Basa nana, o muste haitua si leo sarani kahituꞌ ara, siꞌ saraniꞌ fo rai kota Efesus, kota Smirna, kota Pergamus, kota Tiatira, kota Sardis, kota Filadelfia, ma kota Laodikia.”
12 Amanene a leoꞌ na, boe ma au lipe dea ka fo nau mete bea riꞌ mana dedeaꞌ ria. Tehuu au ita dedede anaꞌ lilopilas hitu mana fuaꞌ rai mamana pepeda dededeꞌ a. 13 Ma Lahenda esa napadei nai dededeꞌ sira talada. Ria rupa-lolen sama leoꞌ Ana Lahendaꞌ a. Ana pake badu manaru losa ei basa na, ma ana nasaa lafa lilopilas esa nai aru na. 14 Lakadoo na, fula makadila sama leoꞌ aba-minaꞌ. Mata na nahaa sama leoꞌ aipilaꞌ. 15 Ei na pilas a, sama leoꞌ hotu riti nai aipilaꞌ a. Haraoe na sama leoꞌ nafa a narulu. 16 Ana homu ruuꞌ hitu rai lima ona na. Tafa mahina dea-daleꞌ tandeꞌ esa, kalua neme bafa Na mai. Mata-idun, rahaa sama leoꞌ ledo a nahaa nai ledo hanan.
17 Au ita Lahenda ria, boe ma au bara uu tutiꞌ a nai ei dae Na, sama leoꞌ lahenda a saparao. Tehuu, lima ona Na tai laꞌe au, ma Ana dedea nae, “Ana ki on! Bosoꞌ biiꞌ! Basa-basan mori-dadi remeꞌ Au mai, neme masososa na losa babasan. 18 Maulu na Au mate, tehuu besaꞌ ia o mete dei! Au asoda seluꞌ so, ma neuꞌ ko Au asoda losa doo na neu! Ma Au riꞌ homu koeꞌ fo bisa soi mamanaꞌ lahenda mana mateꞌ ara, ela rasoda seluꞌ. 19 O muste duiꞌ basa hata, fo besaꞌ ia o mita a, ma duiꞌ basa hata fo neuꞌ ko ara mori-dadi. 20 Au afada ria sosoa na leo iaꞌ dei: dedede lilopilas kahituꞌ sira, sosoa na riꞌ sarani kahituꞌ ara. Ma ruu kahituꞌ fo o mita si rai Au lima ona Ka, sira nana Manetualain eilaꞌo-limalopen hitu reme nusatetu-ikutemaꞌ a mai. Ara reni haraꞌ neme Manetualain mai soaneuꞌ sarani kahituꞌ sira.”
* 1:4 Nai ia manaduiꞌ dedea Yunani nae, “dula-daleꞌ hitu rasare ra Ramatuaꞌ a kadera mana pareta na”. Tuka lahenda fo duiꞌ ralelaꞌ laꞌeneuꞌ Susura Makamoiꞌ ara, nomer hitu sosoa na riꞌ hata mananoꞌu-manadaiꞌ, ma tetu-temaꞌ. Huu ria na de, lahenda malelaꞌ inaꞌ ruma rae, dula-dale kahituꞌ sira sosoa na nae, Ramatuaꞌ a Dula-dale Malalao-malalafu Na. No ria na nai lalane kahaan losa kaliman, Yohanis dedea ua-naleꞌ neme, 1) Manetualain mai, neme, 2) Ria Dula-dale Na mai, ma neme, 3) Yesus Kristus mai. 1:4 Kalua reme Masir 3:14; Daebafo Rupa-lole Bebeuꞌ a 4:5 1:5 Yesaya 55:4; Sosoda Iꞌio-oꞌoaꞌ ara 89:27 1:6 Kalua reme Masir 19:6; Daebafo Rupa-lole Bebeuꞌ a 5:10 1:7 Daniel 7:13; Mateos 24:30; Markus 13:26; Lukas 21:27; 1 Tesalonika 4:17; Sakaria 12:10; Yohanis 19:34, 37 1:8 Daebafo Rupa-lole Bebeuꞌ a 22:13; Kalua reme Masir 3:14 1:13 Daniel 7:13; 10:5 1:14 Duduiꞌ dedea Yunani a nae, “Laka na ma lakadoo na fula na sama leoꞌ bib-ilopo a bulu na, ma fula na sama leoꞌ salju.” Sira dua sosoa na nae, buas esa fula namaroroon. 1:14 Daniel 7:9 1:15 Daniel 10:6; Yeskial 1:24; 43:2 1:17 Yesaya 44:6; 48:12; Daebafo Rupa-lole Bebeuꞌ a 2:8; 22:13