19
Manasoda ra soda rai nusatetu-ikutemaꞌ a
Eilaꞌo-limalope ria dedea basa nae leoꞌ na, boe ma au amanene haraoe malole nonooꞌ leo manasoda dodouꞌ, soda rai nusatetu-ikutemaꞌ a. Ara soda rae,
“Haleluya! Haleluya!
Ita io-oa ita Manetualain na,
nana huu Ria kahereꞌ nan seli.
Haleluya! Haleluya!
Ita io-oa ita Manetualain na,
nana huu Ria mana kuasa bauinaꞌ.
Ramatuaꞌ a riꞌ soi-tefa na ita,
teme sala-siko a mai.
Ramatuaꞌ a riꞌ tao natalolole ita,
teme ita masoda peko-paki na mai.
Ita io-oa Manetualain,
nana huu Ria riꞌ naetuꞌ dedeaꞌ no matetuꞌ.
Ita io-oa Manetualain,
nana huu Ana natetaꞌ huhukuꞌ sona beibeberaꞌ.
Ramatuaꞌ a fee huhukuꞌ neuꞌ inaꞌ manasosoa ria so,
nana huu ana soa fufudi-leleꞌo lahenda rai dae-bafoꞌ ia,
ela roo ni hohoke,
ma tuka ria tadalu na.
Ramatuaꞌ a balas inaꞌ ria tadalu na,
nana huu ana naisa
Ramatuaꞌ a lahenda nadedenu nara.”
Basa ria boe ma, ara soda sosoda fekeꞌ nai nusatetu-ikutemaꞌ a bali rae,
“Haleluya! Io-oa Ramatuaꞌ a!
Haleluya! Soꞌu madedema Ria nade Na!
Nana huu aipilaꞌ fo riꞌ naa heni inaꞌ ria popora na a,
masu na ae naroo ta pake hahaeꞌ fa.
Ma aipilaꞌ fo riꞌ naa heni kota kahereꞌ ria,
masu na ae naroo ta etu-basan fa.”
Basa boe ma, ketua kadua hulu haaꞌ sira roo banda kahereꞌ kahaaꞌ ara sundaꞌ undulaka nara, fo doꞌo-tabe rasare leo Manetualain kadera manapareta na reu. Ara fee hada-horomata neuꞌ Ana rae,
“Tebe! Mai ita io-oa Manetualain!
Haleluya! Mai ita soꞌu tadedema Ria nade Na!”
Bibi-lopo Anaꞌ a feta kakabi na
Basa de, au amanene haraoeꞌ esa neme kadera manapareta ria mai bali nae,
“Ae, Manetualain lahenda nadedenu nara!
Ae, Manetualain ana nara!
Mai, fo ita soꞌu tadedema Manetualain nade Na.
Aana-bauinaꞌ basan mai fo io-oa Ni.”
Basa boe ma au amanene nonooꞌ leo lahenda dodouꞌ dedearaon ara. Sira haraoe nara lii na bauinaꞌ a sama leoꞌ oe manariridoꞌ a, ma narulu sama leoꞌ natata natututiꞌ. Ara dedea rae,
“Haleluya! Ami io-oa Manetualain.
Haleluya! Ami soꞌu madedema Ria nade Na.
Nana huu Ria, mana kuasa bauinaꞌ.
Ma Ria riꞌ pareta basa-basan.
Besaꞌ ia, ita tamahoꞌo-tatadale.
Ita io-oa Ni,
nana huu Bibi-lopo Anaꞌ a fai kakabi Na losa so.
Ita soꞌu tadedema Ria nade Na,
nana huu Bibi-lopo Anaꞌ baroit Na manasadiaꞌ so.
Manetualain fee ni pake bua-loas kakabiꞌ neme tema balanauꞌ a mai.
Manetualain fee ni papake fula makadilaꞌ so.”
(Papake fula makadilaꞌ ria, riꞌ Manetualain lahenda nara nonoi-tatao malolen.)
Boe ma eilaꞌo-limalope ria nafada au nae, “Yohanis! O muste duiꞌ leo iaꞌ:
‘Basa lahenda fo hapu nalooꞌ leo Bibi-lopo Anaꞌ a feta kakabi Na mai a, neuꞌ ko raua-ranale matetuꞌ!’ ”
Eilaꞌo-limalope ria tuti seluꞌ dedea na nae, “Manetualain Dedea-nafadan, memaꞌ tebe!”
10 Boe ma au sundaꞌ undulaka ka fo nau doꞌo-tabe eilaꞌo-limalope ria. Tehuu ana nasaꞌai au nae, “O bosoꞌ doꞌo-tabe au! Huu fo au boe Ramatuaꞌ a lahenda nadedenun sama leoꞌ o, ma o toranoo mara siꞌ rafada lahenda laꞌeneuꞌ Yesus. Mana nesimata fo rafada Manetualain hehelu-barataan, basa-basan ratudu neuꞌ Yesus fo ela lahenda ra doꞌo-tabe Ni. Huu fo Ramatuaꞌ a Dula-dale Na hihii-nanaun leo naꞌ. De, bosoꞌ doꞌo-tabe au, tehuu doꞌo-tabe noi neuꞌ Manetualain!”
Ramatua Yesus mai, saꞌe dara fulaꞌ
11 Basa de au botiꞌ laka ka te, au ita nusatetu-ikutemaꞌ a nanasoiꞌ. Kekeneu te, au ita dara fulaꞌ esa kalua mai. Lahenda fo saꞌe nai dara ria lain a, nade, “Lahenda fo ta Nafarene heni Hehelu Na” ma “Lahenda Roo-tetuꞌ”. Fai fo Ana naetuꞌ dedeaꞌ, Ana naetuꞌ tuka matetu na. Maneniko Ana neu natati, Ana neu noo dale roo-tetuꞌ. 12 Ria mata na nahaa sama leoꞌ aipilaꞌ. Ana pake silaka maneꞌ dodouꞌ nai laka Na. Ria nade na manaduiꞌ nai ao-ina na, tehuu adaꞌ noi Ria mesaꞌ ana riꞌ bubuluꞌ nadeꞌ ria sosoa na. 13 Ria kakao-papaken, nana maboroꞌ nai daa. Lahenda hule Ni sona rae, “Manetualain Hara-dasin”. 14 Au ita soldadu ra reme nusatetu-ikutemaꞌ a, saꞌe dara fulaꞌ fo mai tuka Ni. Basa si pake papake fula makamoiꞌ boe. 15 Tafaꞌ matande esa kalua neme Ria bafa na mai boe. Ana pake tafaꞌ ria, fo neu natati soaꞌ basa lahenda nusaꞌ rai dae-bafoꞌ a, losaꞌ Ana naseki si. Boe ma Ana dadi neuꞌ sira Mane na. Ana pareta si no baraꞌaiꞌ, losaꞌ rameda rita Ramatuaꞌ mana kuasa a nasa-boliin, sama leoꞌ lahenda aai rasosopuꞌ anggor ela hee heni oe na.
16 Nai Lahenda ria papake Na, ma nai Ria puu Na, manaduiꞌ nae leo iaꞌ:
Maneꞌ nai basa maneꞌ ara
Ramatuaꞌ nai basa ramatuaꞌ ara lain.
Ramatua Yesus naseki banda maꞌaaꞌ no soldadu nara
17 Basa ria de, au ita eilaꞌo-limalope esa neme nusatetu-ikutemaꞌ a mai, napadei nai ledo a lain. Boe ma ana naloo basa manupuiꞌ mana naa poporaꞌ fo riꞌ laa ramemetoꞌ rai lalai nae, “Maiꞌ fo emi basa mabubua nai ia leo, ela mia Manetualain feta bau-ina Na! 18 Emi bole mia basa lahenda mana mateꞌ ara paa nara: siꞌ maneꞌ ara, malaka soldadu ra, ma soldadu ra. Emi bole mia dara ra ro soldadu fo saꞌe rai dara sira a paa nara. Emi bole mia ata, do ta ata fa, do lahenda aanaꞌ, do lahenda bauinaꞌ ara paa nara. Eetu dedea na, emi bole mia sira basa paa nara.”
19 Boe ma au ita banda maꞌaa fo fai a ulu na kalua neme tasiꞌ a mai a. Ana neu dedearaoꞌ no basa maneꞌ rai dae-bafoꞌ a ro soldadu nara, fo reu ratati soaꞌ Lahenda manasaꞌe dara fulaꞌ ria, sama-sama no Ria soldadu nara reme nusatetu-ikutemaꞌ a mai. 20 Tehuu Lahenda manasaꞌe dara fulaꞌ ria, hopu na banda maꞌaaꞌ a no mana nesimata mapuputan, fo riꞌ fai a ulu na tao tanda heran rupaꞌ ara, ela napuputaꞌ lahenda fo sipoꞌ banda maꞌaaꞌ ria ee-dededen, ma soko neuꞌ ria patung na. Tehuu besaꞌ ia, Lahenda manasaꞌe dara fulaꞌ ria, neu tuꞌu heni banda maꞌaaꞌ ria no mana nesimata na leo tasi aipila balerang manabasa taaꞌ a neu. 21 Basa de, Lahenda manasaꞌe dara ria, neu naisa soldadu fekeꞌ sira, neniꞌ Ria tafan fo kalua neme bafa Na mai a. Basa boe ma manupui mana naa poporaꞌ ara mai raa heni katemaꞌ poporaꞌ sira.
19:2 Tui Seluꞌ Laꞌe Neuꞌ Eno Sodaꞌ a 32:43; 2 Maneꞌ ara 9:7 19:3 Yesaya 34:10 19:5 Sosoda Iꞌio-oꞌoaꞌ ara 115:13 19:6 Yeskial 1:24; Sosoda Iꞌio-oꞌoaꞌ ara 93:1; 97:1; 99:1 19:9 Mateos 22:2-3 19:11 Yeskial 1:1; Sosoda Iꞌio-oꞌoaꞌ ara 96:13; Yesaya 11:4 19:12 Daniel 10:6 19:15 Sosoda Iꞌio-oꞌoaꞌ ara 2:9; Yesaya 63:3; Yoel 3:13; Daebafo Rupa-lole Bebeuꞌ a 14:20 19:18 Yeskial 39:17-20 19:20 Daebafo Rupa-lole Bebeuꞌ a 13:1-18